Etukulwa 48

Eshi Jesus a dja keumbo laJairus okwa li a shuna vali kuNasaret

JESUS okwa li e lipyakidila efiku alishe, a li molweendo lomefuta okudja kuDekapolis, a velula omukainhu oo a li e na etiko lohonde, nokwa li yo a nyumuna okamonakadona kaJairus. Ndele natango etango kala li la ningina. Eshi Jesus a dja meumbo laJairus, ovalumenhu vavali ovapofi ova li tave mu shikula, nova li tava ingida tava ti: “Omona waDavid, tu fila onghenda!”

Eshi ovalumenhu ovo va li tava ti kutya Jesus “Omona waDavid,” ova li tava ulike kutya ova itavela kutya Jesus omufyuululi wolukalwapangelo laDavid, onghee hano, oye Messias omuudanekwa. Jesus okwa li a fa ehe na ko nasha neindilo lavo, tashi dulika opo a tale ngeenge ovadiinini ngoo. Ndele nande ongaho, ovalumenhu ovo kava li va sholola. Ova li va shikula Jesus fiyo okeumbo oko a li ha di, naashi a ya meumbo ova li ve mu shikulila mo.

Eshi ve uya meumbo Jesus okwa li e va pula a ti: “Onye tamu itavele tuu ndi neenghono oku shi ninga?”

Ovalumenhu ovo ova li va nyamukula ve na elineekelo va ti: “Heeno, Omwene.”

Jesus okwa li a kuma omesho avo ndele ta ti: “Ningilweni paitavelo leni.” Diva omesho avo okwa li a twikuluka. Jesus okwa li e va pa elondwelo la kwata moiti a ti: “Taleni, eshi shi ha udike nande okomunhu.” Molwaashi ova li va hafa neenghono, kava li va tula moilonga elondwelo laJesus, ndele ova li va popya shi na sha naye moshilongo ashishe.

Eshi ovalumenhu ovo va li ovapofi va ya, Jesus okwa li a etelwa omulumenhu e na eendemoni odo da li de mu fitika ondaka. Jesus okwa li a ta mo eendemoni momulumenhu oo nokwa li a hovela okupopya. Eemhunga dovanhu oda li da tila eshi da mona Jesus a longa oikumwifilonga oyo, ndele tadi ti: “Oshinima sha tya ngaha inashi monika nande efiku limwe muIsrael.”

Meemhunga dovanhu omo omwa li yo Ovafarisai. Ovafarisai ovo kava li tava dulu okupataneka oikumwifilonga oyo Jesus a longa, ndele molwaashi ova li ovakolokoshi nokave na eitavelo, ova li natango tava endulula elundilo lavo kutya Jesus oha longo oikumwifilonga keenghono daSatana, va ti: “Eendemoni ohe di tefa mo omukulunhu weendemoni.”

Okudja opo Jesus okwa li a shuna koshilando shambulavo, Nasaret, nopomhito oyo okwa li a ya pamwe novahongwa vaye. Omudo wa tetekela okwa i le koshinagoga oko a li a honga ovanhu. Nonande ovanhu ovo va li ve uya koshinagoga oko pehovelo ova li va kuminwa eendjovo daye dihafifa, lwanima ova li va nyematela ehongo laye nova li va hala oku mu dipaa. Pomhito ei, Jesus natango okwa li a kendabala okukwafela ovashiinda shaye vonale.

Nonande ovanhu koitukulwa imwe ova li hava mbobolokele kuJesus, osha yela kutya muNasaret ovanhu kava li va ya ko kuye. Onghee hano, mEshabata okwa li a ya koshinagoga opo e ke va honge. Ovanhu vahapu vomwaavo va li tava pwilikine kuye ova li va kumwa, nova li va pula tava ti: “Ounongo oo e u kwete noilonga yeenghono e i na, oyapeni? Ou haye omona womuhongi womiti? Ina ke fi ta ifanwa Maria, novamwaina havovo: Jakob naJosef naSimon naJudas? Novamwaina ovakainhu aveshe havovo ve li pufye apa? Ndele ye, aishe ei okwe i hanga peni?”

Ova li tava tomhafana tava ti: ‘Jesus omunhu ashike womoshitukulwa shetu ngaashi fye. Omomesho etu a kulila, notu shii oukwaneumbo wavo. Ota dulu ngahelipi okuninga Messias?’ Nonande opa li oumbangi muhapu, sha hala kutya, ounongo waye nosho yo oikumwifilonga oyo Jesus a li a longa, oo tau ulike kutya oye Messias, kava li ve mu tambula ko. Ovanhu vomuNasaret novapambele vaye kava li ve mu tambula ko molwaashi ova li ve mu shii nawa, naasho osha li sha ningifa Jesus a popye kutya: “Omuprofeti ke na opo a dinwa, omoshilando tuu shambulavo nokeumbo lambulavo.”

Jesus okwa li a kuminwa okuheneitavelo kwavo. Onghee hano, muNasaret ka li a longa mo oikumwifilonga, kakele kokuvelula ovanhu vamwe ovo va li tava vele. Mateus 9:27-34; 13:54-58; Markus 6:1-6; Jesaja 9:7.

▪ Eshi ovalumenhu ovapofi va li tava ti kutya Jesus “Omona waDavid,” ova li va ulika kutya ova itavela shike?

▪ Ovafarisai ova li tava ti kutya Jesus oha longo oikumwifilonga keenghono dalyelye?

▪ Oshike tashi ulike kutya Jesus okwa li e linyengifwa konghenda eshi a li a shuna kuNasaret a ka kwafele ovanhu?

▪ Ovanhu vomuNasaret ova li va tambula ko ngahelipi Jesus, nomolwashike?