Etukulwa 96
Jesus nomupangeli omunyasha oshipuna
FIMBO Jesus a li ta tavakana moshitukulwa shaPerea a yuka kuJerusalem, omulumenhu umwe omunyasha okwa li a tondokela kuye ndele ta tu eengolo peemhadi daye. Omulumenhu oo oha ifanwa omupangeli tashi dulika molwaashi okwa li e na ondodo ya tumbala moshinagoga yomoshitukulwa shavo ile molwaashi a li oshilyo shOmhangu yopombada yOvajuda. Omulumenhu oo okwa li yo oshipuna elela. Omulumenhu oo okwa li a pula Jesus a ti: “Omuhongi muwa, ondi nokulonga shike ndi mone omwenyo waalushe?”
Jesus okwa li e mu nyamukula a ti: “Oshike to tile nge ndi muwa? Kaku na umwe muwa, oKalunga aeke.” Omulumenhu oo otashi dulika a li a longifa oshitya “muwa” shi li edinafimaneko, onghee hano, Jesus okwa li e mu lombwela kutya Kalunga oye ashike e na okuulwa edinafimaneko la tya ngaho.
Jesus okwa li a twikila ko a ti: “Ngenge wa hala okuya momwenyo, wanifa oipango.”
Omulumenhu okwa li a pula a ti: “Oilipi po?”
Jesus okwa li e mu nyamukula a tumbula oipango itano imwe yomOipango Omulongo, a ti: “Ino dipaa, Ino nyona ohombo, Ino vaka, Ino lundila, Fimaneka xo nanyoko.” Jesus okwa li nokuli a weda ko oshipango osho sha fimanenena, a ti: “Hola omukweni ngaashi ove u lihole mwene.”
Omulumenhu oo okwa li a nyamukula paushili a ti: “Aishe ei onde i diinina; oshike nde shi pumbwa vali?”
Eshi Jesus a li a pwilikina kepulo lomulumenhu oo la mana mo, Jesus okwa li e mu hokwa. Ashike Jesus okwa li a didilika kutya omulumenhu oo oku hole unene oinima yaye yopamaliko nomolwaasho okwa li e mu lombwela kutya okwa li a pumbwa okuninga shike a ti: “Shimwe she ku pumbwa: Inda u ka [landife] po oinima yoye aishe ei u na, ove u i yandje keehepele, ndele to kala u nemona meulu, ove u uye u shikule nge.”
Nopehe na omalimbililo, Jesus okwa li a tala omulumenhu oo e mu etela onghenda eshi ta fikama po ndele ta i a nyika oluhodi. Omulumenhu oo okwa li a imbwa koupuna waye aha mone efimano lemona lashili. Onghee hano, Jesus okwa li a popya a nyika oluhodi a ti: “Oipuna oi noudjuu u fike peni okuya mouhamba waKalunga.”
Ovahongwa ova li va kumwa keendjovo daJesus. Ashike ova li va kumwa unene nokuli eshi Jesus a li a popya omhango yakwalukeshe a ti: “Okupita kwongamelo meyulu longwiya, xwepo ku dule okuya kwoshipuna mouhamba waKalunga.”
Ovahongwa ova li va hala okushiiva eshi va li va pula va ti: “Olyelye hano ta dulu okuxupifwa?”
Jesus okwa li a tala kuvo ndele te va nyamukula a ti: “Otashi nyenge ovanhu, ndele haKalunga, osheshi Kalunga iha nyengwa kusha.”
Molwaashi Petrus okwa li e wete kutya ova ninga ehoololo la yooloka ko filufilu kwaali lomupangeli oshipuna, okwa ti: “Tala, fye otwa fiya ko oinima aishe, notwe ku shikula; ohatu mono shike?”
Jesus okwa li a udaneka a ti: “[Meshitululo, NW] Omona wOmunhu eshi ta ka kala omutumba [kolukalwapangelo] loshinge shaye, nanye yo ava mwa shikula nge tamu ka kala omutumba komalukalwa omulongo naavali, ndele tamu ka tokola omapata aIsrael omulongo naavali.” Jesus okwa li a ulika kutya eenghalo dokombada yedu otadi ka shitululwa opo oinima i kale ngaashi ya li moshikunino shaEden. Petrus novahongwa vakwao otava ka pewa ondjabi eshi tava ka pangela Oparadisa kombada yedu alishe pamwe naKristus. Ondjabi inene ya tya ngaho oya wana shili okuningilwa omaliyambo!
Ashike nokunena ovahongwa vaJesus otava mono ondjabi, ngaashi Jesus eshi popya a ti: “Kape na ou a fiya po molwange nomolwevangeli eumbo ile ovamwaxe ile ina ile xe ile ounona ile omapya, ndele ye ita mono ngeno lwefele, paife mounyuni ou mokati komahepeko omaumbo novamwaina ovalumenhu novamwaxe ovakainhu nooina nounona nomapya nomounyuni tau uya omwenyo waalushe.”
Ngaashi Jesus a udaneka, keshe opo ovahongwa vaye tava i mounyuni, ohava kala ve na ekwatafano liwa nOvakriste vakwao, olo li na ondilo li dule olo hava kala ve na novapambele vavo vopambelela. Omupangeli oshipuna osha yela kutya okwa kanifa oufembanghenda wa tya ngaho nosho yo woku ka mona omwenyo waalushe mOuhamba waKalunga womeulu.
Konima yaasho, Jesus okwa li a weda ko a ti: “Votete vahapu otava ningi vaxuuninwa novahauxuuninwa vahapu otava ningi votete.” Mbela Jesus okwa li a hala okutya ngahelipi?
Jesus okwa li a hala okutya ovanhu vahapu ovo ve li “votete” mokukala ve na omaufembanghenda opalongelokalunga, ngaashi omupangeli oshipuna, itava ka ya mo mOuhamba. Ovanhu va tya ngaho otava ka ninga “vaxuuninwa.” Ndele ovanhu vahapu, mwa kwatelwa ovahongwa vaJesus ovalininipiki, ovo va li va dinika kOvafarisai ovo va li ve lishii ouyuki nova li ve va tala ko ve li “vaxuuninwa” nove li ovakwadu ile ‛am ha·’aʹrets, otava ka ninga “votete.” Okuninga kwavo “votete” osha hala okutya otava ka pewa oufembanghenda wokuninga ovapangeli pamwe naKristus mOuhamba. Markus 10:17-31; Mateus 19:16-30; Lukas 18:18-30.
▪ Omunyasha oshipuna otashi dulika a li omupangeli a tya ngahelipi?
▪ Omolwashike Jesus a li ina hala okuulwa muwa?
▪ Ongahelipi oshimoniwa shomupangeli omunyasha tashi ulike kutya osha nyika oshiponga okukala oshipuna?
▪ Jesus okwa udanekela ovahongwa vaye ondjabi ilipi?
▪ Ongahelipi ovo votete tava ka ninga vaxuuninwa nosho yo ovo vaxuuninwa votete?