Etukulwa 44
Jesus ta mweneke oshikungulu shinene
JESUS okwa kala e lipyakidila efiku alishe, ta hongo eemhunga dovanhu komunghulofuta nokonima yaasho okwa li a ka yelifila ovahongwa vaye omafaneko fimbo va li ovo aveke. Okwa li a lombwela ovahongwa vaye pefimbo lokonguloshi a ti: “Tu yaukileni komunghulo winya.”
Kombinga ikwao yomunghulofuta koushilo wefuta laGalilea okwa li oshitukulwa hashi ifanwa Dekapolis, osho sha dja kOshigreka deʹka, tashi ti “omulongo” nosho yo poʹlis, tashi ti “oshilando.” Oilando yokuDekapolis oya li ondingandinga yeputuko lOshigreka, nonande osha yela kutya omwa li yo hamu kala Ovajuda vahapu. Ndele oilonga yaJesus moshitukulwa osho oya li ya ngabekwa neenghono. Nokuli nopefimbo olo Jesus a li a ya ko, ka li a pitikwa a kale mo efimbo lile, ngaashi hatu ke shi mona komesho.
Jesus okwa li a lombwela ovahongwa vaye va ye pamwe naye nowato kombinga ikwao yomunghulofuta. Ndele eshi va li tava i, ovanhu aveshe ova li ve va wete. Diva ovanhu vamwe ova li va londa meewato davo opo vaye pamwe navo. Kasha li she va pula olule okutauluka efuta, molwaashi efuta laGalilea ola li ashike li na omukokomoko woule weekilometa 21 nosho yo omutamo weekilometa 12 lwaapo.
Osha yela kutya Jesus okwa li a loloka, onghee hano, fimbo va li mondjila, okwa li a ka nangala konima mowato, ndele ta wile koshiwilo nokukofa. Ovayapostoli vaye vahapu ova li ovaendifuta va pyokoka, molwaashi ova kala hava yulu eeshi luhapu mefuta laGalilea. Onghee hano, ova li va kwatela komesho mokushinga owato.
Ashike olweendo olo kala li tali ka kala lipu, molwaashi mefuta omo omwa li hamu tukuluka oikungulu inene. Oikungulu ya tya ngaho oya li hai holoka po molwaashi onghalo yomhepo yefuta laGalilea oya li ya pupyala, ofimbo omhepo oyo ya li hai di meemhunda odo da li popepi ya li ya talala mokuyelekanifa naayo yomefuta. Kakele kaasho, ombada yefuta olo laGalilea oya li moule neekilometa 210 lwaapo mokuyelekanifa nombada yefuta linene. Fimbo Jesus novahongwa vaye va li mowato, opa li pa tukuluka oshikungulu shinene. Omakufikufi okwa li tae lidenge mowato nomeva okwa li taa i mowato, nomolwaasho oya li tai hale okuningina. Ashike Jesus okwa li ashike a kofa natango pefimbo opo.
Ovashingiwato ovo va pyokoka ova li va nyengwa okuyukifa owato i ye komesho. Osha yela kutya ova li hava ende nale moikungulu, ndele pefimbo opo ova li va teka omukumo. Ovahongwa ova li va pendula Jesus molwaashi ova li va tila okufya. Ova li ve mu pendula tava ti: ‘Omuhongi, mboli Ove ku na ko nasha, eshi hatu ningine mo? Omwene, tu xupifa, ohatu ningine mo!’
Opo nee, Jesus okwa li a penduka ndele ta lombwele omhepo ta ti: “Mwena, ove u lote.” Omhepo oyo yoshikungulu oya li ya lota, nefuta ola li la mwena. Opo nee Jesus okwa li a pula ovahongwa vaye ta ti: “Onye ovambada ngahelipi? Oshike mu he na eitavelo?”
Osho osha li sha tilifa ovahongwa neenghono, nova li va pulafana tava ti: “Ou olyelye hano, omhepo nefuta eshi tali dulika kuye?”
Jesus ka li tuu a ulika kutya oku na eenghono dinene! Itashi hekeleke tuu okushiiva kutya Ohamba yetu oi na eenghono okupangela oinima yopaushitwe nonokutya eshi Ouhamba wayo tau ka kala tau pangele edu, ovanhu aveshe itava ka kala va tila oiponga yopaushitwe!
Konima yefimbo eshi oshikungulu sha li sha lota, Jesus novahongwa vaye ova li va fika nawa komunghulofuta wokombinga yokoushilo. Otashi dulika eewato dikwao odo da li tadi ende mefuta nado da li da xupa moshikungulu osho shinene ndele tadi fiki nawa komutunda. Markus 4:35–5:1; Mateus 8:18, 23-27; Lukas 8:22-26.
▪ Dekapolis otashi ti shike, noshi li peni?
▪ Oinima ilipi ya li hai etifa oikungulu inene mefuta laGalilea?
▪ Eshi eenghendabala dovahongwa dokushinga owato da li da ponya, ova li va ninga po shike?