Petrus naAnanias ova li va popya oipupulu — osho otashi tu hongo oshilihongomwa shilipi?

Ngaashi u shi shii, oipupulu oshinima osho wa popya shihe fi shoshili. Mbela owa popya nale oipupulu? — a Nokuli novakulunhu vamwe ovo ve hole Kalunga ova li va popya oipupulu. Otashi dulika u shii omunhu umwe oo a tumbulwa mOmbibeli a popya oipupulu. Edina laye oPetrus, umwe womovayapostoli 12 vaJesus. Natu ka taleni kehokololo tu ude kutya omolwashike a li a popya oipupulu.

Konima eshi Jesus a li a kwatwa po, okwa li a twalwa keumbo lomupristeri omukulunhu. Osha li sha yuka keengulasha eshi Petrus a li a ya momukala weumbo lomupristeri nopehe na oo e mu dimbuluka. Ndele fimbo ve li pomundilo, okakadona okapiya komupristeri omukulunhu oka li ke mu dimbuluka. Oka ti: “Naave yo owa li pamwe naJesus.” Omolwoumbada, Petrus okwa ti kutya ka li naye.

Ombibeli oya ti kutya konima yaasho “okakadona kamwe [vali, NW] oke mu mona.” Oka ti: “Naau yo okwa li pamwe naJesus.” Natango Petrus okwa li e likala. Ndele konima yokafimbo, vamwe vali ovo va li po ova tya kuPetrus: ‘Oshili naave yo oumwe waavenya.’

Molwaashi Petrus okwa li a tila, okwa popya oipupulu oshikando oshititatu a ti: “Omulumenhu ou nghi mu shii.” Opo nee ekondombolo ola lila. Jesus okwa tala kuPetrus, na Petrus okwa dimbuluka kutya konima ashike yokafimbo kanini, Jesus okwa li e mu lombwela a ti: “Ekondombolo fimbo inali kwena, oto lidimbike nge lutatu.” Petrus okwa lila, molwaashi okwa li e udite nai neenghono.

Mbela oto dulu okuhangwa konghalo ya tya ngaho? — Natu tye nee ngeno ou li kofikola ndele to udu ovanafikola vakweni tava popi kombinga yEendombwedi daJehova. Umwe okwa ya mo ta ti: “Ihadi shalutile epandela.” Mukwao ta weda ko ta ti: “Ihadi lwile oshilongo shado.” Umwe vali ta ti: “Kadi fi Ovakriste vashili, molwaashi ihadi dana Okrismesa.” Opo nee umwe okwe uya kwoove ndele te ku pula ta ti: “Ove ku shi umwe womEendombwedi daJehova?” Oto ka tya ngahelipi? — 

Fimbo oinima ya tya ngaho inai ningwa, owa pumbwa okuhangwa we lilongekida opo u dule okuyandja enyamukulo liwa. Petrus ka li e lilongekida, nomolwaasho a li a popya oipupulu eshi omafininiko e mu hanga. Ndele nande ongaho, okwa li a uda nai neenghono kwaasho a ninga, na Kalunga okwa li e mu dimina po.

Ananias, umwe womovahongwa vaJesus vonale naye okwa li a popya oipupulu. Ashike Kalunga ka li e va dimina po aveshe nomukulukadi waye, Safira. Safira okwa li a twa kumwe nomushamane waye opo va popye oipupulu. Natu ka taleni kutya omolwashike Kalunga ine va dimina po.

Konima yomafiku omulongo eshi Jesus a fiya po ovayapostoli vaye ndele ta shuna meulu kuKalunga, ovanhu 3 000 ova li va ninginifwa muJerusalem. Vahapu ova li va dja koilongo yokokule ve uya okudana oshivilo shaPentekoste, ashike konima eshi va ninga ovahongwa vaJesus, ova li va hala okukala po oule wefimbo opo ve lihonge shihapu kombinga yeitavelo lavo lipe. Onghee hano, vamwe vomovahongwa vaJesus ova li va longifa oimaliwa yavo opo ve va file oshisho.

Ananias nomukulukadi waye ova li va ladifa po imwe yomoinima yavo opo va dule okukwafela ovo opo va ninginifwa. Eshi Ananias a li a eta oimaliwa kovayapostoli, okwa ti okwa eta omuvalu aushe woinima oyo va ladifa. Ashike ka li a popya oshili, molwaashi okwa li a holeka po oimaliwa imwe. Kalunga okwa li a hololela Petrus oshinima osho, na Petrus okwa li a lombwela Ananias a ti: “Havanhu wa fufya, oKalunga.” Opo nee, Ananias okwa wila poshi ndele ta fi. Konima yeevili nhatu, omukulukadi waye okwa li e uya mo. Molwaashi ka li e shii kutya oshike sha ningilwa omushamane waye, naye okwa li a popya oipupulu ndele ta wile po nokufya.

Osho kashi fi tuu oshilihongomwa sha denga mbada! Osha fimana okukala hatu popi oshili. Nonande atusheni ohatu ka ninga omapuko, unene tuu eshi tu li ounona, otwa pumbwa okulihonga oshilihongomwa osho. Mbela ino hafa eshi Jehova e ku hole note ke ku dimina po ngaashi a li a dimina po Petrus? — Ashike dimbuluka kutya otwa pumbwa okukala hatu popi oshili. Ngeenge otwa ningi epuko la kwata moiti lokupopya oipupulu, otwa pumbwa okupula nelininipiko Kalunga e tu dimine po. Osho osho Petrus a li a ninga, nokwa li a diminwa po. Ngeenge otwa ningi eenghendabala tu kale ihatu popi vali oipupulu, nafye Kalunga ote ke tu dimina po.