Etukulwa 95

Oilihongomwa i na sha neteyohombo nosho yo okukala tu hole ounona

JESUS novahongwa vaye ova li mondjila tava i ku Jerusalem kOpaasa yomo 33 O.P. Ova li va tauluka omulonga waJordan ndele tava i nondjila oyo ya pita moshitukulwa shaPerea. Jesus okwa li a kala muPerea oule woivike inini, ndele okwa li a ifanwa a ye kuJudea molwaashi kaume kaye Lasarus okwa li ta vele. Eshi Jesus a li nale muPerea, okwa li a popya nOvafarisai kombinga yeteyohombo, nomolwaasho ova li natango va pula epulo li na sha naasho.

Ovafarisai ova li ve na omadiladilo a yoolokafana e na sha neteyohombo. Moses okwa li e va lombwela kutya omukainhu ota dulu okuhengwa po ngeenge muye omwa ‘monika sha shii.’ Vamwe ova li va itavela kutya oshinima shii otashi ulike ashike kokuhenoukoshoki. Vamwe ova li tava diladila kutya oshinima shonhumba ‘shii’ osha kwatela mo omapuko manini. Onghee hano, Ovafarisai ova li va pula Jesus opo ve mu yeleke va ti: “Osha wapala tuu omulumenhu ta henge po omukainhu waye omolwondjovo keshe?” Ova li ve lineekela kutya keshe osho Jesus ta ka nyamukula otashi ka etifa oupyakadi pokati kaye navo, molwaashi ova li ve na etaleko la yooloka ko kulaye.

Jesus okwa li a ungaunga nepulo olo nelungi, a li a popya shi na sha nanghee ohombo ya totwa po pehovelo, ndele ka li a popya e likolelela komadiladilo ovanhu. Jesus okwa li a pula a ti: “Inamu lesha hamba, Omushiti okwe va shita pehovelo omulumenhu nomukainhu. ndee ta ti: [onghee] hano omulumenhu e nokufiya po [xe] naina nokulimangeleka komukainhu waye, ndele ava vavali otava ningi omunhu umwe? Osho hano kave fi vali vavali, ndelenee ombelela imwe. Hano osho Kalunga e shi tula kumwe, inashi kufwa kumwe komunhu.”

Jesus okwa li a ulika kutya elalakano laKalunga lopehovelo ololo kutya ovalihomboli va kale ve limangela kumwe, sha hala okutya, kave na okuteya ohombo. Ovafarisai ova li va pula kutya ngeenge osho shi li ngaho, “Moses okwa lombwela shike hano okuyandja ombapila yehengano noku mu henga po?”

Jesus okwa li e va nyamukula a ti: “Moses okwe mu itavelela oukukutu womitima deni okuhenga po ovakainhu veni, ndele ka sha li ngaha pehovelo.” Eshi Kalunga a li a tota po omufikamhango washili u na sha nohombo moshikunino shaEden, ka li a tula po elongekido li na sha nokuteya ohombo.

Jesus okwa li a twikila okulombwela Ovafarisai ta ti: “Ame ohandi mu lombwele: Ou ta henge po omukainhu waye oshinima shimwe shi he fi oluhaelo [sha dja kOshigreka por·neiʹa], ndele ta hombola umwe, oye ta haele.” Opo Jesus okwa li ta ulike kutya por·neiʹa, osho tashi ulike komilele da nyata, olo ashike etomheno la diminwa kuKalunga li na sha nokuteya ohombo.

Eshi ovahongwa va li va mona kutya ohombo oi na okukala oshinima tashi kalelele nonokutya ovalihomboli otava dulu ashike okuteya ohombo omolwoluhaelo, ova li ve linyengifwa va tye: “Ngenge okukala kwomulumenhu nomukainhu waye kwa tya ngaha, okuhombola inaku wapala.” Osha yela kutya oo ta diladila okuhombola ile okuhombolwa oku na okudiladila a mana mo shi na sha nokutya ohombo oi li oshinima tashi kalelele.

Jesus okwa li a twikila okupopya shi na sha nokuhahombola. Okwa li a yelifa kutya ovalumenhu vamwe itava dulu okuhombola molwaashi ova dalwa nomalutu ihaa pendula omahalo opamilele. Vamwe ove li monghalo ya tya ngaho molwaashi ova lutulwa kovanhu. Vamwe ova finda omahalo okuhombola nokuhafela omilele opo va dule okulongifa efimbo lihapu moinima i na sha nOuhamba womeulu. Opo nee Jesus okwa li a xulifa a ti: “Ou ta dulu oku shi tambula [okukala ina hombola], ne shi tambule.”

Ovanhu ova li va hovela okweeta ounona kuJesus, ndele ovahongwa vaye ova li va hanyena ounona, tava kendabala oku va shunifa ko, molwaashi ova li va hala okwaamena Jesus aha kwatwe koshisho inashi pumbiwa. Ashike Jesus okwa li e va lombwela a ti: “Efeni ounona ve uye kuame nye inamu va kelela ko, osheshi ouhamba waKalunga owaava ve li ngaashi ava. Oshili ohandi mu lombwele: Ou ita tambula ouhamba waKalunga ngaashi okaana, ita i mo muwo.”

Jesus ka li tuu a honga ovahongwa vaye oshilihongomwa shiwa! Opo tu tambule Ouhamba waKalunga, otu na okukala tu na elininipiko notu shii okuhongwa ngaashi ounona. Ashike oshihopaenenwa shaJesus otashi ulike yo kutya osha fimana okulongifa efimbo okukala nounona, unene tuu ovadali. Jesus okwa li a ulika kutya oku hole ounona eshi a li e va ukata ndele te va nangeke noupuna. Mateus 19:1-15; Deuteronomion 24:1; Lukas 16:18; Markus 10:1-16; Lukas 18:15-17.

▪ Ovafarisai ova li ve na omataleko a yooloka elipi e na sha neteyohombo, nova li va yeleka Jesus ngahelipi?

▪ Jesus okwa li a ungaunga ngahelipi neyeleko lOvafarisai, nokwa li a popya kutya ovalihomboli otava dulu ashike okuteya ohombo omolwetomheno lilipi?

▪ Omolwashike ovahongwa vaJesus va li tava ti kutya inashi wapala okuhombola, na Jesus okwa li a yandja eetepo lilipi?

▪ Jesus okwe tu honga shike shi na sha nonghedi oyo a li a ungaunga nounona?