Etukulwa 54

‘Omungome washili wa dja meulu’

MEFIKU la tetekela omwa li mwa ningwa oiningwanima ihapu. Jesus okwa li a palula ovanhu omayovi pashikumwifilonga nokwa li yo a ya onhapo ovanhu ovo va li tava kendabala oku mu ninga ohamba. Oufiku oo okwa li yo a enda kombada yomeva efuta laGalilea omo mwa li mu na oshikungulu; okwa li a xupifa Petrus oo a li ta hale okuningina eshi a li ta ende kombada yomeva efuta olo, nokwa li yo a mweneka omakufikufi opo a xupife ovahongwa vaye ovo va li tava hale okuningina nowato.

Ovanhu ovo Jesus a li a palula pashikumwifilonga ovo va li koushilolundume wefuta laGalilea ova li va hanga natango Jesus popepi naKapernaum nova li ve mu pula tava ti: “Onaini we uya ko oku?” Jesus okwa li e va tangunina a ti kutya otave mu kongo ashike molwaashi va hala okupewa natango oikulya oshali. Okwa li e va ladipika kutya inava longela oikulya oyo hai xulu po, ndele nava longele oikulya oyo hai kalelele fiyo omomwenyo waalushe. Ovanhu ovo ova li va pula Jesus va ti: “Fye tu nokuninga shike tu longe oilonga yaKalunga?”

Jesus okwa li a tumbula oshilonga shimwe osho shi na ondilo inene. Okwa li a yelifa a ti: “Oshilonga shaKalunga osheshi mu itavele ou a tumwa kuye.”

Ndele ovanhu kava li va itavela Jesus, nonande okwa li a longa oikumwifilonga ihapu. Shikumwifi, nokuli nokonima eshi Jesus a longa oikumwifilonga aishe oyo, ovanhu ova li tave mu pula tava ti: “Edidiliko lilipi po to li ningi hano, tu li mone, fye tu ku itavele? Oto longo shike? Ootate yetu va lile omanna mombuwa, ngaashi opa shangwa: Ye okwe va pa okulya omungome wokeulu.”

Opo Jesus a nyamukule ovanhu ovo va li tave mu pula edidiliko, okwa li a yelifa nawa kutya olyelye Odjo yomafiloshisho opashikumwifilonga oo a li a pewa ovanhu, a ti: “HaMoses e mu pele omungome wokeulu, ndelenee Tate Oye te mu pe omungome woshili tau di keulu. Osheshi omungome waKalunga owo tuu ou tau di keulu ndele tau pe ounyuni omwenyo.”

Opo nee ovanhu ova tya: “Omwene, tu pa alushe omungome ou.”

Jesus okwa li a yelifa a ti: “Aame omungome womwenyo. Ou te uya kuame, oye ita fi ondjala, ndele ou ta itavele nge, ita fi vali enota fiyo alushe. Ndelenee ngaashi Ame nde mu lombwela, onye mwa mona nge, nye inamu itavela. Ashishe eshi Tate te shi pe nge, otashi uya kuame. Ndele ou te uya kuame, itandi mu ekeleshi. Osheshi Ame nda dja keulu hakuwanifa ehalo lange mwene, ndelenee ehalo laau a tuma nge. Nehalo laTate ou a tuma nge oleli, ndi ha kanife po nande umwe muava a pa nge, ndelenee ndi va nyumune efiku laxuuninwa. Osheshi ehalo laTate oleli: Keshe tuu ou ta mono Omona ndele te mu itavele, oye e nomwenyo waalushe.”

Eshi Ovajuda va uda Jesus ta ti kutya “Aame omungome ou wa dja meulu,” ova li va hovela okungongota. Ova li va tala ko Jesus e li ashike omona wovanhu vopambelela nova li ve mu pataneka ngaashi ovanhu vokuNasaret va li va ninga, va ti: “Ye ke fi Jesus, omona waJosef, naxe naina tu va shii. Ota ti ngahelipi hano: Ame nda dja meulu?”

Jesus okwa li e va nyamukula a ti: “Inamu ngongotelafana. Kape na ou ta dulu okuuya kuame okuninga Tate, ou a tuma nge, te mu shili. Ndele handi mu nyumuna efiku laxuuninwa. Movaprofeti mwa shangwa: Ndele aveshe tava ningi va longwa kuKalunga. Keshe tuu ou e liudila kuTate ndele a longwa kuye, oye te uya kuame. Hakutya umwe ngeno a mona Tate, oye tuu aeke a dja muKalunga, oye a mona Tate. Oshilishili handi mu lombwele: Ou ta itavele oku nomwenyo waalushe.”

Jesus okwa li a twikila ko ta endulula ta ti: “Aame omungome womwenyo. Ooxo va lile omanna mombuwa, ndele vo va fya. Owo omungome ou tau di meulu, opo keshe omunhu e u lye, ye a ha fye. Aame omungome ou u nomwenyo wa dja meulu. Ngenge umwe ta li omungome ou, oye ta kala e nomwenyo fiyo alushe.” Doshili, ovanhu ngeenge ova kala ve na eitavelo tali longo muJesus, oo a tumwa kuKalunga, otava ka dula okukala nomwenyo waalushe. Kape na omanna ile oikulya imwe tai dulu oku tu pefa omwenyo waalushe.

Osha yela kutya eenghundafana di na sha nomungome oo wa dja meulu oda li da hovela diva konima eshi ovanhu ovo va li va hanga Jesus popepi naKapernaum. Ndele oda li da twikila, ndele tadi ka xula eshi Jesus a li ta hongo ovanhu moshinagoga muKapernaum. Johannes 6:25-51, 59; Epsalme 78:24; Jesaja 54:13; Mateus 13:55-57.

▪ Oiningwanima ilipi ya li ya ningwa po fimbo Jesus a li ina kundafana shi na sha nomungome oo wa dja meulu?

▪ Mokutala koikumwifilonga oyo Jesus a li a longa, omolwashike eshi ovanhu va li va pula kutya Jesus na yandje edidiliko sha li inashi wapala?

▪ Omolwashike Ovajuda va li tava ngongotele Jesus eshi a ti kutya oye omungome washili oo wa dja meulu?

▪ Jesus okwa li peni eshi a li ta kundafana shi na sha nomungome oo wa dja meulu?