Etukulwa 13

Lihonga oshilihongomwa momayeleko oo Jesus a li a yelekwa nao

DIVA eshi Jesus a ninginifwa, okwa li a twalwa komhepo yaKalunga mombuwa yaJudea. Jesus okwa li e na oinima ihapu okudilonga, molwaashi peninginifo laye, ‘eulu ola li la yeuluka,’ opo a dule okudimbuluka oinima yomeulu. Onghee hano, osha yela kutya Jesus okwa li e na oinima ihapu okudilonga.

Jesus okwa li a kala oule womafiku 40 mombuwa, noka li a lya sha oule womafiku aeshe oo. Opo nee, eshi Jesus a li a fya ondjala neenghono, Ondiaboli oya li ye uya kuye i mu yeleke, tai ti: ‘Ove ngeenge Omona waKalunga, lombwela hano omamanya aa a shituke omingome.’ Ndele Jesus okwa li e shi shii kutya osha puka okulongifa eenghono daye pashikumwifilonga opo a wanife po omahalo aye opaumwene. Onghee hano, okwa li a anya eyeleko olo.

Ashike Ondiaboli kaya li ya sholola okuyeleka Jesus, oya li ya kendabala oku mu yeleka vali monghedi imwe. Ondiaboli oya li ya lombwela Jesus a nuke kombada yotembeli opo ovaengeli vaKalunga ve mu amene. Ashike Jesus ka li a ninga oshinima sha tya ngaho opo a ninge omalitalifa. Jesus okwa li a tofa mOmishangwa opo a ulike kutya osha puka okuyeleka Kalunga monghedi ya tya ngaho.

Ondiaboli oya li vali ya yeleka Jesus oshikando oshititatu, ya li ye mu ulikila omauhamba aeshe omounyuni monghedi yonhumba yopashikumwifilonga, ndele tai ti: “Aishe ei ohandi i ku pe, ngenge to twile nge eengolo ndee to linyongamene nge.” Pomhito opo, Jesus okwa li a anya natango okuliyandja keyeleko la tya ngaho mokukala omudiinini kuKalunga.

Ohatu dulu okulihonga mo oshilihongomwa momayeleko oo Jesus a li a yelekwa nao. Pashihopaenenwa, omayeleko oo otaa ulike kutya Ondiaboli kai fi ashike oukwatya wonhumba wongaho, ngaashi ovanhu vamwe hava ti, ndele oi li omunhu wolela iha monika. Eyeleko olo Jesus a li a yelekwa nalo li na sha nokupewa omauhamba otali ulike kutya omapangelo aeshe omounyuni oku li mepangelo lOndiaboli. Ngeno omapangelo aeshe kaa li shili mepangelo lOndiaboli, ngeno osho inashi kala eyeleko kuJesus.

Diladila yo shi na sha naashi: Ondiaboli oya li ya popya kutya oya hala okupa Jesus ondjabi ngeenge okwe i twile eengolo lumwe, noku mu pa nokuli omauhamba aeshe omounyuni. Ondiaboli otashi dulika i kendabale oku tu yeleka monghedi ya faafana, tashi dulika i tu hokwife moku tu pa eemhito dokumona oupuna mounyuni, etumba nosho yo eendodo. Onghee hano, oshi li pandunge okulandula oshihopaenenwa shaJesus mokukala ovadiinini kuKalunga, kashi na nee mbudi kutya ohatu shakeneke omayeleko a tya ngahelipi. Mateus 3:16; 4:1-11; Markus 1:12, 13; Lukas 4:1-13.

▪ Jesus otashi dulika a li ta dilonga kombinga yashike eshi a li mombuwa oule womafiku 40?

▪ Ondiaboli oya li ya kendabala okuyeleka Jesus ngahelipi?

▪ Oshike hatu dulu okulihonga momayeleko oo Jesus a li a yelekwa nao?