Etukulwa 83

Jesus ta yakulwa kOmufarisai

JESUS okwa li natango meumbo lOmufarisai oo a li a tumbala, nokwa li ashike opo a velula omulumenhu oo a li e na oitumbuka. Eshi Jesus a li a mona ovaenda vakwao va li ve lihoololela oipundi yokomesho poshililo, okwa li e va honga oshilihongomwa shi na sha nelininipiko.

Jesus okwa ti: “Ngenge ove to ifanwa kuumwe koshivilo shehombolo, ino kala omutumba koshipundi shokomesho, pu ha [ningwe] ngenge tape uya omwiifanwa umwe e ku dule oulenga, ndele ou e mu ifana amushe, ngenge te uya a ha tye kuove: Yapukila ou ndele opo u nokuya koshipundi shokonima wa fya ohoni.”

Jesus okwa li e va lombwela a ti: “Ngenge wa [ifanwa] ko, kala omutumba koshipundi shokonima, naau e ku ifana, ngenge te uya mo ote ku lombwele: Kaume kange, ehena pombada, opo oto fimanekwa moipafi yaaveshe ve li pamwe naave poshililo.” Jesus okwa li a xulifa a ti: ‘Osheshi keshe ou te linenepeke ota ninipikwa, naau te lininipike ota ka nenepekwa.’

Opo nee, Jesus okwa li a popya nOmufarisai oo a li e mu shiva nokwa li a yelifa nghee okulongekidila umwe ouvalelo sha fimana momesho aJehova. Okwa ti: “Ngenge to pake po omwisha ile ouvalelo, ino ifana ookaume koye ile ovamwanyoko ile ovakweni ile ovashinda voye oipuna, ve he ku ifane yo, ove u futwe ngaha. Ndele ngenge to pake po oitelekela, ifana ovakwanaluhepo noingudu noilema novapofi. Ndele ove to ningi omunelao, osheshi ovo ve he na eshi tave ku pe.”

Okulongekidila oikulya ovanhu ovo ve li moluhepo otashi ke ku etela ehafo molwaashi ‘oto ka futilwa menyumuko lovayuki,’ ngaashi Jesus a li a yelifila omunhu oo a li e mu shiva. Okuhokolola kwaJesus shi na sha nouvalelo oo u hafifa okwa li kwa dimbulukifa omweenda umwe shi na sha nouvalelo wonhumba. Omweenda oo kwa ti: “Omunelao ou ta ka lya omungome mouhamba waKalunga.” Ashike, havanhu aveshe ve na olupandu li na sha netimaumbwile olo lihafifa, ngaashi Jesus e ke shi ulika okupitila mefaneko.

Jesus okwa hokolola a ti: “Omulumenhu umwe okwa teleka oitendele inene, ndele a shivila mo vahapu. . . . Ye okwa tuma ko omupiya waye a ka lombwele ovashivwa: Ileni, osheshi ashishe sha longekidwa nokuli. Ndele vo aveshe ova hovela okwaanya panghedi imwe. Wotete okwa tya kuye: Ame nde lilandela epya, ndi nokuya ko ndi li tale, ohandi ku indile, popile nge. Namukwao okwa tya: Ame nda landa eenani deendjoko nhano, ondi na oku ke di hetekela, handi ku indile, popile nge. Nomukwao vali okwa tya: Ame onda hombola, onghee itandi shiiva okuya ko.”

Kae fi tuu omalipopilo ongaho! Omunhu oha konakona epya ile oimuna fimbo ine i landa, onghee hano kasha li vali oshinima sha endelele okuya e ke i tale konima eshi omunhu ei landa. Sha faafana, okuhombola itaku imbi omunhu a tambule ko eshivo olo la fimanenena. Onghee hano, omwene oo eshi a li a uda omalipopilo oo, okwa li a handuka.

Omwene oo okwa li a lombwela omupiya waye a ti: “Endelela, inda keendjila nokomalila oshilando, ove u ka ete mo oingudu neehepele novapofi noilema. Ndele omupiya okwa tya: Omwene, nda wanifa eendjovo doye, ndele natango ope nonhele. Omwene okwa lombwela omupiya: Inda komalila omikunda nokomangholo eengubu, ove u va kondjife shili okuuya mo, eumbo lange li yade, . . . kape na nande umwe womovalumenhu venya va ifanenwe ta makele oitendele yange.”

Mefaneko olo otamu hokololwa onghalo ilipi? “Omwene” oo a li a teleka oitendele ota faneke Jehova Kalunga, “omupiya” oo a li a ka shiva ovanhu ota faneke Jesus Kristus, ofimbo “oitendele inene” otai faneke eemhito dokuya mOuhamba womeulu.

Ovanhu ovo va li va shivwa tetetete va mone omhito yokuya mOuhamba ova li ovawiliki velongelokalunga lOshijuda vopefimbo laJesus. Ndele ovawiliki ovo kava li va tambula ko eshivo olo. Onghee hano, okuhovela pOpentekoste yomo 33 O.P., opa li vali pa shivwa ovanhu vamwe vomoshiwana shOvajuda ovo va li va dinika nova lyatelwa pedu. Ndele ovo va li va tambula ko eshivo olo kava li va wanifa po omuvalu 144 000 waavo tava kaya mOuhamba waKalunga womeulu. Onghee hano, mo 36 O.P., eshi pa li pita omido nhatu netata, opa li vali pa shivwa ovanhu vamwe oshikando oshititatu noshaxuuninwa, ovo va li vehe fi Ovajuda noinava pita etanda, nokwoongelwa kwovanhu ovo okwa twikila fiyo opefimbo letu. Lukas 14:1-24.

▪ Jesus okwa li a honga oshilihongomwa shilipi shi na sha nelininipiko?

▪ Ongahelipi oikulya yomunhu oo a shiva vamwe tai dulu okukala ya hokiwa kuKalunga, nongahelipi hashi etele omunhu oo ehafo?

▪ Omolwashike omalipopilo ovanhu ovo va li va shivwa a li ongaho?

▪ Efaneko laJesus li na sha ‘noitendele inene’ otali faneke shike?