Eemhepo kada li nomwenyo kombada yedu ndee tadi fi

Eemhepo oko di li! Mouhamba weemhepo ihau monika, omu na eemhepo diwa naado dii. Mbela do ovanhu ovo va li nomwenyo kombada yedu ndee tava fi?

Ahowe, hasho. Ngeenge omunhu ta fi, ye iha i mounyuni weemhepo, ngaashi ovanhu vahapu hava diladila. Otu shi shii ngahelipi? Omolwaashi Ombibeli osho tai ti. Ombibeli oyo embo loshili olo tali di kuKalunga umwe aeke kashili, edina laye Jehova. Jehova okwa shita ovanhu; ye oku shii nawa osho hashi ningwa po ngee vo tava fi. — Epsalme 83:19, KB-1970; 2 Timoteus 3:16.

Ombibeli otai ti kutya Kalunga okwa mele omunhu wotete, Adam, “mondwi yedu.” (Genesis 2:7) Kalunga okwe mu tula mOparadisa, oshikunino shaEden. Ngeno Adam okwa li a dulika komhango yaJehova, ngeno ye ina fya; ngeno ye okwa ka kala e nomwenyo kombanda yedu fiyo onena. Ndele eshi Adam a nyona omhango yaKalunga owina, Kalunga okwa ti kuye: “Ove oto [ka] shuna medu, osheshi omo wa kufwa. Osheshi oove edu, ndee to ka ninga edu.” — Genesis 3:19.

Eshi otashi ti ngahelipi? Adam okwa li peni fimbo Jehova ine mu shita mondwi? Ye ke na apa a li. Ye ka li omhepo inai dalwa meulu. Ye ka li po. Hano eshi Jehova a ti kutya Adam okwa li e na “okushuna medu,” ye okwa li a hala kutya Adam okwa li e nokufya. Ye ina taulukila mouhamba weemhepo. Pefyo, Adam okwa kala vali e he na omwenyo, e he po. Efyo olo okuhakala po kwomwenyo.

Ongahelipi kombinga yavamwe ovo va fya? Navo ove li mokuhakala po? Ombibeli otai nyamukula:

• “Aveshe [ovanhu noinamwenyo] tava i monhele imwe; aveshe va dja mondwi naaveshe tava shuna mondwi.” — Omuudifi 3:20.

• “Oonakufya inava shiiva nande sha.” — Omuudifi 9:5

• “Ohole yavo ngaashi ehandu lavo nouladi wavo yo owa xula po nale.” — Omuudifi 9:6.

• “Moshovafi [ombila] oku to i, kamu na nande oshilonga, ediladilo neshiivo ile ounongo.” — Omuudifi 9:10.

• “[Ovanhu] otava shunwa medu; mefiku tuu olo omadiladilo [avo] kae po vali.” — Epsalme 146:4.

Ove ou wete shidjuu okuuda ko omishangwa edi? Ngee osho, diladila kwaashi: Momaukwaneumbo mahapu, omushamane oha longele oimaliwa opo a filoshisho eumbo laye. Ngeenge omushamane ta fi, luhapu ovakwaneumbo vaye ohava mono oixuna. Nokuli omafimbo amwe omukainhu nounona ihava kala ve na oimaliwa ya wana okulanda oikulya. Tashi dulika ovatondi vomushamane ohave va ningi nai. Paife lipula nee ove mwene: ‘Ngeenge omushamane oo oku na omwenyo mouhamba weemhepo, omolwashike ye ita twikile nokukwafela ovakwaneumbo vaye? Omolwashike ita amene ovakwaneumbo vaye kovanhu vai?’ Omolwaashi omishangwa oda yuka. Omushamane oo ke na omwenyo, ita dulu okuninga sha. — Epsalme 115:17.

Mbela eshi otashi ti kutya oonakufya itava ka alukila vali momwenyo nandenande? Ahowe, hasho. Ohatu ka popya nale kombinga yenyumuko. Ndele eshi ota- shi ti kutya ovanhu ovo va fya kave shii osho ove to ningi. Itava dulu oku ku mona, oku ku uda, ile va popye naave. Inashi pumbiwa u va tile. Itava dulu oku ku kwafa, noitava dulu oku ku etela oshiponga. — Omuudifi 9:4; Jesaja 26:14, NW.