Ohamba iwa yaxuuninwa muIsrael

JOSIA okwa li a ninga ohamba youhamba waIsrael wokolukadi womapata avali fimbo a li e na omido hetatu. Okwa li munini neenghono okuningwa ohamba. Onghee hano, pehovelo okwa li ha kwafelwa kovakulunhu vonhumba opo a dule okupangela oshiwana.

Josia okwa li a hovela okukonga Jehova konima eshi a kala ta pangele oule womido heyali. Okwa li a shikula oshihopaenenwa shiwa sheehamba ngaashi David, Josafat naHiskia. Fimbo Josia a li e na omido omulongo nasha, okwa li a longa oshilonga osho sha li tashi pula ouladi.

Ovaisrael ova kala tava longo owii neenghono oule wefimbo lile. Ova li hava longele oikalunga nova li hava ilikana oihongwafano. Onghee hano, efiku limwe Josia okwa kufa ovakwaita vaye, ndele tava hovele okukomba mo omalongelokalunga oipupulu aeshe muIsrael. Osho osha li oshilonga sha kwata moiti, molwaashi ovanhu vahapu ova li hava ilikana oikalunga. Ngeenge owa tale mefano olo li li kolumosho, oto mono mo Josia novakwaita vaye tava hanauna po oihongwafano.

Konima yaasho, Josia okwa ka pa ovalumenhu vatatu oshinakuwanifwa shokupashukila oilonga yokuwapekulula otembeli yaJehova. Ovanhu ova li va ongela oimaliwa, ndele tai pewa ovalumenhu ovo opo va dule okuwanifa po oilonga yavo. Ndele fimbo va li tava longo motembeli, omupristeri omukulunhu Hilkia okwa li a mona mo oshinima sha fimanenena. Osha li omushangwatonywa womhango oo Moses a li shanga palombwelo laJehova oule womido dihapu da pita. Owa li wa ninga oule womido dihapu uhe wetike.

Eshi omupristeri e u twala kuJosia, Josia okwa pula a leshelwe osho sha shangwa mo. Ndele eshi a pwilikina nawa, okwa li a mona kutya mboli oshiwana kasha li sha diinina eemhango daJehova. Josia okwa li a nyika oluhodi neenghono, nomolwaasho u wete ta pombaula po oikutu yaye mefano olo li li kolulyo. Okwa ti: ‘Jehova okwe tu handukila, molwaashi ootate inava diinina omhango yaye ei ya shangwa momushangwatonywa ou.’

Opo nee, Josia okwa lombwela omupristeri omukulunhu Hilkia a ka ude kutya Jehova ote ke va ningila shike. Hilkia okwa ya a ka pule ouyelele komuprofeti waJehova, omukainhu wedina Hulda. Omuprofeti oo okwa li a pa Hilkia etumwalaka laJehova e li twale kuJosia, tali ti: ‘Jerusalem noshiwana ashishe otashi ka handukilwa, molwaashi ova kala tava longele oikalunga noshilongo ove shi yada owii. Ndele molwaashi ove, Josia, owa longa ouwa koshipala shange, ehandukilo olo itali uya manga u li momwenyo.’