Etukulwa 90
Eteelelo lenyumuko
JESUS okwa li a fika popepi naBetania, omukunda oo wa li eekilometa 3 okudja kuJerusalem. Opa pita ashike omafiku manini okudja eshi Lasarus a fya nokwa pakwa. Ovamwaina vaLasarus, Maria naMarta ova li natango tava lili, novanhu vahapu ova li ve uya keumbo lavo ve va hekeleke.
Fimbo va li natango tava lili, omunhu umwe okwa li a shiivifila Marta kutya Jesus oku li mondjila. Onghee hano, Marta okwa li a ya ta endelele a ka shakeneke Jesus, tashi dulika a ya i na lombwela omumwaina Maria. Eshi Marta a li a fika puJesus, okwa li a endulula eendjovo odo tashi dulika va kala tava endulula luhapu oule womafiku ane oo a pita po, a ti: “Omwene, ngeno Ove wa li po, ngeno omumwameme ina fya.”
Ndele Marta okwa li a ulika kutya oku na eteelelo, nokwa li ta diladila kutya Jesus otashi dulika natango a ninge po sha shi na sha nomumwaina. Marta okwa ti: “[Paife] ondi shi shii, keshe eshi to indile Kalunga, Kalunga ote shi ku pe.”
Jesus okwa li a udaneka a ti: “Omumwanyoko ota nyumuka.”
Marta okwa li e shii pamwe Jesus ota popi kombinga yenyumuko olo tali ka ningwa monakwiiwa kombada yedu, olo la teelelwa yo kuAbraham nosho yo ovapiya vaKalunga vakwao. Onghee hano, okwa li a nyamukula a ti: “Ondi shi shii nokutya, ota nyumuka menyumuko mefiku laxuuninwa.”
Ashike Jesus okwa li a yandja eteelelo lopokafimbo, eshi a li a nyamukula a ti: “Aame enyumuko nomwenyo.” Jesus okwa li a dimbulukifa Marta kutya Kalunga okwe mu pa eenghono dokufinda efyo, a ti: “Ou ta itavele nge ota kala nomwenyo, nande na hangike a fya. Ndele keshe tuu ou e nomwenyo, ndee ta itavele nge, ita fi nande fiyo alushe.”
Jesus ka li a hala okulombwela Marta kutya ovanhu ovo ve li ovadiinini pefimbo opo itava ka fya nandenande. Ndele okwa li a hala okutya ovo ve na eitavelo tali longo muye otava ka dula okumona omwenyo waalushe. Omwenyo wa tya ngaho otau ka monika kovanhu vahapu eshi tava ka nyumunwa mefiku laxuuninwa. Ashike ovadiinini vamwe otava ka xupa po pexulilo longhalelo ei yoinima kombada yedu, nokungaho, eendjovo daJesus otadi ka wanifwa meityo lolelalela. Ovanhu va tya ngaho itava ka fya nandenande. Konima yokukundafana naMarta, Jesus okwa li e mu pula a ti: “Oto shi itavele tuu?”
Marta okwa li a nyamukula a ti: “Heeno Omwene, handi itavele nokutya, Oove Kristus, Omona waKalunga, ou e nokuuya mounyuni.”
Opo nee Marta okwa li a ya diva a ka ifane omumwaina Maria, ndele te mu lombwele fimbo va li ovo aveke a ti: “Omuhongi opo e li apa ndee te ku ifana.” Diva Maria okwa li a dja mo meumbo, naashi ovanhu vamwe va li ve mu mona ta di mo meumbo, ova li ve mu landula, tava diladila kutya ota i kombila.
Eshi Maria a li a fika puJesus, okwa li a twa eengolo peemhadi daye ndele ta lili. Opo nee Maria okwa ti: “Omwene, ngeno Ove wa li po, ngeno omumwameme ina fya.” Jesus okwa li e linyengifwa neenghono eshi a mona Maria nosho yo eemhunga dovanhu odo da li pamwe naMaria tadi lili. Jesus okwa li a pula a ti: “Omwe mu nangeka peni?”
Ova li va nyamukula va ti: “Omwene, ila u ka tale.”
Jesus naye okwa li a lila, naasho osha li she linyengifa Ovajuda va tye: “Taleni, nhumbi [a] li e mu hole.”
Ovanhu vamwe ova li va dimbuluka kutya eemwedi dinini da tetekela, pefimbo lOshivilo shOmatwali, Jesus okwa li a twikulula omumati umwe oo a li a dalwa omupofi, nova li va pula tava ti: “Oye tuu ou a twikulula omesho omupofi, oshike ina dula yo mbela okukelela ou a ha fye?” Johannes 5:21; 6:40; 9:1-7; 11:17-37.
▪ Onaini Jesus a li a fika kuBetania, nonghalo okwa li a hanga i li ngahelipi?
▪ Marta okwa li e na eitavelo lilipi li na sha nenyumuko?
▪ Jesus okwa li a kumwa ngahelipi kefyo laLasarus?