Etukulwa 55

Ovahongwa vaJesus vahapu ova li va efa oku mu shikula

ESHI Jesus a li moshinagoga shomuKapernaum, okwa li a honga ovanhu shi na sha nonghandangala oyo ta dana e li omungome washili oo wa dja meulu. Osha yela kutya okwa li a yandja oshipopiwa osho ta twikile kwaasho a li a kundafana novanhu ovo a li a shakena navo fimbo va li tava di kombinga yokoushilo wefuta laGalilea oko va palulilwe pashikumwifilonga nomingome nosho yo eeshi.

Jesus okwa li a twikila neenghundafana daye a ti: ‘Omungome ou handi yandje, oo ombelela yange, ei handi i yandjele ounyuni u mone omwenyo.’ Omido mbali da tetekela, pefimbo lOpaasa yomo 30 O.P., Jesus okwa li a lombwela Nikodemus kutya Kalunga okwa kala e hole ounyuni unene nomolwaasho okwa yandja Omona waye e li Omuxupifi. Onghee hano, Jesus okwa li ta ti kutya keshe tuu omunhu mounyuni oo ta li ombelela yaye meityo lopafaneko, sha hala okutya, e na eitavelo tali longo mekuliloyambo olo a li e li poku ka ninga, ota ka mona omwenyo waalushe.

Ndele ovanhu ova li va pundukifwa keendjovo daJesus odo. Ova li va pula va ti: “Ou ta dulu ngahelipi oku tu pa ombelela yaye tu i lye?” Jesus okwa li a hala ovapwilikini vaye va ude ko kutya okulya ombelela yaye oko ta popi okwopafaneko. Onghee hano, opo Jesus a divilike oshitwa osho, okwa li a tumbula oshinima shimwe vali osho tashi ka kala shii neenghono ngeenge omunhu okwe shi udu ko meityo lolelalela.

Jesus okwa ti: “Ngenge itamu li ombelela yOmona wOmunhu nye itamu nu ohonde yaye, nye kamu na omwenyo munye vene. Ou ta li ombelela yange ye ta nu ohonde yange, oye e nomwenyo waalushe, ndele handi mu nyumuna efiku laxuuninwa. Osheshi ombelela yange oyo eendya dashili nohonde yange oyo oshinuwa shashili. Ou ta li ombelela yange nota nu ohonde yange, oye ta kala muame naame muye.”

Doshili, ngeno Jesus okwa li ta popi shi na sha nokulya ombelela yomunhu yo vene, ngeno ovanhu otava ka kala va limbililwa ehongo laye. Ndele paulelalela Jesus ka li ta popi shi na sha nokulya ombelela yomunhu ile okunwa ohonde meityo lolelalela. Jesus okwa li ashike ta divilike kutya aveshe ovo tava ka mona omwenyo waalushe ove na okukala ve na eitavelo tali longo mekuliloyambo olo Jesus a li ta ka yandja eshi a li ta ka yamba po omwenyo waye wopanhu wa wanenena nokutilashi ohonde yaye oyo i li omwenyo. Nokuli novahongwa vaye vahapu kava li va ninga eenghendabala opo va ude ko ehongo olo, onghee hano, ova tya: “Eendjovo edi dikukutu, olyelye ta dulu oku di pwilikina?”

Eshi Jesus a li a mona kutya ovahongwa vaye vahapu otava ngongota okwa li e va pula a ti: “Eshi oshe mu ningifa omwenyo mwii? Ongahelipi hano, ngenge tamu mono Omona wOmunhu ta londo ta i apa a kala shito? . . . Eendjovo edi nde di mu lombwela, odo omhepo nomwenyo. Ndelenee mokati keni omu na vamwe ihava itavele.”

Jesus okwa li a twikila ko ta ti: “Onghee nde mu lombwela, kape na ou ta dulu okuuya kuame ngenge ite shi pewa kuTate.” Opo nee ovahongwa vahapu vaJesus ova li va efa oku mu shikula. Onghee hano, Jesus okwa li a pula ovayapostoli vaye 12 a ti: “Nanye yo mwa hala okuya?”

Petrus okwa li a nyamukula a ti: “Omwene, otu ye kulyelye ngeno? Ove u neendjovo domwenyo waalushe; ndele fye twa itavela ndele tu shi shii, Oove Omuyapuki waKalunga.” Ovayapostoli ovo kava li tuu va ulika kutya ova kanyatela oudiinini wavo, nonande otashi dulika kava li ve udite ko filufilu osho Jesus a li ta hongo pomhito oyo!

Nonande Jesus okwa li a hokwa enyamukulo laPetrus, okwa ti: “Haame nde mu hoolola, nye omulongo navavali? Ndelenee umwe womunye [oSatana].” Jesus okwa li ta popi shi na sha naJudas Iskariot. Otashi dulika pomhito opo Jesus a li a didilika kutya Judas ota ‘hovele’ okushikula ondjila ya puka.

Jesus okwa li a handukilwa kovanhu eshi a li a henuka eenghendabala davo doku mu ninga ohamba, notashi dulika va li tava tomhafana kutya: ‘Ota kala ngahelipi oye Messias ngeenge ina hala okutambula ko ondodo oyo Messias e na oufemba okukala e na?’ Oshinima osho otashi dulika sha li natango shipe momadiladilo ovanhu. Johannes 6:51-71; 3:16.

▪ Jesus okwa li ta ka pa oolyelye ombelela yaye, nongahelipi va li ve na ‘okulya ombelela yaye’?

▪ Eendjovo daJesus dilipi vali da li da halukifa ovanhu, na Jesus okwa li ta divilike shike?

▪ Eshi ovanhu vahapu va li va efa po okushikula Jesus, Petrus okwa li a nyamukula ngahelipi?