Etukulwa 125

Jesus okwa li e udite ouyahame tau udifa omwenyo munyenye fimbo a li komuti womahepeko

JESUS okwa li ta ende pamwe novakolokoshi vavali ovo va li yo tava ka valelwa. Eshi osheendo shovanhu sha li sha enda ko oshinano shixupi okudja moshilando, osha li sha kanghama ponhele hai ifanwa Golgata ile Onhele yOipongolo.

Eenghwate oda li da dulwa oikutu yado, opo nee ovanhu ova li ve va pa omaviinyu a tulwa oimbodi ilula. Nomaviinyu oo otashi dulika a li a longekidwa kovakainhu vokuJerusalem, ashike Ovaroma kava li hava anye oimbodi oyo yokufifa omaliudo aavo tava ka valelwa. Ashike eshi Jesus a li e a makela, okwa li a anya oku a nwa. Omolwashike mbela? Osha yela kutya okwa li a hala okukala e na omadiladilo e li nawa pefimbo olo leyeleko linenenene leitavelo laye.

Jesus okwa li a nangekwa komuti, omaoko aye a yukililifwa pombada. Opo nee ovakwaita ova li va valela eembosha dinene komake nokeemhadi daye. Okwa li e udite ouyahame munene eshi eembosha da li tadi piti meenhumba nomoikokotenge yaye. Opo nee eshi omuti womahepeko wa li wa kalekwa ofika, okwa li e udite ouyahame munene molwaashi oipute oya li tai yahama omolwolutu olo la li la endjelelifwa. Ndele nande ongaho, Jesus ka li a tila, ponhele yaasho, okwa li a ilikanena ovakwaita Ovaroma, a ti: “Tate, va dimina po, osheshi kave shi shii eshi hava ningi.”

Pilatus okwa li a tula eshangelo komuti womahepeko la shangwa taku ti: “JESUS OMUNASARET OHAMBA YOVAJUDA.” Otashi dulika a li a shanga ngaho molwaashi a li a fimaneka Jesus nomolwaashi yo a li a tonda ovapristeri Ovajuda omolwoku mu fininika a tokolele Jesus efyo. Opo ovanhu aveshe va dule okulesha eshangelo olo, Pilatus okwa li a shanga momalaka atatu, mOshiheberi, mOshilatina shopambelewa nosho yo mOshigreka osho sha li sha shiivika nawa.

Ovapristeri ovakulunhu, mwa kwatelwa Kajafas naHannas, ova li va teka omukumo. Eshangelo olo la li la yeleka ola li tali nyono po efindano lavo. Onghee hano, ova li va popya ve li omhinge nalo va ti: “Ino shanga: ohamba yOvajuda, ndele u tye, ye okwa tile: Aame ohamba yOvajuda.” Molwaashi Pilatus okwa li a handuka eshi a li a longifwa kovapristeri, okwa li e va nyamukula a tokola toko a ti: “Osho nde shi shanga, onde shi shanga nee.”

Ovapristeri nosho yo eemhunga dovanhu oda li da ongala ponhele opo va li va valela Jesus, novapristeri ova li tava pataneke oumbangi oo wa li wa shangwa keshangelo olo. Ova li va endulula vali oumbangi wa puka oo va li va yandja nale eshi Jesus a li ta pangulwa kOmhangu yoPombada yOvajuda. Onghee hano, itashi kumwifa eshi ovanhu ovo va li tava ende po va li tava sheke notava pukaapuka komitwe tava ti: “Ove tuu ou to ngumauna po otembeli ndee to i tungulula omafiku atatu, likwafa mwene, ngenge oove Omona waKalunga, ove u dje ko [komuti womahepeko, NW ].”

Ovapristeri ovakulunhu novawiliki vomalongelokalunga vakwao ova ti: “Okwa li ha kwafa ovanhu, ye ita dulu okulikwafa. Ngenge ye ohamba yOvaisrael, hano na dje ko paife [komuti womahepeko, NW], opo nee ohatu mu itavele. Oye kwe lineekela Kalunga; Kalunga ne mu xupife hano paife, ngenge okwe mu hokwa; osheshi Oye mwene okwa tile: Aame Omona waKalunga.”

Ovakwaita navo ova li va nwefwa mo koikala yovawiliki ovo ndele navo tava hovele okusheka Jesus. Ova li tave mu sheke moku mu pa omaviinyu malula, tashi dulika va li ve a vaeka komilungu daye odo da li da kukuta. Ove mu sheka tava ti: “Ove ngenge ohamba yOvajuda, likwafa mwene.” Nokuli novakolokoshi ovo va li va valelwa pamwe naJesus umwe okolulyo laye naumwe okolumosho laye ova li tave mu sheke. Diladila ashike shi na sha naasho, omunhu munenenene oo a li ko nale, omunhu oo a shita oinima aishe vo naJehova Kalunga, ta mono oixuna i fike opo!

Ovakwaita ova li va kufa oshikutu shaJesus shokombada ndele tave shi taula moitukulwa inhe. Oitukulwa oyo ova li ve i umbila oshihoololifo opo va mone kutya otai ningi yalyelye. Ndele oshikutu shaJesus shokoshi kasha li shi na omuhondjo nosha li sha kola. Onghee hano, ovakwaita ova li va lombwelafana tava ti: “Inatu i tauleni, tu ningileni oshihoololifo nokutya, otai ningi yalyelye.” Kungaho, ova li va wanifa omushangwa nopehe na oku shi shiiva, oo tau ti: “Ovo tave litukulile oikutu yange, nomidjalo dange otave di ningile oshihoololifo.”

Konima yefimbo, omukolokoshi umwe oo a li a valelwa pamwe naJesus okwa li a dimina kutya Jesus oku li shili ohamba. Onghee hano, okwa li a hanyena omukolokoshi mukwao ta ti: “Iho tila nande Kalunga, eshi u li mehandukilo eli li fike pamwe? Ofye ohatu hepekwa nokuli [pauyuki], osheshi hatu pewa osho twe shi lilongela, ndele ou ina longa owii nande owasha.” Opo nee okwa li a lombwela Jesus a ti: “Dimbulukwa nge, ngenge wa fika mouhamba woye.”

Jesus okwa li e mu nyamukula a ti: “Oshili handi ku lombwele, onena tuu eli to ka kala pamwe naame [mOparadisa].” Jesus ota ka wanifa po eudaneko laye olo eshi ta ka pangele e li Ohamba meulu nota ka nyumuna omukolokoshi oo e livela ombedi opo a ka kale nomwenyo moParadisa kombada yedu oko ovanhu ovo tava ka xupa po puHarmagedon nosho yo ookaume kavo tava ka mona oufembanghenda woku li longa. Mateus 27:33-44; Markus 15:22-32; Lukas 23:27, 32-43; Johannes 19:17-24.

▪ Omolwashike Jesus a li a anya okunwa omaviinyu oo a li a tulwa oimbodi?

▪ Omolwashike Pilatus a li a tula eshangelo komuti oko kwa li kwa valelwa Jesus, naasho osha li sha etifa okuhaudafana kulipi pokati kaPilatus novapristeri ovakulunhu?

▪ Ovanhu ova li vali va sheka Jesus ngahelipi eshi a li komuti womahepeko, noshike tashi dulika sha li she ve linyengifa?

▪ Osho sha li sha ningilwa oikutu yaJesus osha li sha wanifa exunganeko lilipi?

▪ Omukolokoshi umwe okwa li a ninga omalunduluko elipi, nongahelipi Jesus ta ka wanifa po eindilo laye?