Etukulwa 88

Oshipuna naLasarus

JESUS okwa li ta popi novahongwa vaye kombinga yokulongifa nawa oinima yopamaliko, noku va yelifila kutya itatu dulu okukala ovapiya vomaliko nopefimbo opo tuu opo otu li ovapiya vaKalunga. Ovafarisai navo ova li tava pwilikine nova li va hovela okusheka Jesus molwaashi ova li ve hole oimaliwa. Onghee hano, Jesus okwa li e va lombwela a ti: “Onye tuu ovo hamu lipe ouyuki moipafi yovanhu, ndelenee Kalunga e wete omitima deni, osheshi osho sha fimana povanhu, osho oixuna puKalunga.”

Efimbo ola li la fika opo onghalo i pilukile po ovanhu ovo va li oipuna mounyuni, ovanapolotika ovanaenghono nosho yo ovo va li hava wilike omalongelokalunga noku a nwefa mo. Ovanhu va tya ngaho ova li tava ka ninipikwa, ofimbo ovanhu ovo va li ve shii omhumbwe yavo yopamhepo va li tava ka tumbalekwa. Jesus okwa li a popya elunduluko la tya ngaho eshi a li a popya nOvafarisai.

Jesus okwa ti: “Ndele omhango novaprofeti oda xulila muJohannes [Omuninginifi], ndele okudja kefiku olo ondaka iwa youhamba waKalunga otai udifwa, ndele aveshe tave liundulile mo neenghono. Ndelenee eulu nedu nande naa xule po, [momhango] itamu di nande oshinghwanyu shimwe.”

Ovanongo vomishangwa nOvafarisai ova li ve udite etumba eshi va li tave liti kutya ohava diinine Omhango yaMoses. Dimbuluka kutya eshi Jesus a li a twikulula omulumenhu umwe pashikumwifilonga muJerusalem, ova li ve litada va ti: “Fye ovalongwa vaMoses. Otu shi shii Kalunga okwa popifa Moses.” Ashike Omhango yaMoses oya li ya wanifa elalakano layo olo ya li ya nuninwa, li na sha nokutwala ovalininipiki kOhamba ya tulwa po kuKalunga, Jesus Kristus. Onghee hano, eshi Johannes a li a hovela oukalele waye, ovanhu vomaludi aeshe, unene tuu ovalininipiki neehepele, ova kala tava kendabala noudiinini opo va ninge ovapangelwa vOuhamba waKalunga.

Molwaashi Omhango yaMoses oya li tai wanifwa pefimbo opo, kasha li va li oshiteelelwa kovanhu okuwanifa po Omhango oyo. Omhango oya li ya efa ovanhu va teye ohombo omolwomatomheno e lili noku lili, ndele Jesus okwa li a popya a ti: “Keshe tuu ou ta henge po omukainhu waye ndele ota hombola umwe [e lili], oye ta haele, naau ta hombola omuhengwa, ota haele.” Eendjovo odo kada li tuu da handukifa Ovafarisai, unene tuu molwaashi ohava efa ovanhu va teye ohombo omolwomatomheno mahapu!

Jesus okwa li a twikila okupopya nOvafarisai moku va hokololela efaneko li na sha novalumenhu vavali ovo va li meenghalo da yoolokafana, ndele xuuninwa tadi ka lunduluka filufilu. Mbela oto dulu okumona kutya ovalumenhu ovo otava faneke oolyelye nosho yo kutya eenghalo davo odo da li da lunduluka oda hala okutya shike?

Jesus okwa hokolola a ti: “Okwa li ku nomulumenhu oshipuna a djala oikutu itiliyana naai itoka iwa, ndele okwa nyakukwa omafiku aeshe mewano loinima yaye. Ndele ohepele imwe, edina layo Lasarus a nangala poshivelo shaye nolutu laye alishe la tuta omatito, ndele okwa hala okulikutifa noundjaumukile ava hava u koshililo shoshipuna. Neembwa ode uya ndele oda lafa omatito aye.”

Oshipuna osho Jesus a longifa mefaneko olo otashi faneke ovawiliki vomalongelokalunga Oshijuda, ovo va li va kwatela mo Ovafarisai, ovanongo vomishangwa, Ovasadukai nosho yo ovapristeri ovakulunhu. Ovanhu va tya ngaho ova li oipuna momaufembanghenda opamhepo, nova li have lihumbata ngaashi omulumenhu oo oshipuna. Oikutu yavo itilyana youkengeli otai faneke eendodo davo dopombada, noikutu itoka otai faneke okulishii ouyuki kwavo.

Ongudu yomulumenhu oshipuna oyo i na ounhwa oya li ya dina eehepele novanhu vongaho, nohai va ifana ‛am ha·’aʹrets, ile ovakwadu. Lasarus omweeheli okwa li ta faneke ovanhu ovo va lumbulwa eendja diwa dopamhepo nosho omaufembanghenda kovawiliki vomalongelokalunga. Onghee hano, ngaashi Lasarus a li e na omatito, ovanhu vongaho ova dinika va fa ovanhu tava vele pamhepo nova wana ashike okweendafana neembwa. Ndele nande ongaho, ovanhu ovo vongudu yaLasarus ova fya ondjala nenota loinima yopamhepo, nomolwaasho ve li poshivelo, tava kongo oundjaumukile voikulya yopamhepo ovo tava u koshililo shoshipuna.

Jesus okwa li a popya kombinga yanghee eenghalo doshipuna naLasarus da li da lunduluka. Eenghalo odo oda li da lunduluka ngahelipi, notadi faneke shike?

Eenghalo doshipuna naLasarus tadi lunduluka

Oshipuna otashi faneke ovawiliki vomalongelokalunga ovo ve na omaufembanghenda opamhepo, ofimbo Lasarus ta faneke ovanhu vongaho ovo va fya ondjala yoinima yopamhepo. Jesus okwa li a twikila ehokololo olo ta yelifa nghee eenghalo davo da li da lunduluka filufilu.

Jesus okwa ti: “Ndele opa ningwa nee, ohepele ya fya, ndele oya twalwa kovaengeli mekolo laAbraham, noshipuna osha fya yo, ndele tashi pakwa. Ndele mokukala mouyahame moshovafi, eshi sha yelula omesho asho, osha mona Abraham kokule naLasarus mekolo laye.”

Molwaashi oshipuna naLasarus kave fi ovanhu vovene vene, ndele otava faneke ashike eengudu dovanhu, osha yela kutya efyo lavo nalo oshinima ashike shopafaneko. Mbela efyo lavo otali faneke shike?

Jesus okwa li ashike opo a mane okupopya kombinga yanghee eenghalo doshipuna naLasarus da li tadi ka lunduluka mokupopya kutya ‘omhango novaprofeti oda xulila muJohannes Omuninginifi, ndele okudja kefiku olo ondaka iwa youhamba waKalunga otai udifwa.’ Onghee hano, Lasarus noshipuna ova li va fya meenghalo davo dopefimbo leudifo laJohannes nolaJesus.

Ovalininipiki vomongudu yaLasarus ovo ve li vela ombedi ova fya eshi va dja monghalo yokulumbulwa oikulya yopamhepo ndele tava i monghalo oyo ya hokiwa kuKalunga. Nonande ova li nale hava kala tava kongo oundjaumukile ovo tava u koililo yopamhepo yovawiliki vomalongelokalunga, paife ova palulwa koshili yopamishangwa oyo Jesus a honga. Kungaho, ova fa va etwa mekolo ile monghalo ya hokiwa kuAbraham Munene, Jehova Kalunga.

Mepingafano naasho, ovo ve li ongudu yoshipuna ova ka kala inava hokiwa kuKalunga molwaashi ova kala inava hala okutambula ko etumwalaka lOuhamba olo Jesus a li ta hongo. Kungaho, ova li va fya mo monghalo yavo yonale oyo ya li ya fa ya hokiwa. Ova popiwa pafaneko kutya otava yahama. Natu ka pwilikine kutya oshipuna osha li sha tya ngahelipi.

Oshipuna osha ti: “Tate Abraham, file nge onghenda, ove u tume Lasarus a yaveke oxulo yomunwe waye momeva, ye a talaleke elaka lange, osheshi ame ndi li mo handi yahamekwa nai momutemo ou.” Etumwalaka letokolo laKalunga la kwata moiti olo la li tali udifwa kovahongwa vaJesus olo la li tali yahameke ovanhu vomongudu yoshipuna. Ova li va hala ovahongwa va efe po okuudifa etumwalaka olo, nokungaho, ova li tava ka mona epepelelo lonhumba kouyahame wavo.

“Abraham okwa tya: Omona wange, dimbulukwa, ove owa [pelwe] ouwa woye fimbo wa li u nomwenyo ndele Lasarus owii, hano paife eshi ye ota hekelekwa omu, ndele ove to yahamekwa. Ndelenee oku na vali [ombwili] inene ya tulwa pokati ketu nanye, opo aveshe venya va hala okutaulukila kunye, va ha dule, naavo ve li oko va ha dule okuuya kufye.”

Omalunduluko oo a li a ningwa pokati kongudu yaLasarus nongudu yoshipuna okwa yeleka noku li pauyuki. Omalunduluko oo okwa li a wanifwa konima yeemwedi dinini pOpentekoste 33 O.P., eshi ehangano lOmhango la li la pingenwa po kehangano lipe. Opo nee okwa li sha yela nawa kutya ovahongwa ova hokiwa kuKalunga, ndele havaFarisai nosho yo ovawiliki vamwe vomalongelokalunga. ‘Ombwili inene’ oyo ya li ya tongola ko oshipuna pafaneko kovahongwa vaJesus otai faneke etokolo laKalunga ihali lunduluka noli li pauyuki.

Oshipuna osha li va li sha pula “Tate Abraham” sha ti: “Tuma [Lasarus] keumbo latate, osheshi ondi na ovamwameme ovalumenhu vatano.” Kungaho, oshipuna osha li sha popya kutya oshi na ekwatafano lopofingo naxe umwe, Satana Ondiaboli. Oshipuna osha li tashi pula Lasarus a haule etumwalaka laKalunga letokolo opo aha tule ‘ovamwaina vasho vatano,’ sha hala okutya, ookaume kaye vopalongelokalunga, “monhele ei yomayahamo.”

“Abraham okwa tya: Vo ove na Moses novaprofeti, nava ude venya.” Opo ‘ovamwaina vatano’ voshipuna vaha ka yahamekwe, ove na ashike okudulika keendjovo daMoses nosho yo dOvaprofeti ovo tava popi kutya Jesus oye Messias nokuninga ovahongwa vaye. Ashike oshipuna kasha li sha twa kumwe neendjovo odo eshi sha ti: “Ahowe, tate Abraham, ngenge oumwe womovafi ta i ko kuvo, ngeno tave lidilulula.”

Oshipuna osha li sha lombwelwa kutya: “Ngenge itava udu [Moses] novaprofeti, itava itavelifwa nande namu nyumuke umwe womovafi.” Kalunga ka li ta ka yandja edidiliko le likalekelwa ile oshikumwifilonga opo a itavelife ovanhu. Ove na okulesha Omishangwa noku di tula moilonga ngeenge ova hala okukala va hokiwa kuye. Lukas 16:14-31; Johannes 9:28, 29; Mateus 19:3-9; Ovagalati 3:24; Ovakolossi 2:14; Johannes 8:44.

▪ Omolwashike efyo loshipuna naLasarus li li oshinima shopafaneko, noshike sha li tashi fanekwa kefyo lavo?

▪ Omalunduluko elipi a li a ningwa pehovelo loukalele waJohannes, ngaashi Jesus e shi popya?

▪ Oshike sha li tashi xulifwa po konima yefyo laJesus, naasho osha li tashi ka kuma ngahelipi oshinima shi na sha neteyohombo?

▪ Mefaneko laJesus, oolyelye va li tava fanekwa koshipuna naLasarus?

▪ Ouyahame ulipi wa li tau yahameke oshipuna, nosha li tashi pula shi pewe epepelelo okupitila mushike?

▪ ‘Ombwili inene’ otai faneke shike?

▪ Olyelye a li lela xe yoshipuna, novamwaina vatano ovo oolyelye?