Etukulwa 45

Omunhu oo a li ta monika a fa ita dulu okuninga omuhongwa

FIMBO Jesus a li ta fiki komunghulofuta, okwa li a mona ko oshinima shitilifa. Opa li pe uya ovalumenhu vavali ovapwidi va li tava di momaendo e li popepi nova li tava tondoka va yuka kuJesus. Ovalumenhu ovo ova li ve na eendemoni. Molwaashi umwe womuvo okwa li a pwiduka unene e dule mukwao nokwa li a hepekwa keendemoni oule wefimbo lile, Jesus okwa li a yandja elitulemo kuye.

Omulumenhu oo mu etifa onghenda okwa li ha kala momaendo e li hamunghele. Okwa li ha kala ta ingida oufiku nomutenya, nokulilengaula nomamanya. Omulumenhu oo okwa li a pwiduka neenghono, nomolwaasho kapa li oo a li e na ouladi okweendela kondjila oyo ya li popepi naapo a li. Ovanhu ova li va ninga eenghendabala ve mu mange, ndele okwa li ha tokaula omalyenge oo a mangwa nao. Kapa li oo a li ta dulu oku mu manga.

Eshi omulumenhu oo a li ta fiki puJesus nokutwa eengolo peemhadi daye, eendemoni odo da li tadi mu hepeke oda li de mu ningifa a ingide ta ti: “Owa hala shike muame, Jesus, Omona waKalunga, Ou wOkombadambada? Ohandi ku anene kuKalunga ino hepeka nge.”

Jesus okwa li a popya a ti: “Dja mo momulumenhu, oove omhepo ya nyata.” Jesus okwa li yo a pula ondemoni a ti: “Edina loye olyelye?”

Ondemoni oya li ya nyamukula ya ti: “Edina lange Ongudu ya kula, osheshi fye otu vahapu.” Eendemoni otashi dulika hadi ponokele ovanhu di li ongudu omolwoumbada nohadi kala da hafa ngeenge di wete ovanhu ovo tadi hepeke tava mono oixuna. Ndele eshi da li da shakena naJesus, oda li da pula ehe di tumine mombwili. Osho otashi ulike natango kutya Jesus oku na eenghono dinene, molwaashi okwa li a dula okufinda eendemoni odo di na onyanya. Natango osho otashi ulike kutya eendemoni odi shi shii kutya xuuninwa otadi ka idililwa mombwili pamwe nomuwiliki wado Satana Ondiaboli.

Peemhunda odo da li pomudingonoko opo opa li tapa nape oingulu i li 2 000 lwaapo. Onghee hano, eendemoni oda li da tya: “Tu tuma moingulu tu ye muyo.” Osha yela kutya eendemoni ohadi kala da hafa ngeenge tadi hepeke omalutu oishitwa yopambelela monghedi inyanyalifi. Eshi Jesus a li a pitika eendemoni di ye moingulu, oingulu aishe 2 000 oya li ya mbolokotela mefuta ndele tai fi omeva.

Eshi ovafita voingulu va li va mona osho sha ningwa po, ova li va tondoka va twale ehokololo olo koshilando nosho yo komikunda. Opo nee, ovanhu ova li ve uya okutala osho sha ningwa po. Eshi va li ve uya, ova li va mona omulumenhu oo a li a yelifwa eendemoni. Omulumenhu oo okwa li a djala oikutu nokwa veluka, nokwa li e li omutumba peemhadi daJesus.

Ovamoninomesho ova li va hokolola kutya omulumenhu oo okwa li a velulwa ngahelipi. Ova li yo va lombwela ovanhu kombinga yefyo loingulu likumwifi. Eshi ovanhu va li va uda kombinga yoshinima osho, ova li va tila neenghono, nova li va ladipika Jesus neenghono a dje mo moshitukulwa shavo. Jesus okwa li a dulika kelombwelo olo ndele ta londo owato a ye. Omulumenhu oo a li a kosholwa eendemoni okwa li a pula Jesus e mu pitike a ye pamwe naye, ashike Jesus okwa li e mu lombwela a ti: “Inda keumbo kovakweni, ove u va hepaululile, Omwene nhumbi e ku ningila oilonga inene, ndele te ku filonghenda.”

Jesus okwa li luhapu ha lombwele ovanhu ovo a velula vaha lombwele vamwe kombinga yaasho, molwaashi ka li a hala ovanhu va fike pexulifodiladilo lonhumba omolwokuuda omahokololo taa nyuwifa omatwi. Ndele pomhito oyo Jesus okwa li a lombwela omulumenhu oo a li e na eendemoni a ka yandje oundombwedi kuvamwe ovo tashi dulika Jesus a li ita ka fika ko kuvo. Kakele kaasho, okukala po kwomulumenhu oo otaku ka yandja oundombwedi kutya Jesus oku na eenghono okulonga oilonga iwa, notashi ka nyaneka pomutenya ehokololo keshe lii olo tashi dulika tali hokololwa shi na sha nokufya kwoingulu.

Omulumenhu oo a li a kosholwa eendemoni okwa li a dulika kuJesus ndele ta i. Omulumenhu oo okwa li a hovela okuudifa muDekapolis oinima aishe oyo Jesus e mu ningila, novanhu ova li va kumwa. Mateus 8:28-34; Markus 5:1-20; Lukas 8:26-39; Ehololo 20:1-3.

▪ Omolwashike tashi dulika kwa li kwa yukifwa elitulemo komulumenhu umwe oo a li e na eendemoni nonande ova li vavali?

▪ Oshike tashi ulike kutya eendemoni odi shii kutya otadi ka tulwa mombwili monakwiiwa?

▪ Omolwashike tashi dulika eendemoni di hole okuya movanhu nomoinamwenyo?

▪ Omolwashike Jesus a li a lombwela omulumenhu oo a li e na eendemoni aye a ka lombwele vamwe kombinga yaasho a li e mu ningila, nonande okwa kala ha londwele ovanhu vaha hokolole kombinga yaasho a ninga?