Etukulwa 37

Jesus ta hekeleke omufiyekadi oo a li a nyika oluhodi

KONIMA yefimbo lixupi okudja eshi Jesus a li a velula omupiya womukulunhu wetangakwaita laRoma, Jesus okwa li a ya kuNain, oshilando osho sha li eekilometa 32 lwaapo kouningininolukadi waKapernaum. Jesus okwa li a ya pamwe novahongwa vaye nosho yo eemhunga dovanhu. Peengaba daNain ova li va fika po efimbo lokomatango, nova li va shakena po novanhu va humbata oshimhu shomumati omunyasha tave ke shi paka kondje yoshilando.

Ina yomumati oo a fya okwa li e li monghalo inyikifa oluhodi neenghono, molwaashi okwa li omufiyekadi, nomumati oo okwa li ewifa laye. Eshi omushamane waye a fya, okwa li a hekelekwa molwaashi okwa li a fyaala po nomonamati waye. Omukainhu oo okwa li e na elineekelo kutya omonamati waye ota ka kala ekwafo linene kuye monakwiiwa. Ndele eshi omonamati waye a fya, kapa li va li pe na oo te mu hekeleke. Okwa li a nyika oluhodi neenghono eshi ovanhu vomoshilando shavo va li tava i pamwe naye va ka pake omonamati waye.

Eshi Jesus a mona omukainhu oo, omutima waye owa li wa kumwa koluhodi linene lomukainhu oo nokwa li a hala oku mu kwafela. Onghee hano, Jesus okwa li a popya nomukainhu oo neyavelelo nonomufindo, a ti: “Ino lila.” Onghedi omo Jesus a li a ungaunga nomukainhu oo oya li ye linyengifa eemhunga dovanhu odo da li po di yandje elitulemo kuye. Eshi Jesus a li a ehena popepi ndele ta kwata kolutala oko kwa li kwa humbatwa oshimhu, ovanhu ovo va li va humbata oshimhu ova li va kanghama. Ovanhu aveshe ova li va kumwa tave lipula kutya Jesus ota ka ninga po shike.

Ovo va li va enda pamwe naJesus ova li va mona nghee a velula ovanhu vahapu pashikumwifilonga, ndele inava mona nale a nyumuna omunhu. Mbela Jesus ota dulu ngoo okunyumuna omunhu? Jesus okwa li a lombwela omumati oo a fya a ti: “Omunyasha, ohandi ku lombwele, penduka po.” Omumati oo okwa li a kala omutumba, ndele ta hovele okupopya, na Jesus okwa li e mu yandja kuina.

Eshi ovanhu va li va mona kutya omumati oo okwa nyumunwa shili, ova tya: “Omuprofeti munene a holoka mokati ketu,” navamwe ova li va tya: ‘Kalunga e uya a tale ovanhu vaye.’ Diva onghundana i na sha noshikumwifilonga osho oya li ye lihanena muJudea ashishe nosho yo moilongo aishe yopoushiinda.

Pefimbo opo Johannes Omuninginifi okwa li natango e li modolongo, nokwa li a hala okuuda shihapu shi na sha noilonga oyo Jesus ta longo. Ovahongwa vaJohannes ova li ve mu lombwela shi na sha noikumwifilonga oyo Jesus a longa. Mbela Johannes okwa li e linyenga ngahelipi eshi a li a uda kombinga yaasho? Lukas 7:11-18.

▪ Oshike sha li sha ningwa po eshi Jesus a li e li pokufika muNain?

▪ Jesus okwa li a kumwa ngahelipi kwaasho a li a mona, nokwa li a ninga po shike?

▪ Ovanhu ova li ve linyenga ngahelipi koshikumwifilonga osho Jesus a li a longa?