Etukulwa 50

Jesus ta kwafele ovayapostoli vaye ve lilongekidile omahepeko

KONIMA eshi Jesus a li a honga ovayapostoli vaye nghee ve na okuwanifa po oilonga yokuudifa, okwa li e va londwela kutya otava ka patanekwa. Okwa ti: “Tala, Ame ohandi mu tumu ngaashi eedi mokati komambungu. . . . Ndelenee lungameni ovanhu, osheshi otave mu yandje koiongalele yovatokoli ndee tave mu dengele meeshinagoga davo; ndele tamu twalwa komalenga nokeehamba omolwange.”

Kakele komapataneko onyanya oo ovayapostoli va li tava ka shakeneka, Jesus okwa li e va shilipaleka vali a ti: “Ndelenee ngenge tave mu yandje kovatokoli, inamu kala noshisho mu tye ngahelipi ile mu popye shike, osheshi onye tamu pewa efimbo tuu olo odo mu noku di popya. Osheshi hanye tamu popi, ndele omhepo yaXo tai popi munye.”

Opo nee Jesus okwa li a twikila ko a ti: “Ndelenee omumwaxe ta yandje omumwaxe mokufya, naxe omona waye, nounona otava ka twa ondubo novakulunhu vavo, ndee tave va dipaifa.” Okwa popya yo vali a ti: “Ndele edina lange otamu ke li tondelwa kuaveshe; ndele ou te [lididimike] fiyo kexulilo, oye ta xupifwa.”

Okuudifa okwa fimanenena. Onghee hano, Jesus okwa li a divilika kutya osha fimana kovahongwa vaye okukala va lungama opo va dule okutwikila okuudifa va manguluka. Jesus okwa ti: “Ndele ngenge tave mu taata moshilando shimwe, tembukileni kushikwao; osheshi oshili handi mu lombwele: onye itamu mane okweenda oilando aishe yaIsrael fiyo Omona wOmunhu te uya.”

Oshoshili kutya ehongo, elondwelo nosho yo omatwomukumo oo Jesus okwa li e a pa ovayapostoli vaye 12, ndele okwa nuninwa yo ovo va li tava ka kufa ombinga moilonga yokuudifa onghundana iwa mounyuni aushe konima yokufya kwaye nosho yo yokunyumunwa kwaye. Osho Jesus okwa li e shi ulika eshi a ti kutya ovahongwa vaye otava ka ‘tondika kuaveshe,’ ndele hakOvaisrael ashike oko ovayapostoli va li va tumwa va ka udifile. Shimwe vali, ovayapostoli kava li va twalwa komalenga nokeehamba eshi Jesus a li e va tuma koshikonga shokuudifa osho sha li sha kwata efimbo lixupi. Kakele kaasho, ovaitaveli vopefimbo opo kava li va dipaifwa koilyo yomaukwaneumbo avo.

Onghee hano, eshi Jesus a li a popya kutya ovahongwa vaye itava ka mana ko oshitukulwa omo tava udifa “fiyo Omona wOmunhu te uya,” Jesus okwa li ta xunganeke kutya ovahongwa vaye kava li tava ka udifila ongonga yedu alishe onghundana i na sha nokudikwa po kwOuhamba waKalunga fimbo Ohamba Jesus Kristus omutumbalekwa i ne uya puHarmagedon e li omutokoli a nangekwa po kuJehova.

Jesus okwa li a twikila okuhonga ovahongwa vaye shi na sha noilonga yokuudifa a ti: “Omulongwa ke dule omulongi waye, nomupiya ke dule omwene waye.” Onghee hano, ovashikuli vaJesus navo ove na okuteelela okuungaungwa navo nai nokuhepekwa ngaashi ye omolwokuudifa Ouhamba waKalunga. Ndele nande ongaho, Jesus okwe tu ladipika a ti: “Inamu tila ava tava dipaa olutu, vo itava dulu okudipaa omwenyo; ndele tileni shili ou ta dulu okunyonaunina [muGehenna, NW] omwenyo nolutu.”

Jesus okwa li e na okutulila po ovashikuli vaye oshihopaenenwa moshinima osho. Jesus okwa li e na okulididimikila efyo nopehe na oumbada ponhele yokweefa po oudiinini waye komunaenghono adishe, Jehova Kalunga. Jehova oye aeke ta dulu okuhanauna po “omwenyo” womunhu (oo pomhito oyo tau ulike keteelelo lomunhu e li omwenyo u na omwenyo) ile oo ta dulu okunyumuna omunhu opo a kale nomwenyo waalushe. Tate yetu womeulu Jehova ke fi tuu omunahole nomunalukeno!

Jesus okwa li a twa omukumo ovahongwa vaye moku va lombwela efaneko olo tali divilike nghee Jehova he va file oshisho pahole. Jesus okwa li e va pula a ti: “Oiyandja ivali ihai landwa ngeno okahaulapa kamwe akeke? Ndele kaku na nande shimwe tashi wile poshi oXo ngenge ina hala. Ndele osho eexwiki deni adishe domutwe oda valwa yo. Hano inamu tila; onye mu dule oiyandja ihapu.”

Etumwalaka lOuhamba olo Jesus a lombwela ovahongwa vaye va udife ola li tali ka tukaula omaukwaneumbo, ngeenge oilyo imwe yomoukwaneumbo oye li tambula ko ofimbo imwe inai li tambula ko. Jesus okwa li a yelifa a ti: “Inamu tya, Ame nde uya ndi ete ombili kombada yedu, inandi uya okweeta ombili, ndelenee eongamukonda.” Onghee hano, otashi pula ouladi opo oshilyo shoukwaneumbo wonhumba shi tambule ko oshili yOmbibeli. Jesus okwa ti: “Keshe ou e hole xe ile ina komesho yange, oye ina wapalela nge; nakeshe tuu ou e hole omona waye omumati ile okakadona komesho yange, oye ina wapalela nge.”

Pexulilo leenghundafana daye, Jesus okwa li a yelifa kutya ovanhu ovo tava tambula ko ovahongwa vaye oye va tambula ko, a ti: “Nakeshe ou ta nwefa umwe waava vaxupi eholo lomeva omolwedina lomulongwa, [oshili ohandi] mu lombwele: Ye ita ka kanifa ondjabi yaye.” Mateus 10:16-42.

▪ Jesus okwa li a londwela ovahongwa vaye kombinga yashike?

▪ Jesus okwa li a pa ovahongwa vaye etwomukumo nehekeleko lilipi?

▪ Omolwashike osho Jesus a li a honga ovayapostoli vaye tashi longo yo nokOvakriste kunena?

▪ Omeityo lilipi omuhongwa waJesus ehe dule omuhongi waye?