Etukulwa 11
Johannes ta longekidile Jesus ondjila
PAIFE opa pita omido 17 okudja eshi Jesus a li e na omido 12, eshi a li motembeli ta pula ovahongi omapulo. Osha li oitemadula yomomudo 29 O. P., novanhu ova li tava popi shi na sha namhedi yaJesus, Johannes, oo a li ta udifa moshitukulwa ashishe osho sha dingilila omulonga waJordan.
Johannes okwa li omulumenhu mukumwifi meholokepo laye nosho yo mokupopya kwaye. Johannes okwa li ha djala oshikutu sholududi longamelo, nekwamo loshipa moshiya shaye. Okwa li ha li oshipaxu nomaadi eenyiki. Mbela okwa li ha udifa kombinga yashike? Okwa li ha udifa ta ti: “Lidilululeni, osheshi ouhamba weulu we uya popepi.”
Etumwalaka laJohannes ola li hali hafifa ovapwilikini vaye, navahapu ova li ve lidilulula, sha hala okutya, va lundulula oikala yavo nova efa po onghedi yavo yokukalamwenyo yonale. Ovanhu vahapu okudja koitukulwa aishe oyo ya dingilila Jordan nosho yo okudja kuJerusalem, ova li ve uya kuJohannes nokwa li e va ninginifa, e va tula koshi yomeva momulonga waJordan. Omolwashike mbela ovanhu va li ve uya okuninginifwa?
Johannes okwa li ha ninginifa ovanhu opo va ulike kutya ove livela shili ombedi eshi va nyona ehangano lOmhango yaKalunga. Onghee hano, eshi Ovafarisai nOvasadukai vamwe va li ve uya komulonga waJordan, Johannes okwa li e va ula a ti: “Oludalo lomauta nye, . . . imeni hano oiimati ya wapalela elidilululo, nye inamu diladila, otamu dulu okulitongela munye vene mu tye: Otu na tate yetu Abraham. Osheshi ame ohandi mu lombwele, Kalunga ota dulu okushitila Abraham ounona momamanya aa. Ndelenee ekuva ola tulwa nokuli kefina lomiti; hano keshe tuu omuti ihau ima oiimati iwa, otau kewa po ndee tau ekelwa momundilo.”
Molwaashi ovanhu vahapu ova li va yandja elitulemo kuJohannes, Ovajuda ova li va tuma kuye ovapristeri nOvalevi ve ke mu pule tava ti: ‘Oove lyelye?’
Johannes okwa li a nyamukula a ti: “Aame haame Kristus.”
Ovapristeri nOvalevi ova li ve mu pula natango tava ti: ‘Oove lyelye hano? Oove Elia?’
Ye okwa tya: “Haame.”
Vo ova tya vali, “Oove omuprofeti?”
Ye okwa tya: “Ahowe.”
Opo nee vo ove mu kondjifa tava ti: ‘Oove lyelye hano, tu ka twale enyamukulo kuava ve tu tuma. Ove mwene oto liti ngahelipi?’
Johannes okwa li e va yelifila a ti: “Aame ondaka yomwiingidi mombuwa: yelakanifileni Omwene ondjila, ngaashi omuprofeti Jesaja a tile.”
Ndele molwaashi ova li va hala okushiiva, ova li ve mu pula va ti: Oshike hano ho [ninginifa, NW ], ove ngenge ku fi Kristus, ile omuprofeti winya?”
Johannes okwa li e va nyamukula a ti: “Ohandi [ninginifa, NW ] nomeva, ndelenee mokati keni omwa kala ofika ou mu he mu shii. Oye tuu ou te uya konima yange.”
Johannes okwa li ta longekida ondjila eshi a li ta kwafele ovanhu va kale ve na oikala yomutima ya yuka, opo va dule okutambula ko Messias, oo a li ta ka ninga Ohamba. Johannes okwa li a popya shi na sha naMessias a ti: “Ou ta di konima yange, e dule nge eenghono, ame inandi wana nande oku mu humbatela eenghaku daye.” Johannes okwa li yo a popya a ti: “Ou te uya konima yange, ye okwa li komesho yange, osheshi Ye opo a li, fimbo ame ndi ha li po.”
Kungaho, etumwalaka laJohannes olo kutya “Ouhamba weulu we uya popepi,” ola li euliko kovanhu kutya Jesus Kristus oo e li Ohamba ya nangekwa po kuJehova, okwa li e li pokuhovela oukalele waye. Johannes 1:6-8, 15-28; Mateus 3:1-12; Lukas 3:1-18; Oilonga 19:4.
▪ Johannes okwa li omunhu a tya ngahelipi?
▪ Omolwashike Johannes a li ha ninginifa ovanhu?
▪ Omolwashike Johannes a li a popya kutya Ouhamba owa ehena popepi?