Etukulwa 46

Omukainhu oo a li a kwata koshikutu shaJesus

ONGHUNDANA i na sha nokudja kwaJesus muDekapolis oya li ya fika kuKapernaum, neemhunga dovanhu oda li da ongala pefuta opo di mu shakeneke. Nopehe na omalimbililo, eemhunga dovanhu oda li da uda kutya Jesus okwa li a loteka oshikungulu nokwa li a velula ovanhu ovo va li ve na eendemoni. Ndele eshi Jesus e uya pomunghulofuta, eemhunga dovanhu odo oda li de mu ongalela da nyakukwa noda li da teelela a ninge sha.

Umwe womwaavo va li va halelela okumona Jesus okwa li Jairus, omukulunhu woshinagoga. Jairus okwa li a twa eengolo peemhadi daJesus nokwa kala te mu indile ta ti: “Okamwange okakadona otaka vele unene, ila, ove u ka tenheke omake, ka veluke, ko ka kale ke nomwenyo.” Jairus okwa li a lenga okamonakadona kaye molwaashi oka li ewifa laye noka li ashike ke na omido 12.

Jesus okwa li a dimina okuya keumbo laJairus, neemhunga dovanhu oda li de mu shikula. Ovanhu ova li va hafa neenghono eshi va li va teelela oku ka mona Jesus ta longo oshikumwifilonga shimwe vali. Ndele omukainhu umwe oo a li mokati kovanhu ovo okwa li ashike ta diladila kombinga youpyakadi waye wa kwata moiti.

Omukainhu oo okwa kala ta hepekwa ketiko lohonde oule womido 12. Okwa kala ta maneko eendokotola odo de mu mana oimaliwa yaye aishe, ndele ka li a mona ekwafo lasha, ponhele yaasho, onghalo yaye oya kala ashike tai ende ya yuka kowii.

Ngaashi tu shi shii, omukifi womukainhu oo kawa li ashike we mu nghundipaleka ndele owa li yo we mu fifa ohoni nowe mu shundula. Ovanhu pefimbo opo kava li hava popi kombinga yomukifi wa tya ngaho moipafi yavamwe. Kakele kaasho, paMhango yaMoses, omukainhu oo e na etiko lohonde okwa li e na okutalwa ko a nyata, nakeshe oo te mu kumu ile ta kwata oshikutu shaye shi na ohonde okwa li e na okulikosha nokwa li e na okutalwa ko a nyata fiyo efimbo lokonguloshi.

Omukainhu oo kwa li a uda shi na sha noikumwifilonga oyo Jesus a longa, nokwa li te mu kongo. Molwaashi omukainhu oo ka li a yela, okwa li a pita mengafifi lovanhu nelungi opo aha monike, nokwa li te lipopile ta ti: “Shimha tuu nda kuma koshikutu shaye ohandi veluka.” Eshi omukainhu oo a li a kuma oshikutu shaJesus, okwa li a mona kutya etiko lohonde laye ola oka.

Jesus okwa li a pula a ti: “Olyelye ou a kuma nge?” Epulo olo laJesus kala li tuu la kumwifa omukainhu oo! Jesus okwa li a shiiva ngahelipi kutya okwa kumwa komunhu? Petrus okwa li e mu lombwela a ti: ‘Omuhongi, ongudu yovanhu otai ku fininike, ndele tai ku pumu, ndele to ti: Olyelye a kuma nge?’

Jesus okwa li a tala komukainhu ndele ta ti: “Umwe okwa kuma nge, osheshi onda uda muame mwa dja eenghono.” Oshoshili kutya Jesus ka li ashike a kumwa ngahenya, molwaashi muye omwa li mwa dja eenghono odo da velula omukainhu oo.

Eshi omukainhu oo a didilika kutya okwa monika kutya oye a kuma Jesus, okwa li e uya ndele te linyongamene puJesus a tila nota kakama. Okwa li a hepaulula omukifi oo wa li u mu kwete moipafi yovanhu aveshe ovo va li po, nokwa popya yo kutya okwa velulwa ngahelipi.

Okulihepaulula kwomukainhu oo okwa li kwe linyengifa Jesus nokwa li a hekeleka omukainhu oo pahole a ti: “Omumwangekadona, eitavelo loye ole ku velula. Inda nombili, ove u kale wa veluka koudu woye.” Kashi hafifa tuu okushiiva kutya oo Kalunga a hoolola a pangele edu oku li omunalukeno, omunanghenda, noku na ko nasha novanhu noku na yo eenghono oku va kwafela! Mateus 9:18-22; Markus 5:21-34; Lukas 8:40-48; Leviticus 15:25-27.

▪ Jairus okwa li lyelye, nomolwashike a li e uya kuJesus?

▪ Omukainhu umwe okwa li e na oupyakadi washike, nomolwashike sha li shidjuu kuye oku ka konga ekwafo kuJesus?

▪ Omukainhu oo okwa li a velulwa ngahelipi, na Jesus okwa li e mu hekeleka ngahelipi?