Etukulwa 12

Jesus ta ninginifwa

EEMWEDI hamano lwaapo okudja eshi Johannes a hovela okuudifa, Jesus okwa li e uya kuye kuJordan eshi a li e na omido 30. Omolwashike mbela Jesus a li a ya kuJohannes? Mbela okwa li e ke mu talela po? Ile mbela Jesus okwa li ashike a hokwa okutala nghee oilonga yaJohannes ya li tai xumu komesho? Ahowe, Jesus okwa li a pula Johannes e mu ninginife.

Johannes okwa li ta anye okuninginifa Jesus, ta ti: “Ame onda pumbwa [okuninginifwa, NW ] kuove, ndelenee ove to uya kuame!” Johannes okwa li e shii kutya mhedi yaye Jesus oku li Omona waKalunga e likalekelwa. Johannes okwa li a nhuka kehafo eshi a li medimo laina, eshi Elisabet a li a talelwa po kuMaria oo a li mufimba. Osha yela kutya Elisabet, ina yaJohannes, okwa li e mu lombwela kombinga yaasho. Elisabet okwa li yo e mu lombwela kombinga yomweengeli oo a li a popya shi na sha nokudalwa kwaJesus nosho yo yovaengeli ovo va li va holokela ovafita moufiku oo Jesus a li a dalwa.

Hano osha yela kutya Johannes okwa li e shii Jesus. Johannes okwa li yo e shi shii kutya eninginifo olo a li ha ninginifa ovanhu kala li li na sha naJesus. Eninginifo laJohannes ola li lovanhu ovo va li ve livela ombedi komatimba avo, ashike Jesus ka li e na omatimba. Ndele nonande Johannes okwa li ta anye okuninginifa Jesus, Jesus okwa li e mu lombwela a mana mo a ti: “Itavela tuu nena, osheshi osho oshe tu palela okuwanifa ouyuki aushe.”

Omolwashike sha li sha yuka kuJesus okuninginifwa? Omolwaashi okuninginifwa kwaJesus okwa li edidiliko kutya okwe liyandja kuXe a longe ehalo laYe, ndele hamolwaashi a li e livela ombedi komanyono aye. Jesus okwa li omuhongi womiti, ndele pefimbo opo okwa li ta hovele oukalele waye oo Jehova Kalunga a li e mu tumina kombada yedu. Mbela oto diladila kutya Johannes okwa li a teelela pa ningwe oshinima shonhumba she likalekelwa eshi a li ta ninginifa Jesus?

Johannes okwa li a popya konima yaasho a ti: “Ou a tuma nge [okuninginifa, NW ] nomeva, ye okwa lombwela nge: Oye ou to mono Omhepo tai wile kombada yaye, ndee tai kala po, Oye tuu ou ta [ninginifa, NW ] nOmhepo Iyapuki.” Onghee hano, Johannes okwa li a teelela omhepo yaKalunga i uye kombada yomunhu wonhumba oo a li ta ka ninginifa. Nomolwaasho otashi dulika Johannes ka li a kumwa unene eshi a li a mona ‘omhepo yaKalunga ya fa onghuti ya kuluka ndele tai uya kombada’ yaJesus eshi a dja momeva.

Opa li pa ningwa shihapu eshi Jesus a ninginifwa. Ombibeli oya ti: ‘Eulu ola li la yeuluka.’ Osho osha hala okutya ngahelipi? Otashi ti kutya eshi Jesus a li a ninginifwa, okwa li a dimbuluka oinima i na sha nonghalamwenyo yaye yonale eshi a li meulu. Kungaho, Jesus okwa li a dimbuluka filufilu onghalamwenyo yaye eshi a li omona waJehova Kalunga wopamhepo, mwa kwatelwa oinima aishe oyo Kalunga a li e mu lombwela fimbo a li meulu.

Natango, eshi Jesus a li a ninginifwa, opa li pa udika ondaka ya dja meulu tai ti: “Ou Omona wange omuholike, onde mu hokwa.” Ondaka oyo mbela oya li yalyelye? Mbela oya li yaJesus? Hasho nandenande! Oya li ondaka yaKalunga. Hano osha yela kutya Jesus Omona waKalunga, ndele ke fi Kalunga ngaashi ovanhu vamwe hava ti.

Jesus omona waKalunga wopanhu, ngaashi sha li omunhu wotete, Adam. Konima eshi omuhongwa Lukas a li a hokolola kombinga yokuninginifwa kwaJesus, okwa ti: ‘Ndele Jesus eshi a hovela oshilonga shaye, omido daye oda li di fike pomilongo itatu; okwa li ngaashi kwa tengenekwa, omona waJosef waEeli, waDavid, waAbraham, waNoa, waAdam nowaKalunga.’

Ngaashi ashike Adam a li “Omona waKalunga” wopanhu, Jesus naye osho a li ngaho. Jesus oye omunhu munenenene oo a li ko nale, naasho ohatu ke shi mona ngeenge otwa konakona onghalamwenyo yaye. Ndele eshi Jesus a li a ninginifwa, okwa li a hovela okukala e na ekwatafano lipe naKalunga, a ninga yo Omona waKalunga wopamhepo. Kungaho, Kalunga okwa li e mu alulila meulu, oku shi popya pafaneko, moku mu endifa mondjila oyo ya li tai mu twala kokuyandja omwenyo waye wopanhu fiyo alushe u ninge eyambo lovanhu ovalunde. Mateus 3:13-17; Lukas 3:21-38; 1:34-36, 44; 2:10-14; Johannes 1:32-34; Ovaheberi 10:5-9.

▪ Omolwashike Johannes a li e shii Jesus?

▪ Omolwashike Jesus a li a ninginifwa, nonande ina nyona sha?

▪ Okutala kwaasho Johannes a li e shii kombinga yaJesus, omolwashike tashi dulika Johannes a li ina kumwa eshi omhepo yaKalunga ya li ye uya kombada yaJesus?