Etukulwa 36

Omukulunhu wetangakwaita laRoma oo a li e na eitavelo linene

ESHI Jesus a li ta udifa Eudifo laye lokomhunda, okwa li ashike e na ko omudo umwe neemwedi omuwoi lwaapo opo a mane oilonga yaye oyo a li e uya okulonga kombada yedu, sha hala okutya, okwa li ashike kwa fyaala etatafimbo lwaapo opo a wanife po oukalele waye womoipafi.

Okudja opo Jesus okwa li a ya kuKapernaum, oko a li ha udifile unene. Fimbo a li muKapernaum, ovakulunhu vOvajuda ova li ve uya kuye ve mu pule ekwafo. Ova li va tumwa komukulunhu wetangakwaita laRoma oo a li ehe fi Omujuda.

Omupiya umwe womukulunhu wetangakwaita laRoma okwa li ta vele unene nokwa li e li pokufya, onghee omukulunhu wetangakwaita okwa li a hala Jesus a velule omupiya waye. Ovajuda ovo ova li va pula Jesus ekwafo ponhele yomukulunhu wetangakwaita oo, va ti: “Okwa wana okukwafwa kuove. Osheshi oku hole oshiwana shetu ndele okwe tu tungila oshinagoga.”

Nopehe na okwoongaonga, Jesus okwa li a ya pamwe novalumenhu ovo. Ndele fimbo va li tava hale okufika, omukulunhu wetangakwaita okwa li a tuma kuJesus ookaume kaye ve ke mu lombwele tava ti: “Omwene, ino lihepeka, osheshi ame inandi wapala u uye meumbo lange. Onghee nde litala inandi wana ndi uye mwene kuove.”

Omukulunhu wetangakwaita oo ka li tuu omulininipiki nonande okwa li a ikilila okuyandja omalombwelo kovanhu! Otashi dulika yo a li te lipula shi na sha naJesus, molwaashi okwa li e shii kutya ope na onghedindjikilile oyo ya dilika Ovajuda vaha endafane novanhu ovo vehe fi Ovajuda. Petrus okwa tile nokuli: “Nye omu shi shii Omujuda okwa dilikwa okweendafana nomunailongo nokuya kuye.”

Omukulunhu wetangakwaita oo otashi dulika ka li a hala Jesus a ka mone oilanduliko ngeenge okwa nyono onghedindjikilile oyo yOvajuda, onghee okwa li a tuma kuye ookaume kaye ve ke mu lombwele kutya: “Tonga ashike ondjovo imwe, omupiya wange ta veluka. Osheshi naame yo omupangelwa, ndele ondi na ovakwaita mepangelo lange, ndele ohandi lombwele ou: Inda, ndele ta i, nomukwao: Ila, ndele te uya, nokomupiya wange: Shi longa, ndele te shi longo.”

Eshi Jesus a li a uda eendjovo odo, okwa li a kumwa, ndele ta ti: “Oshili handi mu lombwele: Movaisrael inandi mona nande umwe e neitavelo li fike [pwaa] li.” Konima eshi Jesus a li a velula omupiya womukulunhu wetangakwaita, okwa li a hokolola shi na sha nanghee ovanhu ovo vehe fi Ovajuda ndele ove na eitavelo tava ka pewa omanangeko noupuna oo a ekelwashi kOvajuda ovo vehe na eitavelo.

Jesus okwa ti: “Otaku di vahapu koushilo nokouninginino, ndee tava ka lya pamwe naAbraham naIsak naJakob mouhamba womeulu; ndelenee ovana voshilongo otava ka ekelwa momilaulu dopondjelela; omo tamu ka kala elilaano nelikweshelo lomayoo.”

‘Ovana voshilongo ovo tava ka ekelwa momilaulu dopondje elela,’ Ovajuda vopambelela ovo inava tambula ko omhito oyo va li va pewa tete va ka kale ovapangeli pamwe naKristus. Abraham, Isak naJakob otava faneke elongekido laKalunga li na sha nOuhamba. Onghee hano, Jesus okwa li ta popi shi na sha nanghee ovanhu ovo vehe fi Ovajuda tava ka mona omhito yoku ka kala omutumba poshitaafula shaye meulu, sha hala okutya, “mouhamba womeulu.” Lukas 7:1-10; Mateus 8:5-13; Oilonga 10:28.

▪ Omolwashike Ovajuda va li va ka pula ekwafo kuJesus ponhele yomukulunhu wetangakwaita oo a li ehe fi Omujuda?

▪ Omolwashike tashi dulika omukulunhu wetangakwaita a li ina ifana Jesus e uye keumbo laye?

▪ Jesus okwa li a hala okutya shike eshi a popya eendjovo daye daxuuninwa konima eshi a velula omupiya oo?