Etukulwa 47

Oluhodi tali shituka ehafo

ESHI Jairus a mona omukainhu oo a li e na etiko lohonde a velulwa, osha li she mu kwafela a kale e na elineekelo linene kutya Jesus oku na eenghono okulonga oikumwifilonga. Jesus okwa li a pulwa efimbo longula kuJairus a ka kwafele omonakadona waye omuholike womido 12 oo a li e li pokufya. Ndele ngaashi Jairus a li te lipula, okamonakadona kaye oka li ka fya. Fimbo Jesus a li natango ta popi nomukainhu oo a li a velula, puvo opa li pe uya ovalumenhu vonhumba nova li va nongofolela Jairus tava ti: “Omumwoyekadona okwa fya, oshike to lolokifa vali omuhongi?”

Kaya li tuu onghundana ii! Diladila ashike: Omulumenhu oo a li a fimanekwa neenghono momudingonoko wavo ka li va li e na osho ta dulu okuninga eshi a uda kutya omona waye okwa fya. Jesus okwa li a uda osho Jairus va li tava popi. Onghee hano, okwa li a tala kuJairus ndele te mu lombwele eendjovo tadi tu omukumo a ti: “Ino tila, shimha wa itavela.”

Jesus okwa li a ya pamwe naJairus oo a li a nyika oluhodi keumbo laye. Eshi va fika, ova li va hanga ovanhu tava lili eenghali neenghono. Peumbo opo opa li pa ongala ovanhu vahapu, nova li va nyika oluhodi. Eshi Jesus a ya meumbo omo, okwa li a pula a ti: “Oshike tamu uyaana ndee tamu kwena? Okaana inaka fya, oka kofa.”

Eshi ovanhu ovo va uda Jesus ta popi ngaho, ova li va hovela oku mu yola tave mu sheke molwaashi ova li ve shii kutya okakadona oko oka fya shili, ofimbo Jesus ta ti oka kofa ashike. Jesus okwa li ta ka longifa eenghono odo a pewa kuKalunga opo a ulike kutya ovanhu otava dulu okunyumunwa noupu ngaashi ashike omunhu ta pendulwa meemhofi doshitula.

Jesus okwa li a lombwela ovanhu aveshe vaye pondje, ndele ta fyaala po ashike naPetrus, Jakob, Johannes nosho yo ovadali vokaana oko ka fya, nokwa li a ya pamwe navo opo pa nangekwa okaana oko ka fya. Jesus okwa li a kwata okaana oko meke ndele ta ti: ‘Talita kuum,’ osho tashi ti: “Okakadona, ohandi ku lombwele, penduka.” Diva okakadona oko oka li ka penduka po noka hovela okweenda. Eshi ovadali vako ve shi mona ova li va kwatwa kehaluko nova li va hafa neenghono.

Konima eshi Jesus a li a popya kutya okaana oko naka pewe oikulya, okwa li a lombwela Jairus nomukulukadi waye vaha lombwele nande omunhu oshinima osho. Ndele nonande okwa li e va lombwela ngaho, onghundana i na sha naasho oya li ye lihanena oshitukulwa ashishe. Oshikumwifilonga osho osha li oshikumwifilonga oshitivali Jesus ta nyumuna omunhu. Mateus 9:18-26; Markus 5:35-43; Lukas 8:41-56.

▪ Jairus okwa li a uda onghundana i na sha nashike, na Jesus okwa li e mu twa ngahelipi omukumo?

▪ Eshi Jesus va fika meumbo laJairus ova li va hanga mo shike?

▪ Omolwashike Jesus a ti kutya okaana oko ka li ka fya oka kofa ashike?

▪ Ovanhu vatano velipi va li va mona eshi Jesus ta nyumuna okaana?