Etukulwa 119

Jesus ta twalwa kuHannas nosho yo kuKajafas

JESUS okwa li a mangwa ngaashi omukaulinyanga, nokwa li a twalwa kuHannas, oo a li nale omupristeri omukulunhu a tumbala. Hannas okwa li omupristeri omukulunhu eshi Jesus, oo a li e na omido 12, a li a kumwifa ovahongi oorabi kotembeli. Ovana vaHannas vahapu ova li yo va ninga ovapristeri ovakulunhu, nopefimbo opo, oshitenya shaHannas, Kajafas, osho sha li omupristeri omukulunhu.

Otashi dulika Jesus a li a twalwa tete keumbo laHannas molwaashi okwa li a kala omupristeri omukulunhu a tumbala efimbo lile melongelokalunga lOvajuda. Eshi va li va kanghama opo va popye naHannas, osha li sha dulifa omupristeri omukulunhu Kajafas a ongele oilyo yOmhangu yoPombada yOvajuda, oyo ya li i na oilyo 71 nosho yo eendombwedi doipupulu.

Omupristeri omukulunhu Hannas okwa li a pula Jesus shi na sha novahongwa vaye nosho yo ehongo laye. Ndele Jesus okwa li a nyamukula a ti: “Nda tonga moipafi younyuni. Alushe onda longa ovanhu meeshinagoga nomotembeli, omo hamu ongala Ovajuda aveshe, ndele inandi tonga sha meholeko. Oshike to pula nge? Pula ava va uda eshi nda tonga kuvo; tala; vo ove shi shii osho nde shi tonga.”

Opo nee, umwe womovakwaita oo a li a fikama popepi naJesus okwa li e mu denga enghava moshipala, ndele ta ti: “Osho to nyamukula omupristeri omukulunhu?”

Jesus okwa li e mu nyamukula a ti: “Ngenge nda tonga nai, tomhonene nge owii, ndele ngenge nda tonga nawa, oto dengele nge shike?” Opo nee konima yeenghundafana odo, Hannas okwa li a tuma Jesus kuKajafas.

Pefimbo opo, ovapristeri ovakulunhu aveshe, ovakulunhu nosho yo ovanongo vomishangwa, sha hala okutya, oilyo aishe yOmhangu yoPombada yOvajuda, ova li va hovela okwoongala. Osha yela kutya ova li va ongala meumbo laKajafas. Okuninga oihokolola ya tya ngaho moufiku wOpaasa otashi nyono omhango yOvajuda. Ndele osho kasha li sha imba ovawiliki vomalongelokalunga ovo va wanife po elalakano lavo lii.

Oivike ya tetekela, eshi Jesus a li a nyumuna Lasarus, Omhangu yoPombada yOvajuda oya li ya tokola nale kutya Jesus oku na okufya. Ndele eshi pa li pa pita omafiku avali, ovawiliki vomalongelokalunga ova li va kundafana aveshe mEtitatu opo va kengelele Jesus va dule oku mu kwata ve mu dipae. Diladila ashike kwaasho, Jesus okwa li a tokolwa nale fimbo ina pangulwa!

Oilyo yOmhangu yoPombada oya li tai ningi eenghendabala opo i mone eendombwedi odo tadi dulu okuyandja oumbangi woipupulu opo Jesus a monike etimba. Ndele nande ongaho, kaya li ya mona eendombwedi odo tadi yandje oumbangi wa faafana. Opo nee xuuninwa, opa li pe uya eendombwedi mbali odo da li da popya da ti: “Fye otwe mu uda ta ti: Ame ohandi ngumauna po otembeli ei ya tungwa nomake, ndele momafiku atatu ohandi tungu imwe ei, inai tungwa nomake.”

Kajafas okwa li a pula Jesus a ti: “Ito nyamukula sha? Ava otave ku popile shike?” Ashike nande ongaho, Jesus ka li a nyamukula sha. Nonande opa li pa monika eendombwedi odo doipupulu, Omhangu yoPombada oya li ya fifwa ohoni, molwaashi eendombwedi odo kada li tadi yandje oumbangi tau tu kumwe. Onghee hano, omupristeri omukulunhu okwa li a kendabala vali okulongifa onghedi imwe i lili.

Kajafas okwa li e shi shii kutya Ovajuda ohava handuka diva ngeenge omunhu okwa popi kutya ye Omona waKalunga. Oikando ivali ya pita, ova li va popya kutya Jesus oha sheke Kalunga nokwa wana okufya nova li tava diladila papuko kutya okwa li te liti kutya oku fike puKalunga. Opo nee Kajafas okwa li a pula Jesus noukengeleledi a ti: “Ohandi ku anifa kuKalunga omunamwenyo, u tu lombwele, ngenge Oove Kristus, Omona waKalunga?”

Jesus oye Omona waKalunga shili, kashi na nee mbudi kutya Ovajuda ova li tava diladila shike. Ndele ngeenge Jesus okwa kala ina nyamukula, otashi ka kala sha fa a anya kutya oye Kristus. Onghee hano, Jesus okwa li a nyamukula nouladi a ti: “Heeno, Aame. Ndele otamu ka mona Omona wOmunhu e li omutumba kolulyo lEenghono, ndee te uya ta ende moilemo yeulu.”

Opo nee Kajafas okwa li a pombola oikutu yaye moipafi yovanhu ndele ta ingida ta ti: “Okwa tuka Kalunga. Hatu kongele vali shike ondombwedi? Tala, paife eshi omwa uda etukano laye. Otamu ti ngahelipi?”

Oilyo yOmhangu yoPombada yOvajuda oya li ya nyamukula ya ti: “Oku netimba lokufya.” Opo nee ovanhu ova li va hovela okuyola Jesus noku mu sheka. Ova li ve mu denga nomanghava moshipala noku mu fiila omate. Vamwe ova li va uvika oshipala shaye ndele tave mu denge neengonyo nokupopya tava sheke tava ti: “Kristus, tu xunganekela, olyelye ou e ku denga”? Jesus okwa li a ningilwa ominyonena adishe odo moufiku oo a li ta pangulwa. Mateus 26:57-68, 3, 4; Markus 14:53-65; Lukas 22:54, 63-65; Johannes 18:13-24; 11:45-53; 10:31-39; 5:16-18.

▪ Jesus okwa li a twalwa peni tete, noshike sha li she mu ningilwa fimbo a li oko?

▪ Jesus okwa li vali a twalwa peni, nonelalakano lashike?

▪ Kajafas okwa li a dula ngahelipi okuningifa Omhangu yoPombada yOvajuda i popye kutya Jesus okwa wana okufya?

▪ Jesus okwa li a ningilwa ominyonena dilipi moufiku omo a li ta pangulwa?