Ongahelipi to dulu okupaafana ombili nomumwanyoko?

Kala nee ngeno wa fa u li pefimbo laJesus ho di moshitukulwa shaGalilea. Owa ya kuJerusalem u ka dane Oshivilo shOmatwali. Moshilando omu yadi ovalongelikalunga vakweni va dja koitukulwa yokokule. Owa hala okuyambela Jehova eyambo loye. Oto ende mokati kovanhu u kwete oshikombo shoye wa finda kotembeli. Eshi wa fika, owa hanga otembeli i yadi vakweni ovo navo ve uya okuyamba omayambo avo. Opo nee olufo loye lokuyandja oshikombo komupristeri ola fika. Opo ngoo u li po, owa dimbuluka oupyakadi oo u li pokati koye nomumwaxo, oo tashi dulika e li mengafifi lovanhu ovo ile e li moshilando. Jesus okwa yelifa nawa osho u na okuninga. (Lesha Mateus 5:24.) Metwokumwe naasho Jesus a popya, ongahelipi tamu dulu okupongolola po oupyakadi oo u li pokati keni nomumwaxo? Momusholondodo tau landula, tula okangobe penyamukulo olo to diladila kutya olo li li mondjila.

OU NA . . . 

• ashike oku ka popya nomumwaxo ngeenge ou wete pe na etomheno olo le mu handukifa

• okukendabala okupukulula omumwaxo ngeenge ou wete ha handuka diva ile u wete kutya amushe omu na ombedi

• okupwilikina nelitulemo eshi omumwaxo ta popi tashi di komutima nonande otashi dulika uhe udite ko, mu pa ombili eshi wa yahameka omaliudo aye ile eshi wa etifa po oilanduliko oyo omolweenghatu doye

OMUMWAXO OKU NA . . . 

• okukonga ekwafo kuvamwe meongalo moku va lombwela owii oo we mu ningila

• okupopya nonya okanima keshe oko ka kwatelwa mo opo u dimine epuko loye

• okudidilika mo kutya owe lininipika noshe ku pula ouladi opo u ye kuye mu paafane ombili tashi di komutima

Nonande kunena elongelokalunga letu inali kwatela mo omayambo oinamwenyo, oshike osho Jesus e tu honga shi na sha nekwatafano letu novamwatate nosho yo nokulongela kwetu Kalunga?