Etukulwa 127

Jesus okwa li a pakwa mEtitano ndele ta nyumuka Osoondaxa

OSHA li Etitano omutenya, nEshabata lo 15 aNisan ola li tali ka hovela eshi etango tali ningine. Oshimhu shaJesus osha li natango komuti womahepeko, ndele ovakolokoshi vavali ovo va li va valelwa pamwe naye kava li va fya natango. Etitano omutenya ola li hali ifanwa efiku lOmalilongekido molwaashi omo ovanhu vali hava longekida oikulya nokumanifa oilonga aishe ya endelela oyo ya li itai dulu okuteelela okulongwa konima yEshabata.

Eshabata olo la li li li pokuhovela kala li ngaashi Eshabata la kwalukeshe, (efiku etiheyali loshivike) ndele ola li Eshabata “linene.” Ola li hali ifanwa ngaho molwaashi 15 aNisan, olo la li efiku lotete lomafiku aheyali Oshivilo shOmingome dihe na Onhafi (nola li alushe hali kala Eshabata, kashi na nee mbudi kutya ola li efiku etingapi moshivike), ola li tali ningwa mefiku olo lEshabata la kwalukeshe.

PaMhango yaKalunga, oimhu kaya li ina okukala ya endjelela komuti womahepeko oufiku aushe. Onghee hano, Ovajuda ova li va pula Pilatus kutya ovanhu ovo va valelwa nava dipawe meendelelo mokuteyaula omakipa omaulu avo. Opo nee, ovakwaita ova li va teyaula omaulu ovakolokoshi vavali, ashike molwaashi Jesus okwa li ta monika a fya nale, kava li va teyaula omakipa aye. Osho osha li sha wanifa omushangwa oo tau ti: ‘Omakipa aye aeshe, inapa teka nande olimwe.’

Omukwaita umwe okwa li a twa Jesus neonga meemhati, opo va tale ngeenge okwa fya ngoo shili. Eonga ola li la twa momutima waJesus ndele ta di ohonde nomeva. Omuyapostoli Johannes oo a li po, okwa ti kutya osho osha li sha wanifa omushangwa oo tau ti: “Vo otava ka tala kuou ve mu twa.”

Josef Omuarimatia, oshilyo sha fimana shOmhangu yoPombada yOvajuda, naye opo a li eshi Jesus ta valelwa komuti. Josef okwa li a anya okukufa ombinga metokolo lihe li pauyuki li na sha nokutokola Jesus. Josef okwa li shili omuhongwa waJesus, nonande okwa kala a tila okuliholola moipafi yovanhu. Ashike pomhito oyo okwa li a ulika ouladi ndele ta i kuPilatus e ke mu pule oshimhu shaJesus. Pilatus okwa li a ifana omukwaita oo a li e na oshinakuwanifwa, naashi a li a shilipaleka kutya Jesus okwa fya, Pilatus okwa li a yandja oshimhu shaJesus.

Josef okwa li a kufa oshimhu shaJesus ndele te shi dingile momalapi mayela oliina opo shi dule oku ka pakwa. Okwa li a kwafelwa kuNikodemus, oshilyo shikwao shOmhangu yoPombada yOvajuda. Nikodemus naye ka li a holola moipafi kutya okwa itavela Jesus molwaashi okwa li a tila okukanifa ondodo yaye. Ndele pomhito oyo okwa li a eta omirha yeekilograma 33 nosho yo oaloe yondilo. Oshimhu shaJesus osha li sha dingilwa momalapi a tulwa oidimba oyo, onghedindjikilile naanaa oyo Ovajuda va li hava longekida oimhu opo i ka pakwe.

Opo nee oshimhu osha li sha tulwa mombila ipe yaJosef, oyo ya li ya hokwa memanya la li moshikunino sha li popepi. Opo nee pombila opa li pa idilwa emanya la kula. Ova li va longekida oshimhu meendelelo opo shi pakwe diva komesho yEshabata. Onghee hano, Maria Magdalena naMaria ina yaJakob Munini, ovo tashi dulika va li va kwafela mokuninga omalongekido, ova li va tondokela keumbo opo va ka longikide oidimba nomaadi manyika nawa amwe natango. Konima yEshabata, ova li va unganeka va ka tule vali oshimhu shaJesus oidimba imwe opo shi dule okukala efimbo lile.

Efiku la landula ko, olo la li Olomakaya (Eshabata), ovapristeri ovakulunhu nOvafarisai ova li va ya kuPilatus ndele tava ti: “Omwene, otwa dimbulukwa, omupukifi winya fimbo kwa li e nomwenyo, okwa tile: Ngenge pwa pita omafiku atatu, ohandi nyumuka. Lombwela hano, ombila i nangelwe shili fiyo efiku etitatu, ovalongwa vaye ve he uye ndele ve he mu vake mo, ndele va ha lombwele ovanhu: okwa nyumuka koufi; omapukifo a hauxuuninwa osho taa ningi [mai] e dule otete.”

Pilatus okwa li a nyamukula a ti: “Ovanangeli ovo ava, indeni ne, nye mu nangele nawa ngaashi mu shi shii.” Onghee hano, ova li va ya ndele tava filile ko emanya kombila nokutula po ovakwaita Ovaroma ve i nangele.

Ongula inene yOsoondaxa, Maria Magdalena naMaria ina yaJakob, pamwe naSalome, Johanna nosho yo ovakainhu vamwe, ova li tava twala oidimba kombila opo va ka vaeke olutu laJesus. Fimbo va li mondjila, ova li va pulafana va ti: “Olyelye te tu alangatifile ko emanya koshivelo shombila?” Ndele eshi va fika pombila, ova mona kutya opa li pa ningwa ekakamo ledu, nomweengeli waJehova okwa kufa ko emanya olo la li ko. Ovanangeli navo kava li po, nomombila ka mwa li mu na sha. Mateus 27:57–28:2; Markus 15:42–16:4; Lukas 23:50–24:3, 10; Johannes 19:14, 19:31–20:1; 12:42; Leviticus 23:5-7; Deuteronomion 21:22, 23; Epsalme 34:21; Sakaria 12:10.

▪ Omolwashike Etitano la li hali ifanwa efiku lOmalilongekido, nEshabata “linene” oshike?

▪ Omishangwa dilipi da wanifwa shi na sha nolutu laJesus?

▪ Josef naNikodemus ova li va ninga shike pepako laJesus, nova li ve na ekwatafano la tya ngahelipi naJesus?

▪ Ovapristeri ova li va pula Pilatus shike, na Pilatus okwa li e linyenga ngahelipi?

▪ Oshike sha li sha ningwa po ongula inene yOsoondaxa?