Etukulwa 53
Ovanhu va hala omupangeli oo e dule ovapangeli vopanhu
OVANHU ova li va kumwa eshi va mona Jesus a palula ovanhu omayovi pashikumwifilonga. Ova ti: “Ou oshili omuprofeti winya [kwa] li e nokuuya mounyuni.” Ova li va fika pexulifodiladilo kutya Jesus ke fi ashike omuprofeti munene e dule Moses, ndele ota dulu yo okukala omupangeli muwa elela. Onghee hano, ova li va pangela omhangela ve mu kwate opo ve mu ninge ohamba.
Ndele Jesus okwa li e wete kutya ovanhu ova li va pangela shike. Onghee hano, okwa li a dja po divadiva opo vehe mu fininike a ninge ohamba. Jesus okwa li a lekela eemhunga dovanhu nokwa li a lombwela ovahongwa vaye va londe mowato va ye kuKapernaum. Opo nee okwa li a ya komhunda opo a ka ilikane. Jesus okwa li a kala komhunda oko oufiku aushe oye aeke.
Okafimbo kaxupi fimbo eluwa inali tenda, Jesus okwa li a lengalenga e li koxulo yomhunda nokwa li a mona nghee omhepo yoshikungulu tai undula omakufikufi mefuta. Molwaashi Opaasa oya li i li pokufika, omwedi pefimbo opo owa li u yadi, na Jesus okwa li e wete kutya owato omo mwa li ovahongwa vaye ka ya li tai dulu okweenda ya finda komesho omolwomakufikufi. Ovahongwa ovo ova li tava kondjo neenghono.
Eshi Jesus eshi mona, okwa li a dja ko komhunda nokwa li a enda kombada yomakufikufi a finda kowato. Eshi Jesus a fika powato okwa li a hanga ovahongwa vaye va enda eekilometa nhano ile hamano lwaapo. Jesus okwa li a enda po powato a fa omunhu ta pitilile po. Eshi ovahongwa vaye ve mu mona ova li va ingida tava ti: “Oshilulu osho!”
Jesus okwa li e va nyamukula neendjovo tadi hekeleke a ti: “Aame ou, inamu tila.”
Ndele Petrus okwa ti: “Omwene, ngenge ove, [lombwele] nge ndi uye kuove handi ende kombada yomeva.”
Jesus okwa li e mu nyamukula a ti: “Ila!”
Petrus okwa li a londoloka mowato ndele ta ende kombada yomeva a finda kuJesus. Ndele eshi Petrus a mona oshikungulu, okwa li a kwatwa koumbada nokwa li a hovela okuninginina nokwa ingida a ti: “Omwene, xupife nge!”
Diva Jesus okwa li a nana eke laye nokwe mu kwata ndele ta ti: “Omunaitavelo linini ove, oshike wa limbililwa?”
Eshi Jesus naPetrus va ya mowato, oshikungulu osha li sha lota, naasho osha li sha kumwifa ovahongwa. Ndele mbela ovahongwa ova li ngoo ve na okukala va kumwa? Eevili dinini da pita, Jesus okwa li a longa oshikumwifilonga shinene eshi a li a palula ovanhu omayovi nomingome nhano adike neeshi mbali. Ngeno ovahongwa vaye ova li va ‘uda ko eityo lomingome’ odo Jesus a li a hapupalifa moshikumwifilonga osho, ngeno inava kumwa eshi Jesus a li ta ende kombada yomeva naashi a lotifa oshikungulu shomhepo. Ndele molwaashi ova li va kumwa, ova li va twa eengolo puJesus ndele tava ti: “Oove shili Omona waKalunga.”
Diva Jesus novahongwa vaye ova li va fika puGenesaret, efilu olo la li liwa, olo la li popepi naKapernaum, novali va kanghameka owato yavo ponhele oyo. Ndele eshi va li va ya komunghulofuta, ovanhu ova li va dimbuluka Jesus nova li va ya moshilongo shopoushiinda va ka tale mo ovanaudu. Eshi ovanaudu ovo va li va etwa kuJesus ndele tava kwata keenyemba doshikutu shaye shokombada, ova li va veluka.
Lwopokati opo, eemhunga dovanhu odo da li da palulwa pashikumwifilonga oda li da didilika kutya Jesus okwa ya. Onghee hano, eshi ouwato vanini ovo va dja kuTiberias va li va fika puvo, ova li va londa mo opo va ye kuKapernaum va ka konge Jesus. Eshi ovanhu ovo va li va mona Jesus, ova li ve mu pula tava ti: “Rabbi, onaini we uya ko oku?” Jesus okwa li e va hanyena ngaashi hatu ke shi mona mehokololo tali landula. Johannes 6:14-25; Mateus 14:22-36; Markus 6:45-56, yelekanifa OB-1986.
▪ Konima eshi Jesus a li a palula ovanhu omayovi pashikumwifilonga, ovanhu ova li va hala oku mu ninga shike?
▪ Jesus okwa li a mona shike fimbo a li a londa komhunda, nokwa li a ninga po shike?
▪ Omolwashike ovahongwa va li vehe na okukala va kuminwa oinima oyo Jesus a li a ninga?
▪ Oshike sha li sha ningwa po konima eshi Jesus novahongwa vaye va li va fika komutunda?