Etukulwa 80

Oiunda yeedi nomufita

JESUS okwa li a ya kuJerusalem a ka dane Oshivilo shEyapulo ile Hanukka, oshivilo osho sha li hashi danwa omolwokuyapulululwa kwotembeli yaJehova. Mo 168 K.O.P., omido 200 lwaapo da pita, Antiokus IV Epifanes okwa li a kwata ko Jerusalem ndele ta hanauna po otembeli yasho noaltari. Ashike konima yomido nhatu, Jerusalem okwa li sha kwatululwa ko vali notembeli oya li ya yapulululwa. Konima yaasho, okwa li haku danwa oshivilo sheyapulo omudo keshe.

Oshivilo shEyapulo osha li hashi danwa mo 25 aKislev, omwedi wOshijuda oo tau tu kumwe nexulilo laNovemba nosho yo ehovelo laDesemba mokalindeli kokunena. Kungaho, kOpaasa yomo 33 O.P. okwa li ashike kwa xupa omafiku e dule pefele. Omuyapostoli Johannes okwa ti kutya efimbo ola li “okufu” molwaashi pefimbo opo okwa li ku na outalala.

Jesus okwa li a longifa efaneko omo a li a tumbula oiunda yeedi itatu nosho yo onghandangala oyo ta dana e li Omufita Muwa. Oshiunda sheedi shotete osho a li a tumbula osha li elongekido lehangano lOmhango yaMoses. Omhango oya li ngaashi oluumbo lodalate olo la li la yoolola ko Ovajuda keenghedi da nyonauka dovanhu ovo va li vehe li mehangano laKalunga le likalekelwa. Jesus okwa ti: “Oshilishili ohandi mu lombwele: ou ita i moshiunda sheedi ta piti moshivelo, ndee ta piti pamwe pelili ta pumine mo, oye omulunga nombudi. Ndelenee ou ta i mo ta piti moshivelo, oye omufita weedi.”

Ovanhu vamwe ova li have liti kutya ovo Messias ile Kristus, ndele kava li omufita washili oo Jesus a li a twikila okupopya a ti: “Oye ta yeululwa komukeleli woshivelo, needi otadi udu ondaka yaye; nota ifana eedi daye omadina ado, ndee te di pitifa mo. . . . Ndele umwe elili itadi mu shikula, otadi mu i onhapo, osheshi kadi shii ondaka [yavamwe] velili.”

‘Omukeleli woshivelo’ shoshiunda sheedi shotete okwa li Johannes Omuninginifi. E li omukeleli woshivelo, Johannes okwa li a ‘yeulula’ Jesus moku mu hololela eedi dopafaneko odo kwa li ta ka lifa. Jesus okwa popya kutya eedi odo a li ta ka ifana komadina noku di lifa xuuninwa oda li tadi ka twalwa moshiunda sheedi shimwe vali, eshi a ti: “Oshilishili ohandi mu lombwele: Aame oshivelo sheedi,” sha hala okutya, oshivelo shoshiunda sheedi shipe. Eshi Jesus a li a dika po ehangano lipe novahongwa vaye nosho yo eshi va li va tililwa omhepo iyapuki okudja meulu pOpentekoste oyo ya li ya landula ko, ova li va tambulilwa moshiunda sheedi shipe.

Natango, Jesus okwa li a yelifa shi na sha nonghandangala oyo ta dana a ti: ‘Aame oshivelo. Ngenge pe na ou ta i mo ta piti muame, oye ta xupifwa, ndele ta kala nokuya mo nokudja mo, ndee ta mono oulifilo. Ame nde uya, vo va kale nomwenyo nouyadi. Aame omufita ou muwa, eedi dange ondi di shii, needi dange odi shii nge, ngaashi Tate e shii nge, naame onda shiiva Tate. Nomwenyo wange ohandi u yandjele eedi.’

Jesus okwa li a hangwa opo a hekeleke ovashikuli vaye a ti: “Ino tila, okangudu ove, osheshi Xo a hala oku mu pa ouhamba.” Okangudu oko, oko ka li taka ka kala ka fikama po momuvalu wovanhu 144 000, oka ya moshiunda sheedi osho shipe ile oshitivali. Ndele Jesus okwa li a twikila ko a ti: ‘Ondi na yo eedi dimwe, dihe fi domoshiunda eshi; nadinya ondi noku di eta mo, ndee tadi udu ondaka yange, ndee tapa ka kala oshiunda shimwe, nomufita umwe.’

Molwaashi ‘eedi dimwe’ kadi fi “domoshiunda eshi,” odi na okukala di li moshiunda shimwe, oshititatu. Eedi domoiunda oyo ivali yaxuuninwa itadi ka kala ponhele imwe. “Okangudu” oko ke li moshiunda shimwe otaka ka pangele pamwe naKristus meulu, ofimbo ‘eedi dimwe’ odo di li moshiunda shikwao tadi ka kala mOparadisa kombada yedu. Ndele nonande eedi odo odi li moiunda ivali, ka di ninafane ondubo noka di udite de litulilwa, molwaashi oda ninga “oshiunda shimwe” nodi na ‘omufita umwe,’ ngaashi Jesus a popya.

Omufita Muwa, Jesus Kristus, okwa yandja omwenyo waye nehalo liwa omolwoiunda yeedi oyo. Okwa ti: ‘Ohandi yandjele eedi omwenyo wange.’ Okwa ti vali: “Ame ondi neenghono oku u yandja, ndele ondi neenghono oku u tambula vali. Oshipango eshi onde shi pewa kuTate.” Eshi Jesus a li a popya eendjovo odo, mokati kOvajuda omwa li mwa tukuluka etukauko.

Ovanhu vahapu ovo va li po ova li va popya va ti: “Ye oku nondemoni, ndee ta i eenghwengu; oshike tamu mu pwilikinine?” Vamwe ova ti: “Eendjovo edi kadi fi daau e neendemoni.” Opo nee ova li va weda ko tashi dulika tava popi shi na sha naashi Jesus a li a twikulula omulumenhu omupofi eemwedi opo da piti va ti: “Ondemoni otai dulu tuu mbela okupashukifa omesho ovapofi?” Johannes 10:1-22, yelekanifa OB-1986; 9:1-7; Lukas 12:32; Ehololo 14:1, 3; 21:3, 4; Epsalme 37:29.

▪ Oshivilo shEyapulo oshike, nosha li hashi danwa naini?

▪ Oshiunda sheedi shotete otashi ulike kushike, nolyelye a li omukeleli washo wopomuvelo?

▪ Omukeleli wopomuvelo okwa yeulula ngahelipi Omufita, needi oda li da efwa di ninge shike konima yaasho?

▪ Oolyelye ve li oiunda ivali yOmufita Muwa, nova ka ninga oiunda ingapi?