Jesus ta velula ovanaudu

ESHI Jesus a kala ta endaenda kombada yedu, okwa kala ta velula ovanaudu. Onghundana i na sha noikumwifilonga oyo a longa oya li ye lihanena momikunda nosho yo moilando aishe. Ovanhu ova li va eta kuJesus oingudu, ovapofi, eembolo nosho yo ovanhu vahapu ovo va li tava vele nokwa li e va velula aveshe.

Konima yomido nhatu okudja eshi Jesus a ninginifwa kuJohannes omuninginifi, okwa li a lombwela ovayapostoli vaye kutya mafiku ota ka ya kuJerusalem nota ka dipawa, ndele ota ka nyumuka koufi. Ndele fimbo osho inashi ningwa, Jesus okwa kala ta velula ovanaudu.

Efiku limwe, Jesus okwa li ta hongo ovanhu mefiku lEshabata. Eshabata ola li efiku lOvajuda lokutulumukwa. Omukainhu oo u wete mefano omo, okwa kala ta vele neenghono oule womido 18. Okwa li ha ende a petama noka li ha dulu okukala ofika a yukilila. Onghee hano, Jesus okwa li a tenheka omake kombada yaye, nomukainhu okwa li a veluka nokwa yukilila.

Ovawiliki velongelokalunga lOshijuda ova li va handuka eshi Jesus a velula omunaudu mefiku lEshabata. Umwe womuvo okwa ingida ta lombwele ongudu yovanhu ta ti: ‘Ope na omafiku ahamano oilonga, ileni hano mu velulwe momafiku oo, ndele hamEshabata!’

Ndele Jesus okwe va nyamukula a ti: ‘Ovakolokoshi nye, mbela kape na nande umwe womunye ha pitifa mo ondongi yaye moshiunda, ndele te ke i xwiila mefiku lEshabata? Ndele mbela ongahelipi shi na sha nomukainhu ou a kala ta vele omido 18, ye ke na okuvelulwa mefiku lEshabata?’ Enyamukulo laJesus ola li la fifa ohoni ovalumenhu ovo ovakolokoshi.

Konima yefimbo, Jesus novayapostoli vaye ova li molweendo tava i kuJerusalem. Eshi va dja moshilando shaJeriko, ovapofi vavali ovaeheli ova li va uda kutya Jesus ota ende popepi navo. Onghee hano, ova ingida tava ti: ‘Jesus, tu kwafela!’

Jesus okwa ifana ovapofi ovo ve uye kuye, ndele te va pula ta ti: ‘Omwa hala ndi mu ningile shike?’ Vo ova tya kuye: ‘Omwene, otwa hala u pashule omesho etu.’ Jesus okwa kuma omesho avo nova li va hovela okumona ko pefimbo opo tuu opo. Mbela ou shi shii kutya omolwashike Jesus a li ta longo oikumwifilonga aishe oyo? Omolwaashi Jesus oku hole ovanhu nokwa hala va kale va itavela muye. Otu na oushili kutya eshi ta ka pangela e li ohamba, kape na nande omunhu ta ka vela vali kombada yedu.