Oto Dimbuluka?

Owa lesha ngoo nawanawa Eeshungonangelo dodula ei? Tala ngeenge oto mono omanyamukulo omapulo taa shikula:

Otu na okuungaunga ngahelipi nOvakriste ovavaekwa?

Ohatu pandula eshi ve na eitavelo, ashike ihatu va pe efimano la pitilila. Ohatu henuka ‘okutumbaleka vamwe.’ (Jud. 16, esh.) Ihatu va pula kombinga yeteelelo lavo. — w20.01, ep. 29.

Oshike shi na oku ku tomha opo u itavele kutya Jehova oku ku shii pauhandimwe?

Ombiibeli oya popya kutya Jehova oku ku shii ofimbo ino dalwa. Oha pwilikine komailikano oye. Oku shii osho to diladila, osho shi li momutima woye, neenghatu doye ohadi mu kumu pamaliudo. (1 Omaf. 28:9; Omayel. 27:11) Okwe ku nanena kuye. — w20.02, ep. 12.

Oihopaenenwa ilipi i na sha nokupopya nosho yo nokumwena?

Ohatu kala twa hafa okupopya kombinga yaJehova. Ohatu pukulula umwe oo tu wete a finda mondjila ya puka. Ovakulunhuongalo ohava yandje omayele apa sha pumbiwa. Ihatu popi (ile tu pule) shi na sha nanghee oilonga yetu hai longwa koilongo oko ya shilikwa. Ihatu holola oiholekwa. — w20.03, ep. 20-21.

Oshipaxu osho sha popiwa muJoel etukulwa 2 osha yooloka ko ngahelipi kwaasho sha popiwa mEhololo etukulwa 9?

Joel 2:20-29 okwa popya kutya Kalunga ota ka taataa po oshipaxu nokwa udaneka kutya ota ka alula ashishe osho sha hanaunwa po koshipaxu. Konima yaasho, Kalunga ota ka tilila omhepo yaye iyapuki. Exunganeko olo ola ka wanifwa po eshi Babilon a ponokela Israel. Ehololo 9:1-11 ola yelifa kutya oshipaxu osho otashi faneke ovapiya vaJehova ovavaekwa ovo hava udifa nouladi omatokolo aye e na sha nounyuni ou wa kolokosha, naavo have u yambidida itava ka kala vali va manguluka. — w20.04, ep. 3-6.

Olyelye ohamba yokoumbangalanhu kunena?

Kunena ohamba yokoumbangalanhu oRussia novayambididi vaye. Ohava hepeke oshiwana shaKalunga, va shilika oilonga yokuudifa nove tonde Eendombwedi. Ohamba yokoumbangalanhu otai ka kala tai kondjifafana nohamba yokoumbuwanhu. — w20.05, ep. 13.

Mbela omaukwatya omuwoi oo a popiwa mOvagalati 5:22, 23, oo aeke e li “oiimati yomhepo”?

Ahowe. Omhepo iyapuki otai tu kwafele tu kulike omaukwatya makwao mawa, ngaashi ouyuki. (Ef. 5:8, 9) — w20.06, ep. 17.

Omolwashike sha nyika oshiponga okufaneka oinima yopamaliko noku i tula kointaneta?

Ngeenge to tula kointaneta omafano a tya ngaho oto ulike kutya oto litumbalekifa ove mwene, ndele ku na elininipiko. — w20.07, ep. 6-7.

Oshike Ovakriste tave lihongo komuyuli weeshi omunawino?

Ohava ka yula eeshi poima opo hapa kala eeshi dihapu. Ohava deulwa nghee ve na okulongifa nawa oilongifo. Ohava longo nouladi meenghalo di lili noku lili. Nafye ohatu dulu okuninga sha faafana moilonga yokuudifa. — w20.09, ep. 5.

Omeenghedi dimwe dilipi hatu dulu okukwafela ovakonakonimbiibeli va kale ve hole Jehova neenghono?

Ohatu dulu oku va ladipika va kale hava lesha Ombiibeli efiku keshe nokudilonga kwaasho va lesha. Ohatu dulu oku va honga nghee ve na okwiilikana. — w20.11, ep. 4.

Oolyelye va kwatelwa moutumbulilo: “Aveshe otava dulu oku ka kala nomwenyo okupitila muKristus”? — 1 Kor. 15:22.

Omuyapostoli Paulus ina popya kutya ovanhu aveshe otava ka nyumunwa. Okwa li ta popi kombinga yOvakriste ovavaekwa, ovo hava ifana “edina lOmwene wetu Jesus Kristus.” (1 Kor. 1:2; 15:18) — w20.12, ep. 5-6.

Oshike ovavaekwa tava ka ninga konima eshi va “shitululwa mepakumo leisho pefimbo leshiko lenghuma laxuuninwa”? — 1 Kor. 15:51-53.

Otava ka longa pamwe naKristus mokupangela oiwana nodibo yoshivela. (Eh. 2:26, 27) — w20.12, ep. 12-13.