Etukulwa 30

Jesus ta nyamukula ovapataneki vaye

ESHI ovawiliki vomalongelokalunga Oshijuda va li tava ti kutya Jesus okwa nyona Eshabata, okwa li e va nyamukula a ti: “Tate ta longo fiyo paife, naame yo handi longo.”

Nonande Ovafarisai ova li tava ti kutya Jesus okwa nyona Eshabata, Jesus ka li a ninga oshinima osho sha dilikwa komhango yEshabata. Oilonga yokuudifa noyokuvelula oyo Jesus a li ha longo okwa li e i pewa kuKalunga nokwa kala he i longo efiku keshe ngaashi Kalunga ha longo oilonga yaye efiku keshe. Enyamukulo laJesus ola li la handukifa unene Ovajuda ovo shi dulife nale nova li va hala oku mu dipaa. Omolwashike mbela?

Omolwaashi ova li tava diladila kutya kakele kokunyona Eshabata, Jesus okwa li yo a sheka Kalunga eshi a li te liti kutya oye Omona waKalunga. Ndele nande ongaho, Jesus ka li a tila nokwa li a twikila oku va lombwela shi na sha nekwatafano liwa olo li li pokati kaye naKalunga. Jesus okwa ti: “Osheshi Xe e hole Omona, ndele te mu ulikile aishe ei Oye mwene te i longo.”

Jesus okwa li yo e va lombwela a ti: “Osheshi ngaashi Xe ta nyumuna ovafi, ndele te va ningi vali ovanamwenyo, osho tuu nOmona yo ta ningi ovanamwenyo ava a hala.” Omona okwa li nokuli ta nyumuna nale ovanhu ovo va fya pamhepo. Jesus okwa ti: “Ou ta udu eendjovo dange, nota itavele ou a tuma nge, . . . okwa dja mo mefyo, ndele e uya momwenyo.” Opo nee okwa li a twikila ko a ti: “Efimbo tali uya, ndele opo li li paife, ovafi tava udu ondaka yOmona waKalunga, naava tave i udu, otava kala ve nomwenyo.”

Nonande mOmbibeli kamu na ouyelele oo tau ulike kutya pefimbo opo Jesus a li a popya eendjovo odo okwa hangwa a nyumuna omunhu koufi, okwa li a lombwela ovapataneki vaye kutya ovanhu otava ka nyumunwa. Okwa ti: “Inamu shi kuminwa, osheshi efimbo tali uya, opo aveshe ava va kala meembila otava udu ondaka yaye. Ndee tava holoka mo.”

Jesus ka li nande onale a hokolola moipafi yovanhu shi na sha nonghandangala ya fimanenena oyo ta dana mokuwanifwa kwelalakano laKalunga monghedi ya yela noyokondadalunde ngaashi pomhito oyo. Ashike ovapataneki vaJesus ova li ve na oumbangi muhapu u na sha naasho uhe fi ashike oo Jesus a li e va pa. Jesus okwa li e va dimbulukifa a ti: “Onye mwa [tumine kuJohannes, OB-1986] ndele ye okwa hepaulula oshili.”

Opa li ashike pa pita omido mbali okudja eshi Johannes Omuninginifi a li a lombwela ovawiliki velongelokalunga lOshijuda kombinga yaao a li te ke uya konima yaye. Jesus okwa li yo e va dimbulukifa kutya ova li va fimaneka neenghono Johannes oo pomhito oyo a li a tulwa modolongo, a ti: “Onye mwa hala okunyakukwa okafimbo kaxupi mouyelele waye.” Jesus okwa li e va dimbulukifa oshinima osho opo ngeno e va kwafele, va dule oku ka xupifwa, ndele ka li ta yandje oundombwedi u na sha naJohannes.

Jesus okwa ti: “Oilonga tuu ei handi longo [mwa kwatelwa oshikumwifilonga osho opo a li a longo], oyo tuu tai hepaulula nge nokutya, Tate okwa tuma nge.” Jesus okwa li yo a twikila ko a ti: “Ndele Tate ou a tuma nge, Ye okwa hepaulula nge.” Kalunga okwa li a yandja oundombwedi shi na sha naJesus, pashihopaenenwa, eshi Jesus a li a ninginifwa, Kalunga okwa li a popya a ti: “Ou Omona wange omuholike, onde mu hokwa.”

Ovapataneki vaJesus kava li ve na elipopilo kutya omolwashike va li inave mu itavela. Omishangwa odo tava ti kutya odo hava lesha odo tadi yandje oumbangi shi na sha naye. Lwopexulilo, Jesus okwa li a popya a ti: “Ndelenee ngeno mwa itavela Moses, ngeno mwa itavela nge yo osheshi Ame tuu ou nda shangwa kuye. Ndelenee fimbo inamu itavela omishangwa daye, otamu itavele ngahelipi eendjovo dange?” Johannes 5:17-47; 1:19-27; Mateus 3:17.

▪ Omolwashike oilonga oyo Jesus a li a longa itai nyono Eshabata?

▪ Jesus okwa li a hokolola ngahelipi onghandangala ya fimanenena oyo ta dana mokuwanifwa kwelalakano laKalunga?

▪ Jesus okwa li popya kombinga youndombwedi walyelye opo a ulike kutya ye Omona waKalunga?