Ovakulunhuongalo, ohamu tulumukifa ngoo ‘eemwenyo odo da loloka’?

Efiku limwe omumwameme umwe ina hombolwa wedina Angelaa womido 30 nasha okwa li a tila eshi a uda kutya ovakulunhuongalo otave uya oku mu talela po. Okwa li te lipula kutya, mbela otave uya va lombwele nge shike? Angela okwa faulile okwoongala lwoikando yonhumba molwaashi okwa li a loloka eshi a dja koilonga yaye yokufila oshisho ovanamido. Kakele kaasho, ote lipula kombinga youkolele waina.

Ngeno oove nee to ka talela po Angela, ongahelipi to ke mu twa omukumo? Mbela oshike u na okuninga po tete fimbo ino ka talela po oo e na “omwenyo wa loloka”? — Jer. 31:25.

DILADILA SHI NA SHA NONGHALO YOMUMWAXO

Omafimbo amwe, atushe ohatu kala twa loloka omolwoilonga yokulikongela omboloto ile oinakuwanifwa yetu yopaKriste. Pashihopaenenwa, omuprofeti Daniel okwa li a “tyololoka” eshi a mona emoniko olo a li ehe udite ko. (Dan. 8:27) Kalunga okwa li a tuma kuye omweengeli Gabriel e mu yelifile emoniko olo nonokutya Jehova okwa uda omailikano aye. Omweengeli okwa li yo e mu lombwela kutya Jehova okwe mu tala ko e li omunhu “muwa unene.” (Dan. 9:21-23) Lwanima, omweengeli umwe vali okwa ka holokela Daniel nokwe mu twa omukumo neendjovo da hoololekeka. — Dan. 10:19.

Sha faafana, fimbo ino ka talela po omwiitaveli mukweni oo a loloka ile a teka omukumo, tete diladila manga kombinga yonghalo yaye. Mbela oku na omaupyakadi elipi? Ongahelipi omaupyakadi aye taa dulu oku mu teya omukumo? Oha ulike omaukwatya mawa elipi? Richard oo a kala omukulunhuongalo oule womido di dulife 20 okwa ti: “Ohandi yandje elitulemo komaukwatya mawa omumwatate.” Okwa weda ko ta ti: “Ngeenge onda konakona noukeka kombinga yonghalo yaye fimbo inandi ke mu talela po, ohashi kwafele nge ndi shiive nghee handi dulu oku mu pa etwomukumo olo a pumbwa.” Ngeenge otamu ka talela po omumwaxo nomukulunhuongalo mukweni, omolwashike itamu kundafana pamwe shi na sha nonghalo yaye?

KWAFELA OMUMWAXO A KALE A MANGULUKA

Oshi na oupu naave to dimine kutya omunhu oha kala a fya ohoni okuhololela vamwe omaliudo aye. Ongahelipi to dulu okukwafela omumwaxo a kale a manguluka? Ngeenge owa kala to limemesha nokupopya eendjovo diwa, otashi ka kwafela omumwaxo a kale a manguluka. Michael, oo a kala omukulunhuongalo oule womido di dulife 40, luhapu petalelepo laye oku hole okuhovela neendjovo ngaashi edi: “Ou wete, oufembanghenda umwe wa denga mbada wokukala omukulunhuongalo oo okutalela po ovamwaxo momaumbo avo noku va shiiva nawa. Onghee hano, onda kala nda teelela nodjuulufi okuuya ndi ku talele po nena.”

Otamu dulu okuhovela etalelepo leni neilikano. Omuyapostoli Paulus okwa li a divilika momailikano aye omaukwatya mawa ovamwaxe ngaashi eitavelo, ohole nosho yo elididimiko. (1 Tes. 1:2, 3) Ngeenge owa tumbula omaukwatya mawa omumwaxo meilikano, kungaho oto longekida omutima woye nosho yo waye opo mu dule oku ka hafela eenghundafana. Oshidjemo, eenghundafana deni otadi ka kala tadi tungu. Omukulunhuongalo umwe a pyokoka wedina Ray okwa ti kutya omafimbo amwe, atusheni ohatu dimbwa oinima iwa oyo hatu longo moilonga yaKalunga nohatu kala tu udite nawa ngeenge umwe okwe tu dimbulukifa oinima oyo.

VA TWA OMUKUMO TO LONGIFA OMBIBELI

Ngaashi Paulus, oto dulu okupa omumwaxo ‘eeshalinghenda dopamhepo’ mokukundafana naye nande ovelishe imwe mOmbibeli. (Rom. 1:11) Pashihopaenenwa, omumwatate oo a polimana otashi dulika a kale e udite a fa ehe na oshilonga. Oto dulu okulesha pamwe naye kombinga yomupsalme umwe oo a li e lifaafanifa ‘nekutu longaho li li momwifi.’ (Eps. 119:83, 176) Ngeenge owa yelifa pauxupi omushangwa oo, oto dulu okulombwela omumwaxo kutya ou na oushili kutya ina “dimbwa” oipango yaKalunga.

Sha faafana, mbela efaneko li na sha noshisilveri shimwe osho sha li sha kana itali dulu okukuma omumwameme oo a fiya po eongalo nokwa nghundipala pamhepo? (Luk. 15:8-10, NW) Oshisilveri osho sha li sha kana otashi dulika sha li oshitukulwa shokalyenge komofingo kondilo oko ka longwa moisilveri ihapu. Ngeenge owa yelifile omumwameme oo efaneko olo, otashi ke mu kwafela a mone kutya oku li oshitukulwa sha fimana sheongalo lopaKriste. Konima eshi mwa kundafana oshinima osho, oto dulu okukundafana naye kutya Jehova oku na ko nasha naye shi fike peni eli kamwe komoudjona vaye.

Luhapu ovaitaveli vakwetu ohava hafele okupopya kombinga yomishangwa odo va lesha. Onghee hano, ino kala ashike oove to popi. Konima eshi mwa lesha ovelishe yonhumba oyo ya yukila konghalo yavo, oto dulu okutofa mo oitwa ya fimana noku va pula va tye sha shi na sha nayo. Pashihopaenenwa, ngeenge omwa lesha 2 Ovakorinto 4:16, omukulunhuongalo ota dulu okupula omumwaxe ta ti, “Mbela naave owa li wa pamekwa kuJehova monghedi yonhumba?” Epulo la tya ngaho otali dulu okutwala meenghundafana odo tadi ke mu tunga amushe. — Rom. 1:12.

Oto dulu yo okutwa omukumo omumwaxo mokukundafana naye kombinga yaumwe oo a popiwa mOmbibeli oo a li monghalo ya yukila kuyaye. Ngeenge omunhu okwa polimana otashi dulika a kale e udite ngaashi Hanna ile Epafroditus ovo pomhito imwe navo vali va polimana, ndele nande ongaho, ova li ve na ondilo momesho aKalunga. (1 Sam. 1:9-11, 20; Fil. 2:25-30) Omolwashike itamu kundafana oihopaenenwa yonhumba yomOmbibeli ngeenge onghalo otai shi pitike?

TWIKILA OKUULIKA KUTYA OU NA KO NASHA NAVO

Konima eshi wa talela po ovamwaxo, twikila okuulika kutya ou na ko nasha shili navo. (Oil. 15:36) Konima eshi mwa mana okuninga etalelepo, oto dulu okuninga elongekido mu ka longe momapya pamwe naao mwa talela po. Omukulunhuongalo umwe a pyokoka wedina Bernard ngeenge a shakene nomumwatate ile nomumwameme oo a li a talela po, ohe mu pula nelungi ngeenge omayele oo e mu pele okwe mu kwafela ngoo. Ngeenge owa ulikile omumwaxo okunakonasha kwa tya ngaho, oto ka dula okumona ngeenge okwa pumbwa ekwafo la wedwa po ile hasho.

Ovamwatate novamwameme ova pumbwa okukala ve udite kutya otu na ko nasha navo, otu udite ko eenghalo davo notu va hole. (1 Tes. 5:11) Onghee hano, fimbo ino ka ninga etalelepo loufita, diladila manga kombinga yonghalo yomumwaxo. Ilikana yo shi na sha netalelepo olo. Hoolola omishangwa tadi wapalele odo to ka longifa. Opo nee, oto ka dula okumona omautumbulilo taa wapalele oo taa ka tulumukifa “omwenyo wa loloka.”