Okudja pEyelu laNoa fiyo osheshi Ovaisrael va mangululwa moupika waEgipti

Opa li ashike pa xupa ovanhu vahetatu pefimbo lEyelu, ndele mokweendela ko kwefimbo, ovanhu ova ka hapupala neenghono. Abraham okwa ka dalwa eshi pa pita omido 352 okudja pEyelu. Ohatu ke lihonga kombinga yanghee Kalunga a li a wanifa po eudaneko laye olo a li a udanekela Abraham. Kalunga okwa li a udanekela Abraham okaana okamati, naAbraham okwe ka luka Isak. Isak okwa ka dala ovamati vavali. Kalunga okwa li a hokwa Jakob umwe womovanamati vavali vaIsak.

Jakob okwa ka kala e na oukwaneumbo wa kula. Okwa li e na ovanamati 12 nosho yo ovanakadona. Ovanamati vaJakob 10 ova li ve tonde ondenge yavo Josef nova li ve mu landifa po a ka ninge omupika kuEgipti. Lwanima, Josef okwa ka ninga omupangeli a fimana muEgipti. Eshi kwa li ondjala inene, ovamwaxe vaJosef ova li va ya kuEgipti. Josef okwa li a yeleka ovamwaxe a tale ngeenge ova lundulula ngoo oikala yavo. Hauxuuninwa, oukwaneumbo waJakob aushe, Ovaisrael, owa li wa tembukila kuEgipti. Osho osha li sha ningwa pa pita omido 290 okudja eshi Abraham a dalwa.

Ovaisrael ova ka kala muEgipti oule womido 215 okudja eshi va tembukila oko. Eshi Josef a fya, Ovaisrael ova ka ningwa ovapika kOvaegipti. Lwanima, Moses okwa ka dalwa. Kalunga okwe ke mu pa oshinakuwanifwa shokumangulula Ovaisrael moupika waEgipti. Oiningwanima aishe oyo tai hokololwa moshitukulwa eshi oshitivali oya ningwa moule womido 857 adishe kumwe.