Etukulwa 28
Jesus ta pulwa shi na sha nokulidilika oikulya
OPA li pa pita omudo umwe lwaapo, okudja eshi Jesus a li a ya kOpaasa yomo 30 O.P. Pefimbo opo Johannes Omuninginifi okwa hangwa a kala modolongo oule weemwedi dihapu. Nonande Johannes okwa li a hala ovahongwa vaye va ninge ovahongwa vaKristus, haaveshe va li va ninga ovahongwa vaye.
Ovahongwa vamwe vaJohannes oo a li e li modolongo ova li va ya kuJesus ndele tave mu pula tava ti: “Ofye novafarisai luhapu ohatu lidilike oikulya; oshike ovalongwa voye ihave lidilike?” Ovafarisai ova li have lidilike luvali moshivike, shi li onghedindjikilile yelongelokalunga lavo. Otashi dulika yo ovahongwa vaJohannes navo va li hava shikula onghedindjikilile oyo. Otashi dulika yo va li have lidilike opo va ulike kutya ova nyika oluhodi eshi Johannes e li modolongo, nova li va kumwa kutya omolwashike ovahongwa vaJesus vo ihave lidilike opo navo yo va ulike kutya ova nyika oluhodi.
Jesus okwa li e va nyamukula a ti: ‘Ookaume komuhomboli otava shiiva ngahelipi okunyika oluhodi fimbo omuhomboli e li puvo? Ndele omafiku tae uya, omuhomboli te va kufwa, opo nee otave lidilike oikulya.’
Ovahongwa vaJohannes ova li ve na okudimbuluka osho Johannes a li e va lombwela kutya Jesus oku li ngaashi Omuhomboli. Onghee hano, molwaashi Jesus opo a li, Johannes okwa li e wete kutya inashi wapala kuye okulidilika oikulya. Hano osha yela kutya novahongwa vaJesus kava li ve na okulidilika oikulya. Konima yefimbo, ngeenge Jesus a fi, ovahongwa vaye ova li tava ka lila nokulidilika oikulya. Ndele ngeenge okwa nyumuka nokuya meulu, kava li vali ve na okulidilika omolwokunyika oluhodi.
Jesus okwa li e va lombwela omafaneko a ti: “Ndele kaku na ou ta vandeke oshikutu shikulu noshivando shipe, osheshi oshivando sha tya ngaha otashi pombaula oshikutu, nombululu otai ningi inene i dule yonale. [Nomaviinyu] mape ihaa dilwa momakutu makulu; osheshi omakutu otaa tauka, nomaviinyu taa tika mo, nomakutu otaa nyonauka po; ndele omaviinyu mape ohaa dilwa momakutu mape.” Mbela omafaneko oo okwa li ngoo e na ekwatafano lasha nokulidilika oikulya?
Jesus okwa li ta kwafele ovahongwa vaJohannes Omuninginifi va ude ko kutya kape na omunhu e na okuteelela ovashikuli vaye va kale va kanyatela keenghulunghedi donale dOshijuda, ngaashi okulidilika oikulya. Jesus ka li e uya okuxumifa komesho eenghedindjikilile donale delongelokalunga odo da li di li pokuxula po. Ovakriste kava li ve na okukala va kanyatela komahongo Oshijuda oo a li a kanghamena keenghulunghedi dopanhu. Onghee hano, itava ka kala va fa oshikutu shikulu sha vandekwa noshivando shipe ile omaviinyu mape e li mekutu likulu. Mateus 9:14-17; Markus 2:18-22; Lukas 5:33-39; Johannes 3:27-29.
▪ Oolyelye va li have lidilike oikulya, nomolwashike?
▪ Omolwashike ovahongwa vaJesus va li vehe na okukala tave lidilike ngeenge oku li puvo, nomolwashike yo va li itava ka kala tave lidilike konima yefimbo?
▪ Jesus okwa li a hokolola omafaneko e na sha nashike, notaa ti shike?