Etukulwa 4

Okakadona ka ninga oufimba ndele inaka hombolwa

MARIA okwa li e na oufimba weemwedi nhatu. Dimbuluka kutya okwa li a menekela keumbo looElisabet oule weemwedi nhatu eshi opo a ningi oufimba, ndele paife okwa alukila keumbo kuNasaret. Ovanhu aveshe momukunda wavo ova li tave ke shi didilika mo diva kutya Maria omufimba. Okwa li shili e li monghalo inyikifa oluhodi!

Osho sha li sha ningifa onghalo yaMaria i kale ii unene oshosho kutya okwa li a valekwa a ka hombolwe po komuhongi woipilangi Josef. Maria okwa li e shi shii kutya pamhango yaKalunga oyo a li a pa Ovaisrael, omukainhu oo a valekwa komulumenhu ndele ta nangala owina nomulumenhu umwe okwa li e na okudipawa nomamanya. Mbela Maria okwa li ta ka yelifila Josef ngahelipi shi na sha noufimba waye?

Molwaashi Maria okwa li a dja po oule weemwedi nhatu, osha yela kutya Josef okwa li a halelela oku mu mona eshi a aluka. Eshi va monafana, osha yela kutya Maria okwa li e mu lombwela kombinga youfimba oo e na. Otashi dulika a li a kendabala ngaashi ta dulu oku mu yelifila kutya okwa ninga oufimba kekwafo lomhepo iyapuki yaKalunga. Ndele osha yela kutya oshinima osho osha li shidjuu kuJosef oku shi itavela.

Josef okwa li e shii kutya Maria iha longo owii, nosha yela kutya okwa li e mu hole neenghono. Ndele nande Maria okwa li a yelifila Josef, Josef otashi dulika okwa li ta diladila kutya Maria oku na oufimba womulumenhu wonhumba. Ashike nande ongaho, Josef ka li a hala Maria a dipawe nomamanya ile e mu fife ohoni moipafi yovanhu. Nomolwaasho, Josef okwa li a tokola oku mu henga po meholeko. Pefimbo lavo, ovanhu ovo va valekwa ova li hava talwa ko va hombolwa, nova li ve na okuhengafana opo va xulife po evalekafano olo.

Konima yefimbo, eshi Josef a li ta diladila natango kombinga yoshiningwanima osho, okwa ka kofa. Omweengeli waJehova okwa li e mu holokela mondjodi, ndele ta ti: “Ino tila okweeta kuove Maria, omukainhu woye, osheshi oufimba ou e u kwete [owomhepo iyapuki]. Ndele ye ota ka dala okamati, ndee to ke mu luka JESUS, osheshi Oye ta ka xupifa oshiwana shaye momatimba asho.”

Eshi Josef a penduka, okwa li a hafa neenghono. Okwa li a ninga diva ngaashi omweengeli e mu lombwela. Okwa li a eta Maria keumbo laye, nokuninga ngaho moipafi osha li onghedi yokuhombola oyo ya li ya tambulwa ko, tashi ulike kutya Josef naMaria ova hombola paveta. Ndele Josef ka li a nangala naMaria fimbo a li e na oufimba.

Nonande Maria okwa li e na eteelelo la kula, Josef okwa li e mu londeka kondongi. Mbela ova li tava i peni, nomolwashike va li tava i molweendo pefimbo opo Maria a li e li pokumona okaana? Lukas 1:39-41, 56; Mateus 1:18-25; Deuteronomion 22:23, 24.

▪ Josef okwa li e udite ngahelipi eshi a li a uda kutya Maria omufimba, nomolwashike a li e udite ngaho?

▪ Omolwashike taku tiwa kutya Josef okwa li a hala okuhenga po Maria nonande kava li va hombola natango?

▪ Oshike Josef naMaria va li va ninga moipafi opo va ulike kutya ova hombola?