Etukulwa 31

Ovahongwa vaJesus tava shoshona oilya mEshabata

DIVA Jesus novahongwa vaye ova li va dja mo muJerusalem tava shuna kuGalilea. Pefimbo opo, oilya momapya oya li ya pya. Ovahongwa vaJesus ova li va fya ondjala, onghee hano, ova li va hovela okushoshona oilya ndele tava li. Ndele molwaashi efiku olo ola li efiku lEshabata, ovanhu ova li ve va wete eshi tava shoshona.

Ovawiliki vomalongelokalunga muJerusalem ova li va kendabala nale okudipaa Jesus molwaashi ova li tava ti kutya okwa nyona Eshabata. Ndele pefimbo opo Ovafarisai ova li tava lundile ovahongwa vaJesus tava ti: “Tala ovalongwa [voye] otava ningi eshi sha kelelwa okuningwa efiku leshabata.”

Ovafarisai ova li tava ti kutya okukufa omitwe doilya noku di shoshona osha faafana nokuteya nosho yo okuxwa. Ndele okufatulula kwavo kwa kwata moiti kutya oilonga ilipi i na okulongwa mEshabata, okwa li kwa ningifa Eshabata li kale omutengi kovanhu, nonande ola li la nuninwa okweetela ovanhu ehafo nokukala tava tungafana pamhepo. Onghee hano, Jesus okwa li a tumbula oihopaenenwa yonhumba yopamishangwa opo a ulike kutya Jehova Kalunga ka li a lalakanena ovanhu va kale tava tula moilonga omhango yaYe i na sha nEshabata monghedi ya kwata moiti.

Jesus okwa li e va lombwela shi na sha naDavid novakwaita vaye eshi va li va fya ondjala ndele tava i metwali nokulya omingome detaliko. Omingome odo oda li da hangwa nale da kufwa ko koshipala shaJehova, ndele tadi pingenwa po naado dipe, ashike oda li ashike hadi liwa po kovapristeri. Ndele nande ongaho, David novakwaita vaye kava li va tokolwa eshi va lya omingome odo omolweenghalo odo va li mudo.

Jesus okwa li vali a yandja oshihopaenenwa shimwe, a ti: “Ile inamu lesha momhango, ovapristeri nhumbi tava nyono oshipango sheshabata fimbo ve li motembeli, vo inava velwa ombedi?” Ovapristeri ova li nokuli hava dipaa oinamwenyo mefiku lEshabata nokulonga oilonga imwe kotembeli opo va longekide omayambo oinamwenyo. Jesus okwa ti: “Ndele ohandi mu lombwele: Ou e li apa, oye e dule otembeli.”

Jesus okwa li vali a kumaida Ovafarisai a ti: “Ndelenee ngeno mu shiive eshi oshike. Efilonghenda nda hala, haeyambo, ngeno inamu tokola ava inava nyona sha.” Opo nee, okwa li a xulifa a ti: “Osheshi Omona wOmunhu Oye omwene weshabata.” Jesus okwa li a hala okutya shike eshi a popya eendjovo odo? Jesus okwa li ta popi kombinga yOuhamba waye wombili eshi ta ka pangela omido eyovi.

Ovanhu ova kala tava mono oixuna koupika waSatana Ondiaboli oule womido 6 000 paife, oo wa kwatela mo elongifo leenghono nosho yo oita yakeshe efiku. Ndele mepingafano naasho, pefimbo lEshabata linene lepangelo laKristus, ovanhu otava ka kala va tulumukwa molwaashi itapa ka kala vali okumona oixuna kwa tya ngaho. Mateus 12:1-8; Leviticus 24:5-9; 1 Samuel 21:1-6; Numeri 28:9; Hosea 6:6.

▪ Ovahongwa vaJesus ova li va lundilwa ngahelipi, na Jesus okwa li a nyamukula ngahelipi omalundilo oo?

▪ Jesus okwa li a nyaneka pomutenya ounghundi wOvafarisai ulipi?

▪ Omonghedi ilipi Jesus e li “omwene weshabata”?