OMAPULO OPAMBIBELI A NYAMUKULWA
Edina laKalunga olyelye?
Oilyo yomaukwaneumbo etu aishe oi na omadina. Oinamwenyo yomeumbo nayo oi na yo omadina. Mbela inashi yuka Kalunga a kale e na edina? Ombibeli oya popya kutya Kalunga oku na omadinafimaneko mahapu, ngaashi Kalunga Omunaenghono, Omwene Omunamapangelo nOmushiti, ashike nande ongaho, oku na edina.— Lesha Jesaja 42:8.a
Edina laKalunga otali hangwa momatoloko mahapu Eembibeli mEpsalme 83:18 (ovelishe 19 mOmbibeli yOshikwanyama). Pashihopaenenwa, mo-New World Translation of the Holy Scripture, ovelishe oyo otai ti: “Ove ou edina loye Jehova, oove auke Omukombadambada medu alishe.”
Omolwashike tu na okulongifa edina laKalunga?
Ohatu longifa omadina ovanhu ovo tu hole ngeenge hatu popi navo, ngaashi ookaume ketu vopofingo
Kalunga okwa hala tu longife edina laye. Ohatu longifa omadina ovanhu ovo tu hole ngeenge hatu popi navo, ngaashi ookaume ketu vopofingo, unene tuu ngeenge ova hala tu shi ninge. Mbela ongahelipi ngeenge hatu popi naKalunga? Jesus Kristus okwe tu ladipika tu longife edina laKalunga.— Lesha Mateus 6:9; Johannes 17:26.
Ndele opo tu ninge ookaume kaKalunga, otwa pumbwa okushiiva shihapu kombinga yaye shihe fi ashike edina laye. Pashihopaenenwa, Kalunga okwa tya naanaa ngahelipi? Mbela otashi shiiva ngoo okweehena popepi naKalunga? Oto dulu okumona omanyamukulo komapulo oo mOmbibeli.
a Jesaja 42:8: “Aame [Jehova, NW] olo edina lange, ihandi yandje efimano lange kuumwe ile okuhambelelwa kwange koihongwafano.”