Eenghedi nhano omo to dulu okumona omukonakonimbibeli
1. Ngeenge oshi li eshongo okumona omukonakonimbibeli moshitukulwa shetu, otu na okuninga po shike, nomolwashike?
1 Mbela oho mono shidjuu okumona omukonakonimbibeli? Ngeenge osho, twikila okuninga eenghendabala, molwaashi Jehova oha nangeke noupuna ovo ihava sholola okulonga ehalo laye. (Gal. 6:9) Apa otapa landula omaetepo atano oo taa dulu oku ku kwafela.
2. Omolwashike tu na okukala hatu pula ovanhu odikilila ngeenge ova hala okukonakona Ombibeli?
2 Pula ovanhu u konakone navo Ombibeli: Ovanhu vahapu ove shii kutya ohatu yandje Oshungonangelo no-Awake!, ndele otashi dulika kave shii ngeenge ohatu konakona Ombibeli navamwe. Omolwashike ito kendabala okupula ovanhu odikilila ngeenge u li moilonga yeumbo neumbo? Oto dulu yo okupula ovanhu ovo ho talele po ngeenge ova hala okukonakona Ombibeli. Ngeenge ova ti inava hala, oto dulu okukala ho va pe oishangomwa nokukulika ohokwe yavo. Omumwatate umwe okwa kala ha talele po ovalihomboli vonhumba oule womido, he va twaalele ashike oifo. Eshi a li ta shuna konima eshi a li e va twaalela oifo ipe oshikando shimwe, okwa li a shuna kuvo ndele te va pula kutya: “Inamu hala okukonakona Ombibeli?” Ova li va nyamukula kutya ova hala, nopaife ova ninginifwa.
3. Mbela otu na okudiladila kutya ovanhu ovo have uya kokwoongala ohava konakona Ombibeli naumwe? Shi yelifa to yandje oshihopaenenwa.
3 Pula ovo have uya kokwoongala u konakone navo: Ino fika pexulifodiladilo kutya ovanhu ve na ohokwe ovo have uya kokwoongala ope na nale oo ha konakona Ombibeli navo. Omumwatate umwe okwa ti: “Ovakonakonimbibeli vange vahapu ovanhu ovo va li have uya kokwoongala ndele handi va pula tu konakone navo.” Omumwameme umwe okwa li a tokola okupula omukainhu umwe e na eehoni oo ovanakadona vaye va ninginifwa nove li meongalo lavo. Omukainhu oo okwa kala he uya kokwoongala oule womido 15 lwaapo nokwa li alushe he uya mOlupale lOuhamba shimha okwoongala taku hovele nokudja mo diva shimha kwa dimbuka. Omukainhu oo okwa li a dimina okukonakona Ombibeli nohauxuuninwa okwe ke uya moshili. Omumwameme oo a li e mu pula okwa ti: “Onda nyemata eshi nda efa pa pite omido 15 opo ndi ka pule omukainhu oo ngeenge okwa hala okukonakona.”
4. Ongahelipi hatu dulu okumona omukonakoni mokupula vamwe ngeenge ova hala okukonakona?
4 Pula ngeenge ope na ovo va hala okukonakona: Omumwameme umwe oha kendabala okuya navamwe kovakonakonimbibeli vavo. Opo nee okwa li ha pula epitikilo kumwene wekonakono opo a pule omukonakoni ngeenge ke shii vamwe ovo tashi dulika va hala okukonakona Ombibeli. Ngeenge to yandje embo Ombibeli otai hongo komunhu oo ho talele po, oto dulu oku mu pula to ti: “Mbela ku shii vali umwe oo tashi dulika ta ka kala a hokwa embo eli?” Omafimbo amwe, eenghalo ihadi pitike ovaudifi novakokolindjila va konakone novanhu ovo va shakeneka moshitukulwa. Onghee hano, shiivifila vamwe kutya owa hala omukonakonimbibeli.
5. Omolwashike tu na okupula ookaume kopahombo ovo vehe fi ovaitaveli vOvakriste vakwetu ngeenge pamwe ova hala okukonakona?
5 Kaume kopahombo ehe fi omwiitaveli: Mbela ope na ovaudifi meongalo leni ovo ve na ookaume kopahombo vehe fi ovaitaveli? Ookaume kopahombo vamwe ovo vehe fi ovaitaveli kave hole okukundafana Ombibeli nookaume kavo Ovakriste, ndele ohava dimine okukonakona naumwe oo ehe fi wambulavo. Luhapu oshiwa okupopya nakaume kopahombo oo Omukriste fimbo ino ka pula kaume kaye kopahombo oo ehe fi omwiitaveli.
6. Omolwashike sha fimana okwiilikana ngeenge to kongo omukonakonimbibeli?
6 Eilikano: Ino dina eenghono deilikano. (Jak. 5:16) Jehova okwa udaneka kutya ota ka pwilikina komailikano etu ngeenge oku li metwokumwe nehalo laye. (1 Joh. 5:14) Omumwatate umwe oo a li e na omalipyakidilo mahapu neenghono okwa li a hovela okwiilikana opo a mone omukonakonimbibeli. Omukulukadi waye okwa li te lipula ngeenge omushamane waye ota ka kala ngoo e na efimbo lokuninga ekonakono, unene tuu ngeenge omukonakoni oku na omaupyakadi mahapu. Onghee hano, omukulukadi okwa li ha ilikana kuJehova kombinga yomalipulo oo ngeenge a li ta ilikana opo omushamane waye a mone omukonakoni. Omailikano avo okwa li a nyamukulwa konima yoivike ivali lwaapo eshi omukokolindjila umwe meongalo a li a mona omulumenhu oo a hala okukonakona ndele te mu yandje komumwatate oo. Omukulukadi okwa ti: “Keshe oo tashi dulika e udite kutya okukonakona Ombibeli naumwe otashi pula shihapu, ohandi mu ladipike kutya: Ilikana kondadalunde, noino efa okwiilikana kombinga yasho. Otwa hafa neenghono shi dulife nale.” Ngeenge owa ningi eenghendabala da mana mo, naave oto dulu okumona ovakonakonimbibeli nokumona ehafo olo hali di mokukwafela umwe a ende ‘mondjila oyo tai twala komwenyo.’ — Mat. 7:13, 14.