Etukulwa 132

Jesus e li kolulyo laKalunga

ESHI ovahongwa va li va tililwa omhepo iyapuki pOpentekoste, osha li euliko kutya Jesus okwa fika meulu. Emoniko olo omuhongwa Stefanus a ka mona konima yefimbo lixupi okudja opo ola li yo euliko kutya Jesus okwa fika meulu. Okafimbo kanini fimbo Stefanus ina dipawa omolwokuyandja oundombwedi kwaye noudiinini, okwa ti: “Taleni, ame ndi wete eulu la yeuluka nOmona wOmunhu e li ofika kolulyo laKalunga.”

Jesus okwa li e li kolulyo laKalunga a teelela Xe e mu lombwele kutya: “Pangela mokati kovatondi voye.” Ndele mbela Jesus ota ka kala ta ningi shike momukokomoko wefimbo fiyo osheshi ta ka katukila ovatondi vaye onghatu? Jesus ota kala ta pangele ovahongwa vaye ovavaekwa, ta kala te va wilike moilonga yavo yokuudifa, note ke va longekida opo va ka pangele pamwe naye mOuhamba waXe ve li eehamba konima ngeenge va nyumunwa.

Pashihopaenenwa, Jesus okwa li a hoolola Saulus (oo lwanima a ka shiivika nedina laye lOshiroma, Paulus) opo a kwatele komesho oilonga yokuninga ovanhu ovahongwa moilongo imwe. Saulus okwa li e na ouladi nOmhango yaKalunga, ashike okwa li a pukifwa kovawiliki vomalongelokalunga Oshijuda. Oshidjemo, Saulus ka li ashike a panda okudipawa kwaStefanus ndele okwa li yo a pewa epitikilo komupristeri omukulunhu Kajafas a ye kuDamaskus opo a ka kwate po ovashikuli vaJesus ovalumenhu novakainhu e va ete kuJerusalem. Ndele fimbo Saulus a li molweendo, ouyelele munene owa li wa vilima popepi naye ombadilila nokwa li e lidenga pedu.

Saulus okwa li a uda ondaka oyo a li ehe shii kutya oya lyelye tai pula tai ti: “Saul, Saul, oshike to taata nge?” Saulus okwa li a pula ta ti: ‘Omwene, Oove lyelye?’

Ondaka oyo oya li ya nyamukula ya ti: “Aame Jesus, ou to taata.”

Jesus okwa li a lombwela Saulus oo a li a twikifwa kouyelele wopashikumwifilonga kutya naye kuDamaskus a ka teelele a lombwelwe osho e na okuninga. Opo nee Jesus okwa li e lihololela memoniko umwe womovahongwa vaye wedina Ananias. Jesus okwa li a lombwela Ananias shi na sha naSaulus a ti: “Oye oshilongifo shange sha hoololwa shokuhumbatela edina lange koiwana yovapaani nokeehamba nokovana vaIsrael.”

Doshili, Saulus (oo paife a shiivika nedina Paulus) nosho yo ovaudifi vakwao vamwe ova pondola neenghono moilonga yokuudifa nokuhonga ovanhu omolwekwafo laJesus. Eshi pa pita omido 25 lwaapo okudja eshi Jesus a li e lihololela Paulus fimbo a li e li mondjila yokuya kuDamaskus, Paulus okwa li a shanga kutya ‘evangeli’ ola “udifilwa ovashitwa aveshe vokoshi yeulu.”

Eshi pa pita omido dihapu, Jesus okwa li a ulikila omuyapostoli waye omuholike, Johannes, omamoniko onhumba. Okupitila momamoniko oo Johannes a hokolola membo lEhololo, okwa li a fa a kala nomwenyo fiyo Jesus ote uya meenghono dOuhamba. Johannes okwa ti kutya okupitila “mOmhepo,” sha hala okutya, okupitila momhepo iyapuki okwa li a twalwa (pamadiladilo) “mefiku lOmwene.” ‘Efiku’ olo oshike?

Omakonakono oo a ningwa noukeka e na sha nomaxunganeko Ombibeli, mwa kwatelwa exunganeko laJesus li na sha nomafiku axuuninwa, otaa holola kutya ‘efiku lOmwene’ ola hovela mo 1914, omudo oo wa didilikwa mondjokonona. Onghee hano, mo 1914 omo Jesus a li a aluka ehe wetike kovanhu vomounyuni ndele ovapiya vaye ovadiinini ovo ashike va li ve shi didilika mo kutya okwa aluka. Mo 1914 omo Jehova a lombwela Jesus a pangele mokati kovatondi vaye.

Jesus okwa li a dulika kelombwelo laXe mokuumbila Satana neendemoni daye kombada yedu. Konima eshi Johannes a li a mona memoniko Satana ta umbwa mo meulu, okwa li a uda ondaka ya dja meulu tai ti: “Paife exupifo neenghono nouhamba owa ninga waKalunga ketu, nepangelo olaKristus waye.” Doshili, Kristus okwa hovela okupangela mo 1914 e li Ohamba!

Oyo kaya li tuu onghundana iwa kovalongeli vaJehova ovo ve li meulu! Ova ladipikwa taku ti: “Nyakukweni, onye omaulu, naava mwa kala muo!” Ndele mbela onghalo oi li ngahelipi kombada yedu? Ondaka oyo ya dja meulu oya twikila tai ti: “Woo, edu nefuta, osheshi ondiaboli ya kulukila kunye nehandu linene, osheshi i shi shii i nokafimbo kaxupi kongaho.”

Paife otu li mokafimbo oko kaxupi. Ovanhu paife otava ulike ngeenge ova wana okuya mounyuni mupe waKalunga ile otava ka hanaunwa po. Onghedi omo to linyenge konghundana iwa i na sha nOuhamba waKalunga oyo tai udifwa paife kongonga yedu alishe koshi yewiliko laKristus, oyo tai ka ufa kutya oto ka ya mounyuni mupe ile hasho.

Konima yaasho, Jesus Kristus ota ka longa e li Omukalelipo waKalunga opo a xulife po onghalelo aishe yoinima yaSatana kombada yedu nosho yo ovanhu aveshe ovo tave i yambidida. Jesus ota ka xulifa po filufilu oukolokoshi aushe pefimbo loita oyo hai ifanwa mOmbibeli Harmagedon. Konima yaasho, Jesus Kristus oo e li omunhu munenenene meshito a shikula Jehova Kalunga, ota ka kwata Satana nosho yo eendemoni daye ndele te va mange noku va ekela ‘mombwili’ oule womido eyovi, sha hala okutya, monghalo yokuhalonga sha nandenande. Oilonga 7:55-60; 8:1-3; 9:1-19; 16:6-10; Epsalme 110:1, 2; Ovaheberi 10:12, 13; 1 Petrus 3:22; Lukas 22:28-30; Ovakolossi 1:13, 23; Ehololo 1:1, 10; 12:7-12; 16:14-16; 20:1-3; Mateus 24:14.

▪ Eshi Jesus a ya meulu okwa li e li peni, nokwa li a teelela shike?

▪ Jesus okwa li ta pangele oolyelye konima eshi a londa a ya meulu, noshike sha li tashi ulike kutya ota pangele ovanhu ovo?

▪ ‘Efiku lOmwene’ ola hovela naini, noshike sha li sha ningwa po pehovelo lalo?

▪ Oilonga yokuudifa oyo tai twikile pefimbo letu oya kuma ngahelipi omunhu keshe pauhandimwe?

▪ Ngeenge oilonga yokuudifa oya pu, oshike tashi ka ningwa po konima yaasho?