Etukulwa 6
Okudalwa kwokaana oko ka li ka udanekwa
JOSEF naMaria kava li va shuna kuNasaret, ndele ova li ashike va kala muBetlehem. Eshi Jesus a wanifa omafiku ahetatu, ova li ve mu pitifa etanda ngaashi sha li hashi ningwa paMhango yaKalunga oyo a li a pa oshiwana shaye okupitila muMoses. Ovajuda ova li yo ve na onghedindjikilile yokuluka okahanana kokamati mefiku etihetatu okudja pedalo lako. Onghee hano, Josef naMaria ova li va luka okaana kavo edina Jesus, ngaashi naanaa omweengeli Gabriel a li e va lombwela.
Konima yomwedi umwe, eshi Jesus a li a wanifa omafiku 40, mbela ovadali vaye ova li ve mu twala peni? Ova li ve mu twala kotembeli kuJerusalem, oyo ya li ashike eekilometa dinini okudja moshilando shambulavo. Omhango yaKalunga oyo a li a pa oshiwana shaye okupitila muMoses oya li ya ufa kutya ngeenge opa piti omafiku 40 okudja eshi omukainhu a dala okaana kokamati, omukainhu okwa li e na oku ka ninga eyambo lelifetifo kotembeli.
Maria osho naanaa a li a ninga ngaho. Maria okwa li a twala oudila vavali vanini ovo va ka ninge eyambo laye. Osho otashi ulike kutya Josef naMaria ova li ve na ouxupilo wa tya ngahelipi. Omhango yaMoses oya li ya ufa kutya omunhu oku na okuyamba odi yonyasha, oyo ya li i na ongushu i dule youdila. Ndele ngeenge omudalakadi ke na odi, okwa li e na okuyandja omalyamono avali ile ounghutyona vavali.
Eshi Maria naJosef va li va ya kotembeli naJesus, omulumenhu umwe omunamido, wedina Simeon, okwa li a ukata Jesus. Jehova okwa li a lombwela Simeon kutya ita fi fimbo i na mona Kristus ile Messias waJehova oo a li a udanekwa. Eshi Simeon a li e uya kotembeli efiku olo, omhepo iyapuki oya li ye mu wilika a ye kokaana oko ka li ke li naJosef naMaria.
Eshi Simeon a li a ukata Jesus, okwa li a pandula Kalunga a ti: “Omwene, paife oto lekele omupiya woye, a ye nombili ngaashi wa tile, osheshi omesho ange a mona exupifo loye, we li longa moipafi yoiwana aishe, ouyelele okuminikila ovapaani nefimano loshiwana shoye Israel.”
Josef naMaria ova li va kumwa eshi va uda eendjovo odo. Simeon okwa li e va nangeka noupuna ndele ta lombwele Maria kutya omonamati waye “okwa tulwa po okupundula nokuyambula vahapu vomuIsrael,” nonokutya Maria ota ka kala a nyika oluhodi a fa a tuwa neongamukonda momutima waye.
Efiku olo omukainhu omuprofeti wedina Hanna oo a li e na omido 84 naye okwa li yo e uya kotembeli. Hanna ka li ha faula kotembeli. Hanna naye okwa li e uya kuJesus nokwa li a hambelela Kalunga. Hanna okwa ka kala yo ta lombwele ovanhu aveshe ovo va li tava pwilikine kuye shi na sha naJesus.
Josef naMaria kava li tuu va hafa omolwoiningwanima aishe oyo ya li ya ningwa po kotembeli! Oiningwanima aishe oyo oya li ye va shilipaleka kutya omonamati wavo oye shili Omuudanekwa waKalunga. Lukas 2:21-38; Leviticus 12:1-8.
▪ Panghedindjikile yOvaisrael, ovanamati vavo ova li hava lukwa omadina naini?
▪ Omudalakadi Omuisrael okwa li e na okuninga shike ngeenge okamonamati kaye oka wanifa omafiku 40, nonghedi omo Maria a li a wanifa po oshiteelelwa osho otai ulike shike shi na sha nouxupilo waye?
▪ Oolyelye va li va didilika mo Jesus, nova li ve shi ulika ngahelipi?