Omapulo a dja kovaleshi
Eshi David a shanga eendjovo odo di li mEpsalme 61:8, a ti kutya ota kala nokutanga edina laKalunga “fiyo alushe,” mbela okwa li a hala kutya ke na efiku a fye?
Ahowe. Osho David a shanga oshi na eityo noshoshili.
Diladila kwaasho a shanga movelishe oyo nosho yo dikwao da pambafana, a ti: “Osho nda hala okwiimbila edina loye omahambelelo alushe fiyo alushe, ndi wanife omaudaneko ange efiku nefiku.” “Omwene, Kalunga kange, onda hala oku ku tanga nomutima aushe nokufimaneka edina loye fiyo alushe.” ‘Ohandi tange edina loye alushe fiyo alushe.’ — Eps. 61:8; 86:12; 145:1, 2.
Eshi David a shanga eendjovo odo, ka li ta diladila kutya ke na efiku a fye nandenande. Okwa li e shii kutya Jehova okwa popya kutya omolwoulunde ovanhu ove na okufya, na David okwa li a dimina kutya naye yo omulunde. (Gen. 3:3, 17-19; Eps. 51:4, 5) Okwa li e shii kutya nokuli novalumenhu ovo Kalunga a li a hokwa, ngaashi Abraham, Isak naJakob, ova fya. David naye okwa li e shii kutya oku na okufya. (Eps. 37:25; 39:4) Ashike eendjovo daye odo tadi hangwa mEpsalme 61:8, otadi ulike kutya okwa li a hala nokwa tokola okutanga Kalunga fiyo alushe, sha hala okutya, fimbo e na omwenyo. — 2 Sam. 7:12.
Omafimbo amwe, David okwa shanga kombinga yoimoniwa yonghalamwenyo yaye, ngaashi tu shi wete mEpsalme 18, 51 nosho yo 52. MEpsalme 23, David okwa popya Jehova e li omufita oo ta yandje ewiliko, epepelelo neameno. David okwa li omufita a tya ngaho. Okwa li a hala okulongela Kalunga ‘omafiku aye aeshe.’ — Eps. 23:6.
Kaleka yo momadiladilo kutya David okwa nwefwa mo kuJehova, opo a shange oinima oyo. Osho a shanga osha kwatela mo omaxunganeko e na sha naasho sha li tashi ka ningwa lwanima. Pashihopaenenwa, mEpsalme 110, David okwa popya kombinga yefimbo olo, eshi Omwene ta ka ‘kala omutumba kolulyo laKalunga’ meulu nokupewa eenghono dinene. Opo a ninge shike? Oku finde ovatondi vaKalunga ‘nokuyandja etokolo mokati koiwana’ kombada yedu. David oku li xekulululwa yaMessias, oo ta pangele okudja meulu nota kala e li “omupristeri fiyo alushe.” Jesus okwa koleka kutya exunganeko, olo tali hangwa mEpsalme 110, ola li tali popi kombinga yaye nonokutya otali ka wanifwa monakwiiwa. — Mat. 22:41-45.
Onghee David okwa li a nwefwa mo a shange shi na sha nefimbo laye nosho yo shi na sha nonakwiiwa, eshi ta ka nyumunwa nota ka dula okuhafela okutanga Jehova fiyo alushe. Osho otashi tu kwafele tu mone kutya Epsalme 37:10, 11, 29, otali dulu okuyukifwa kefimbo lonale, opo la li la shangwa nosho yo monakwiiwa. Eevelishe odo oda li da wanifilwa Israel shonale notadi ka wanifwa monakwiiwa, eshi Kalunga ta ka wanifa po omaudaneko aye. — Tala okatendo 8 moshitukulwa “Oto ka kala pamwe naame moParadisa,” moshifo eshi.
Epsalme 61:8 nosho yo eevelishe dikwao da faafana oda ulika kutya David okwa li a hala okutanga Jehova muIsrael shonale fiyo osheshi a fya. Oda ulika osho David ta ka dula okuninga monakwiiwa, ngeenge Jehova okwe mu nyumuna.