Ounyuni Ou Otau Ka Xupa Ngoo?

Kape na vali epupi limwe la udika tali popi unene shi na sha nexulilo lounyuni. Vahapu ova tila kutya ounyuni otau ka xulila mehanauno lopalute. Vamwe otava diladila kutya enyateko otashi dulika li hanaune po ounyuni. Natango vamwe otave lipula kutya edundakano lomaxupilo otali eta elidengo mumwe pokati kovanhu.

Ounyuni ou otau ka xula po tuu shili? Ngeenge otau ka xula po, eshi otashi ka tya shike? Ounyuni owa xulile tuu nale?

Ounyuni Tau Xulu Po—Umwe Tau I Ponhele Yao

Heeno, ounyuni owa xulile. Diladila kounyuni oo wa li mwii pefimbo laNoa. Ombibeli otai yelifa: “Ounyuni winya wonale [owa] nyonaukila meyelu.” Natango Ombibeli otai ti: “[Kalunga] ounyuni winya wonale ine u fya eenghoto, nande a amena Noa, omuudifi wouyuki novakwao va-7, eshi a yelulifa ounyuni wovahenakalunga eyelu.”—2 Petrus 2:5; 3:6.

Didilika osho exulilo lounyuni winya la hala okutya naasho itali ti. Kala li tali ti exulilo lovanhu. Noa neumbo laye ova xupile pEyelu lounyuni aushe. Opulaneta Edu nosho yo omaulu mawa eyadi eenyofi oya xupa po. Osho sha hanaunwa po “ounyuni wovahenakalunga,” onghalelo ii.

Hauxuuninwa, eshi oludalo laNoa la hapupala, ounyuni umwe owa tameka vali. Ounyuni ou mutivali, ile onghalelo oyo, owa kala po fiyo okunena. Ondjokonona yao oiyadi oita, omunyonena nelongifo lekuni. Oshike tashi ka ningilwa ounyuni ou? Otau ka xupa ngoo?

Onakwiiwa yOunyuni Ou

Eshi Ombibeli ya tonga kutya ounyuni wopefimbo laNoa owa hanaunwa po neyelu, yo otai twikile: “Eulu lopaife nedu eli ola tuvikililwa omundilo.” (2 Petrus 3:7) Paushili, omushangi wOmbibeli umwe ota yelifa: “Ounyuni [ou u li po paife] otau xulu po.”—1 Johannes 2:17.

Ombibeli inai hala kutya edu lo venevene ile eulu olo liyadi eenyofi olo tali xulu po, ongaashi eulu nedu inai xula po pefimbo laNoa. (Omapsalme 104:5) Ponhele yaasho, ounyuni ou, pamwe ‘neulu’ lao, ile ovapangeli vao veepolotika ovo tava nwefwa mo kuSatana, “nedu” lao, ile oukumwe wovanhu, otai ka hanaunwa po ngaashi okomundilo. (Johannes 14:30; 2 Ovakorinto 4:4) Ounyuni ou, ile onghalelo ei, otai ka hanaunwa po filufilu ngaashi ashike ounyuni oo wa li ko komesho yEyelu. Jesus Kristus naye okwa popya shi na sha nonghalo “pomafiku aNoa” kutya oi li oshihopaelelwa shaashi tashi ka ningwa po manga exulilo lounyuni ou inali fika.—Mateus 24:37-39.

Osha fimana eshi Jesus a popya shi na sha nefimbo laNoa mokunyamukula epulo lovalongwa vaye: “Edidiliko lokuuya kwoye nolexulilo . . . lounyuni olilipi?” (Mateus 24:3) Ovashikuli vaJesus ova kala ve shi shii kutya ounyuni ou otau ka xula po. Mbela eteelelo eli ole va etela oumbada?

Mepingafano naasho, eshi Jesus a fatulula oiningomwa oyo kwa li i na okuholoka omanga exulilo lounyuni inali uya, ye okwe va ladipika va kale va hafa ‘osheshi exupifo lavo ola li tali ehene popepi.’ (Lukas 21:28) Heeno, exupifo okumanguluka kuSatana nokonghalelo yaye ii nokuya mounyuni mupe wombili!—2 Petrus 3:13.

Ndele ounyuni ou otau ka xula po naini? Jesus okwa yandja “edidiliko” lilipi shi na sha ‘nokuuya kwaye nolexulilo lounyuni’?

“Edidiliko”

Oshitya shOshigreka osho sha lundululwa noshitya “okuuya” osho pa·rou·siʹa otashi ti “ekalepo,” sha hala kutya, okukala u li po shili. Hano ngee “edidiliko” li wetike, inashi hala kutya Kristus oku li pokuuya diva ndele otashi ti kutya ye okwa aluka nale nopo e li. Eshi otashi ti kutya ye okwa tameka nale okupangela e li ohamba yomeulu i he wetike nota ka xulifa po diva ovatondi vaye.—Ehololo 12:7-12; Epsalme 110:1, 2.

Jesus ina yandja ashike oshiningomwa shimwe shi kale “edidiliko.” Okwa hepaulula oiningomwa ihapu younyuni nonghalo yao. Aishe ei okwa li i na okuholoka pefimbo olo ovashangi vOmbibeli va luka “omafiku axuuninwa.” (2 Timoteus 3:1-5; 2 Petrus 3:3, 4) Tala kuimwe yomwaayo ya xunganekwa kuJesus oyo kwa li tai ka konekifa “omafiku axuuninwa.”

“Oiwana otai [fikamene] oiwana, noshilongo otashi [fikamene] oshilongo.” (Mateus 24:7) Mefimbo lopaife okwa kala oita inene inai kala ko nale. Omundjokononi umwe okwa ti: “Oita yOtete yOunyuni [oyo ya hovela mo 1914] oya li oita yotete ‘yo venevene.’” Ndele oita itivali younyuni oya yandja oushada munene. Natango oita onghee tai twikile nokuhanauna po edu. Heeno, eendjovo daJesus oda wanifwa panghedi ikumwifi!

“Ondjala tai uya.” (Mateus 24:7) Konima ashike yOita yOtete yOunyuni opa holoka ondjala oyo tashi dulika ya li inenenene mondjokonona aishe. Ondjala itilifi oya holoka yo konima yOita Itivali yOunyuni. Oluhepo loku he na oikulya ya wana ola kuma oshititano shovakali kombada yedu nokudipaa ounona omamiliyona 14 omudo keshe. Okwa kala shili “ondjala!”

“Tapa ka kala . . . omakakamo madjuu edu.” (Lukas 21:11) Konyala oupokati wovanhu ve dulife lwomulongo ovo va fya momafelemido a pita po ova fya omudo keshe komakakamo edu okudja mo 1914. Didilika ashike amwe onhumba oo manene: 1920 muChina omwa fya ovanhu 200 000; 1923 muJapan ovanhu 99 300 ova mona oiponga; 1939 muTurkey ovanhu 32 700 ova fya; 1970 muPeru 66 800 ova fya; no 1976 muChina konyala ovanhu 240 000 (ile ngaashi eedjo dimwe tadi tongo, 800 000) ova ehamekwa. Shoshili, oo oku li “omakakamo madjuu edu”!

“Keenhele neenhele . . . oudu wolutapo.” (Lukas 21:11) Divadiva konima yOita yOtete yOunyuni, ovanhu omamiliyona 21 ova fya kewililila lOvaspania. Science Digest oya hepaulula: “Mondjokonona aishe inaku kala nale efyo tali endelele ngaho nokudipaa shinyanyalifi.” Okudja opo ovanhu omamiliyona omafele ova kala tava fi koudu womutima, okanker, oAIDS nosho yo komaudu amwe.

“Oukolokoshi . . . tau hapupala.” (Mateus 24:12) Okudja mo 1914 ounyuni wefimbo letu owa kala wa shiivika ongounyuni womunyonena nelongifo lekuni. Meenhele dihapu kape na ou ina tila okweenda mepandavanda nonande efimbo lomutenya. Oufiku ovanhu ove li momaumbo avo ve lipatela mo nomivelo doitenda nova tila okuya pondje.

Oinima imwe ihapu oyo ya xunganekwa oya li i na okuholoka pomafiku axuuninwa, naaishe ei otai wanifwa paife. Eshi osha hala kutya exulilo lounyuni oli li popepi. Ndele lao linene, otapa ka kala oonakuxupa. Eshi Ombibeli ya tonga kutya “ounyuni otau xulu po,” yo otai udaneke: “Ou ta longo ehalo laKalunga oye ta kala alushe.”—1 Johannes 2:17.

Hano otu na okulihonga ehalo laKalunga noku li wanifa. Opo nee ohatu dulu oku ka xupa pexulilo lounyuni ou noku ka hafela alushe omanangeko noupuna mounyuni mupe waKalunga. Ombibeli otai udaneke shi na sha nefimbo olo: “Kalunga . . . ota feta po omahodi momesho [ovanhu], nefyo itali kala po vali ile oluhodi ile okulila ile ouyahame itau kala po vali.”—Ehololo 21:3, 4.

Kakele kaayo ya ulikwa shimwe shi lili, oitofwamo yOmishangwa aishe oya kufwa mOmbibeli yOshikwanyama.

[Picture Credit Line on page 6]

Photo Credits: Airplane: USAF photo. Child: WHO photo by W. Cutting. Earthquake: Y. Ishiyama, Hokkaido University, Japan.