Etukulwa 73
Omusamaria omunamutimanghenda
OTASHI dulika Jesus a li popepi naBetania, omukunda oo wa li eekilometa 3 okudja kuJerusalem. Okwa li a pulwa komulumenhu umwe oo a li e shii nawa Omhango yaMoses, a ti: “Omuhongi, ondi na okulonga shike ndi fyuulule omwenyo waalushe?”
Jesus okwa li a mona kutya omulumenhu oo omutokoli ka li ta pula molwaashi a hala ouyelele, ndele ponhele yaasho, okwa li a hala oku mu yeleka. Omutokoli oo otashi dulika a li a lalakanena okuningifa Jesus a nyamukule monghedi oyo tai ka handukifa Ovajuda ovo va li hava handuka diva. Onghee hano, Jesus okwa li a efa omutokoli oo a nyamukule ye mwene, moku mu pula a ti: “Momhango omwa shangwa ngahelipi? Oho lesha mo ngahelipi?”
Omutokoli oo okwa li a nyamukula ta ulike ounongo udidilikwedi, a tofa momhango yaKalunga muDeuteronomion 6:5 naLeviticus 19:18, a ti: “Hola Omwene Kalunga koye nomutima woye aushe nomwenyo woye aushe neenghono doye adishe neendunge doye adishe, nomukweni ngaashi ove mwene.”
Jesus okwa li e mu nyamukula a ti: “Wa nyamukula sha yuka, shi wanifa opo to kala u nomwenyo.”
Ashike omutokoli oo ka li a wanenwa kenyamukulo olo Jesus a li e mu pa. Okwa li a hala Jesus e mu shilipaleke ngeenge etaleko laye oli li ngoo mondjila nonokutya oha ungaunga ngoo navamwe pauyuki. Onghee hano, omutokoli oo okwa li a pula a ti: “Omukwetu olyelye?”
Ovajuda ova li va itavela kutya outumbulilo “omukwetu” otau ulike ashike kOvajuda vakwao, ngaashi sha fa tashi ulikwa koshikalimo shaLeviticus 19:18. Konima yefimbo, omuyapostoli Petrus okwa li a popya a ti: “Nye omu shi shii Omujuda okwa dilikwa okweendafana nomunailongo nokuya kuye.” Onghee hano, omutokoli oo nosho yo tashi dulika ovahongwa vaJesus, ova li va itavela kutya otava longo ouyuki ngeenge ova ungaunga nawa nOvajuda vakwao aveshe, molwaashi pataleko lavo, ovanhu ovo vehe fi Ovajuda kave fi lela vakwao.
Mbela Jesus okwa li ta ka pukulula etaleko lovapwilikini vaye ngahelipi nopehe na oku va nyemateka? Okwa li e va hokololela ehokololo, tashi dulika le likolelela koshinima sha ningwa shili. Jesus okwa li a hokolola a ti: “Omulumenhu wonhumba [Omujuda] a dja muJerusalem ta i kuJeriko nokwa hangika kovanyeki, ve mu dula aishe, ndele ve mu denga oipute, ndele ova ya ve mu fiya po e na okamwenyo kanini.”
Jesus okwa li a twikila ko a ti: “Nomupristeri wonhumba a hangika ta ende nondjila ei, okwe mu mona, ndele okwe mu pitilila po. Nomuleviti osho yo; eshi e uya poima opo, okwe mu mona ndele okwe mu pitilila po. [Ndelenee] Omusamaria umwe a enda nondjila ei, eshi e uya po, okwe mu mona, ndele okwe mu fila onghenda.”
Ovapristeri vahapu nosho yo ovayakuli vavo vokotembeli Ovalevi ova li hava di muJeriko, osho sha li eekilometa 23 okudja pondjila oyo ya nyika oshiponga, oyo ya li hai endwa eemeta 900 okudja kotembeli kuJerusalem oko va li hava ka longa. Omupristeri oo nOmulevi okwa li ve na ngeno okukwafela Omujuda mukwao oo a li moudjuu, ndele kava li ve mu kwafela. Ponhele yaasho, Omujuda oo okwa li ashike a kwafela kOmusamaria. Ovajuda ova li ve tonde Ovasamaria neenghono, nomolwaasho ova hangwa opo va li va tuku Jesus moku mu ula “Omusamaria,” outumbulilo oo va li va tala u li omutyanai.
Omusamaria oo okwa li a ninga po shike opo a kwafele Omujuda oo? Jesus okwa ti: “Okwa ya kuye, a manga oipute yaye, a tila mo omaadi nomaviinyu, okwe mu londeka koshilondwa shaye, ndele okwe mu twala kongulu yovaenda ndele te mu xungu. Ndele mefiku la shikula mokufikama kwaye, okwa kufa eendenari mbali [ondjabi yomafiku avali lwaapo], okwe di pa mwene weumbo lovaenda ndele okwa tya: Mu xunga, ndele ngenge itadi wana, ohandi ku pe mokwaaluka.”
Konima eshi Jesus a hokolola ehokololo olo, okwa li a pula omutokoli oo a ti: “Elipi po muava vatatu a li mukwao womunhu ou a hangikile kovanyeki?”
Molwaashi omutokoli oo okwa li a fya ohoni okutumbula kondadalunde kutya Omusamaria oye a kwafela Omujuda, okwa ti: “Ou e mu fila onghenda.”
Jesus okwa li a xulifa a ti: “Naave yo inda u ka ninge ngaha.”
Ngeno Jesus okwa lombwelele omutokoli oo kondadalunde kutya ovanhu ovo vehe fi Ovajuda navo oovakwao, ngeno omulumenhu oo haye aeke a anya oshinima osho, ndele otashi dulika ngeno vahapu vomovapwilikini va kala va ama kombinga yomutokoli oo a li ta kundafana naJesus. Ndele ehokololo olo tashi dulika la ningwa shili ola li la yelifa nawa monghedi ihe fi okupatanekwa kutya oovakwetu ova kwatela mo ovanhu vomihoko adishe novomoiwana aishe. Onghedi yaJesus yokuhonga kaya li tuu ya denga mbada! Lukas 10:25-37; Oilonga 10:28; Johannes 4:9; 8:48.
▪ Omutokoli umwe okwa li a pula Jesus omapulo elipi, nokwa li ta pulile shike?
▪ Ovajuda ova li va itavela kutya oovakwao oolyelye, netomheno lilipi tali ulike kutya ovahongwa navo ova li ve na etaleko la tya ngaho?
▪ Jesus okwa li a yelifa ngahelipi etaleko olo li li mondjila opo omutokoli oo ehe li pataneke?