Etukulwa 71

Ovafarisai kava li va hala okwiitavela

OVADALI vomulumenhu omweeheli oo a li omupofi ova li va tila eshi va li va ifanwa ve uye kOvafarisai. Ova li ve shii etokolo olo la li la ningwa kutya keshe oo ta itavele Jesus ota ka kondwa mo moshinagoga. Ngeenge omunhu okwa kondwa mo moshinagoga, osha li hashi kala shidjuu neenghono kuye, unene tuu omaukwaneumbo oo a hepa. Onghee hano, ovadali vomulumenhu oo ova li ve na elungi.

Ovafarisai ova li ve va pula tava ti: “Ou omona weni, ou tamu ti a dalwa omupofi? Ota mono ko hano ngahelipi?”

Ovadali ovo ova li va nyamukula Ovafarisai va ti: “Otu shi shii ou omona wetu, ndele a dalwa omupofi. Ndelenee eshi a ninga omunamesho katu shi shii, ndele ou a twikulula omesho aye, katu mu shii.” Osha yela kutya omona wavo okwa li e va lombwela osho sha li sha ningwa po, ndele ovadali ovo ova li va popya nelungi va ti: “Mu puleni, ye omukulunhu, ne lipopile mwene.”

Opo nee Ovafarisai ova li va ifana vali omulumenhu oo a li omupofi, ndele oshikando osho ova li va kendabala oku mu tilifa moku mu lombwela kutya ova konga oumbangi oo tau ulike kutya Jesus oku na ondjo. Ova li va lombwela omulumenhu oo va ti: “Pa Kalunga efimano, otu shi shii omulumenhu winya omulunde.”

Omulumenhu oo a li omupofi ka li a pataneka omapopyo Ovafarisai, ndele ponhele yaasho, okwa li e va lombwela a ti: “Ngenge ye omulunde kandi shi shii, shimwe ashike ndi shi shii, onda li omupofi, ndele paife ondi wete ko.”

Ovafarisai ova li va kendabala okumona epuko moumbangi womulumenhu oo, eshi va li ve mu pula va ti: “E ku ninga ngahelipi hano, omesho oye okwe a twikulula ngahelipi?”

Omulumenhu oo okwa li e va lombwela a ti: “Nde shi mu lombwela nale, ndele inamu uda ko? Omwa hala hano shike mu shi ude vali?” Okwa li yo e va pula te va sheke a ti: “Omwa hala mu ninge ovalongwa vaye?”

Ovafarisai ova li va handukifwa kenyamukulo lomulumenhu oo, ndele tava ti: “Oove omulongwa waye, fye ovalongwa vaMoses. Otu shi shii Kalunga okwa popifa Moses, ndele ou, katu mu shii apa a dja.”

Omulumenhu omulininipiki oo a li omweeheli okwa li e va nyamukula a kumwa a ti: “Oshinima tashi kumifa nge osheshi, eshi mu he shii apa a dja, nande okwa twikulula omesho ange.” Ova li tava dulu okufika pexulifodiladilo lilipi okudja meendjovo odo? Omweeheli oo okwa li a popya kombinga yefinamhango la tambulwa ko, a ti: “[Otu] shi shii Kalunga iha udu ovalunde, ndele ou ha tila Kalunga ndee ta wanifa ehalo laye, ota udika kuye: Okudja kehovelo lounyuni inaku udika omunhu a twikulula omesho omunhu a dalwa omupofi.” Onghee hano, exulifodiladilo ola yela kutya: “Ou ngeno ke fi womuKalunga ngeno ke na eshi ta dulu okuninga.”

Ovafarisai kava li tava dulu okunyamukula okutomhafana kwomulumenhu oo kwa yela nokwopandunge. Kava li va hala okudimina oshili, onghee hano ova li va sheka omulumenhu oo tava ti: “Ove owa dalwa moulunde wovenevene, ndele wa hala u tu longe.” Opo nee konima yaasho, ova li ve mu undulila pondje, tashi dulika va li ve mu konda mo moshinagoga.

Eshi Jesus a li a uda shi na sha naasho Ovafarisai va li va ninga, okwa li a ya komulumenhu oo ndele ta ti: “Ove ho itavele tuu Omona waKalunga?”

Omulumenhu oo a li omupofi okwa li a nyamukula a ti: “Omwene, ye olyelye, ndi mu itavele?”

Jesus okwa li a nyamukula a ti: ‘Oye ta popi naave, Oye tuu ou.’

Diva omulumenhu oo okwa li a twa eengolo koshipala shaJesus, ndele ta ti: ‘Omwene, ohandi itavele.’

Opo nee Jesus okwa li a yelifa a ti: “Ame onde uya mounyuni ou okuninga etokolo. Ava ihava mono ko, va mone ko. Naava hava mono ko, va twike.”

Ovafarisai ovo va li tava pwilikine ova li va pula va ti: “Nafye yo ovapofi hamba?” Ngeno ova li va dimina kutya ove li ovapofi pamadiladilo, ngeno otava dulu okulipopila eshi tava pataneke Jesus. Jesus okwa li e va lombwela a ti: “Ngeno nye ovapofi, ngeno kamu netimba.” Ndele nande ongaho, ova li va popya nomitima dikukutu kutya vo kave fi ovapofi noinava pumbwa ouyelele wopamhepo. Onghee hano, Jesus okwa li e va lombwela a ti: “Eshi hamu ti: ohatu mono ko, etimba leni otali kalelele.” Johannes 9:19-41.

▪ Omolwashike ovadali vomulumenhu omweeheli oo a li omupofi va li va tila eshi va li va ifanwa kOvafarisai, novadali ovo ova li va nyamukula ngahelipi nelungi?

▪ Ovafarisai ova li va kendabala ngahelipi okutilifa omulumenhu oo a li omupofi?

▪ Okutomhafana kwopandunge kwomulumenhu oo a li omupofi kulipi kwa li kwa handukifa Ovafarisai?

▪ Omolwashike Ovafarisai va li vehe na elipopilo eshi va li tava pataneke Jesus?