Etukulwa 59

Jesus oye naanaa lyelye?

ESHI owato omo mwa li Jesus novahongwa vaye ya li ya kanghama muBetsaida, ovanhu ova li va eta omulumenhu omupofi kuJesus noku mu indila e mu kume opo e mu twikulule. Jesus okwa li a kwata omulumenhu oo meke ndele te mu twala kondje yomukunda. Opo nee Jesus okwa li a fiila omate pomesho omulumenhu oo ndele te mu pula ta ti: “Ou wete sha?”

Omulumenhu oo okwa li a nyamukula a ti: “Ondi wete ovanhu, osheshi ndi va wete va fa omiti tadi ende.” Jesus okwa li a tenheka omake aye pomesho omulumenhu oo, ndele te mu twikulula opo a mone ko nawa. Opo nee okwa li a lekela omulumenhu oo a ye keumbo nokwe mu lombwela kutya ina ya moshilando.

Okudja opo Jesus novahongwa vaye ova li va ya komikunda dokuKesarea Filippi, osho sha li oule weekilometa 48 lwaapo kolundume elela laPalestina. Ovanhu ngeenge va li tava di kuBetsaida va yuka konhele iwa yaKesarea Filippi ohava ende tava londo. Kesarea Filippi osha li pombada oule weemeta 350 mokuyelekanifa nombada yefuta linene. Olweendo olo otashi dulika la li hali kwata oule womafiku mahapu.

Fimbo va li mondjila, Jesus okwa li a dja po puvo aka ilikane. Pefimbo opo okwa li ashike kwa fyaala eemwedi omuwoi ile omulongo lwaapo fimbo ina fya, nokwa li e na oshisho novahongwa vaye. Ovahongwa vahapu ova li va efa po nale oku mu landula. Vamwe otashi dulika va li va ngwangwana nova nyemata molwaashi Jesus ka li a tambula ko eenghendabala dovanhu doku mu ninga ohamba nosho yo eshi a li ina yandja edidiliko la dja meulu opo a ulike kutya oye ohamba eshi a li a pulwa kovatondi vaye. Mbela ovayapostoli ova li tava ti kutya Jesus oye naanaa lyelye? Eshi va li va ya kuye konhele oko a li a ka ilikanena, Jesus okwa li e va pula a ti: “Ovanhu otava ti Aame olyelye?”

Ovayapostoli ova li ve mu nyamukula va ti: ‘Vamwe otava ti: oJohannes Omuninginifi, vamwe oElia, vamwe oJeremia ile umwe womovaprofeti.’ Ovanhu ova li tava diladila kutya Jesus oumwe womovalumenhu ovo a nyumuka koufi.

Jesus okwa li va li e va pula a ti: “Onye hano tamu ti ngahelipi, Aame olyelye?”

Petrus okwa li a nyamukula meendelelo a ti: “Oove Kristus, Omona waKalunga omunamwenyo.”

Konima eshi Jesus a pandula enyamukulo laPetrus, okwa ti: “Ohandi ku lombwele: oove Petrus, nokemanya tuu eli handi tungile ko eongalo lange, ndee itali ka dulika koivelo yoshovafi.” Tete Jesus okwa li ta shiivifa kutya ota ka tunga eongalo ndele efyo itali dulu okufinda oilyo yalo konima ngeenge oya kala i diinini kombada yedu. Opo nee okwa li a lombwela vali Petrus a ti: “Ame ohandi ke ku pa eeshapi douhamba wokeulu.”

Kungaho, Jesus okwa li a holola kutya Petrus okwa li ta ka pewa omaufembanghenda e likalekelwa. Ashike Petrus ka li a pewa ondodo yotete mokati kovayapostoli vakwao noka li ekanghameno leongalo. Jesus oye Emanya oko kwa li taku ka tungilwa eongalo. Ndele Petrus okwa li ta ka pewa eeshapi nhatu odo a li ta ka longifa okuyandja omhito keengudu dovanhu va dule okuya mOuhamba womeulu.

Petrus okwa li ta ka longifa oshapi yotete pOpentekoste 33 O.P. opo a ulikile Ovajuda ovo ve livela ombedi kutya ove na okuninga shike opo va xupifwe. Okwa li yo ta ka longifa oshapi onhivali konima yaasho opo a pe omhito Ovasamaria ovo va ninga ovaitaveli va dule okuya mOuhamba waKalunga. Opo nee mo 36 O.P., okwa li ta ka longifa oshapi onhinhatu opo a yandje omhito kovanhu ovo vehe fi Ovajuda noinava pita etanda va mone yo omhito yokuya mOuhamba waKalunga, ngaashi Kornelius nookaume kaye.

Jesus okwa li a twikila eenghundafana daye novayapostoli vaye. Okwa li e va nyemateka eshi a li e va lombwela kutya ota ka mona oixuna nota ka fya ngeenge va i kuJerusalem. Molwaashi Petrus okwa li ehe udite ko kutya Jesus ota ka nyumuninwa omwenyo womeulu, okwa li e mu kufa po ndele te mu lombwele ta ti: “Omwene, [lietela onghenda, NW] u ha ningwe ngaha.” Jesus okwa li a pilamena Petrus ndele ta ti: “Dja po puame, Satana. Oove omuhongauli wange, osheshi ove ito diladila osho shaKalunga, ndele [oshosho shovanhu].”

Kakele kovayapostoli, opa li yo ovanhu vamwe ovo va li tava ende pamwe naJesus, nomolwaasho Jesus okwa li e va ifana ndele te va yelifile kutya itashi ka kala shipu kuvo okukala ovashikuli vaye. Okwa li e va lombwela a ti: “Ngenge ku na ou a hala okushikula nge, oye ne lixupule ye mwene, ne litwike [omuti waye womahepeko, NW], ye na shikule nge. Osheshi ou a hala okuxupifa omwenyo waye, oye te u kanifa po, ndele ou ta kanifile nge omwenyo waye, oye ote u limonene.”

Ngeenge ovashikuli vaJesus ova hala okukala va hokiwa kuye, ove na okukala ve na ouladi nove na omhepo yokuninga omaliyambo. Jesus okwa ti: “Osheshi ou ta fi ohoni molwange nomolweendjovo dange mokati kepupi eli lovanyoni vohombo noloulunde, naye tuu ou nOmona wOmunhu ote ke mu fya ohoni, eshi te uya moshinge shaXe pamwe novaengeli vayapuki.” Markus 8:22-38; Mateus 16:13-28, yelekanifa NW; Lukas 9:18-27.

▪ Omolwashike Jesus a li e na oshisho novahongwa vaye?

▪ Ovanhu ova li tava ti kutya Jesus oye naanaa lyelye?

▪ Petrus okwa li a pewa eeshapi dashike, nokwa li e na oku di longifa ngahelipi?

▪ Petrus okwa li a pewa epukululo lilipi, nomolwashike?