Etukulwa 7
Osho Kalunga a ninga opo a xupife ovanhu
1, 2. (a) Ongahelipi omukulunhu wovakwaita omunefele Omuroma a uda ko kutya Omona waKalunga olyelye? (b) Omolwashike Jehova a pitika Jesus a fye?
OMUTENYA umwe poitemadula, konyala omido 2 000 da pita po, omukulunhu wovakwaita omunefele Omuroma okwa li a mona nghee ovalumenhu vatatu tava kondjo nomwenyo nokufya efyo tali udifa omwenyo munyenye. Omukwaita oo okwa li unene ta tongolola umwe womuvo—Jesus Kristus. Jesus okwa li a valelwa koshiti. Efimbo lokufya kwaye eshi la fika moshanga shomutenya, eulu ola laula. Eshi a fya, edu ola kakama neenghono, nomukwaita okwa ingida ta ti: “Omunhu ou okwa li shili Omona waKalunga.”—Markus 15:39.
2 Omona waKalunga! Omukwaita winya okwa li e li mondjila. Opo ashike a mono oshiningwanima sha fimana osho inashi ningwa nande onale kombada yedu. Peemhito dimwe da tetekela, Kalunga okwa popya ye mwene kutya Jesus Omona waye omuholike. (Mateus 3:17; 17:5) Omolwashike Jehova a pitika Omona waye a fye? Omolwaashi onghedi oyo oya li oshilongifo osho Kalunga a longifa okuxupifa ovanhu moulunde nefyo.
OKWA HOOLOLELWA ELALAKANO LE LIKALEKELWA
3. Omolwashike kwa li sha wapala opo Omona waKalunga Ewifa oye a hoololwe omolwonghandangala ye likalekelwa i na sha novanhu?
3 Ngaashi twe lihonga nale membo eli, Jesus oko a kala nale omanga ina ninga omunhu. Okwa lukwa ‘Omona Ewifa’ laKalunga molwaashi Jehova okwe mu shita odikilila. Konima yaasho Kalunga okwa longifa Jesus okushita oinima ikwao aishe. (Johannes 3:18; Ovakolossi 1:16) Jesus okwa kala e hole unene tuu ovanhu. (Omayeletumbulo 8:30, 31) Kashi kumwifa hano eshi Jehova a hoolola Omona waye Ewifa a dane onghandangala ye likalekelwa eshi ovanhu va tokolelwa efyo!
4, 5. Omanga Jesus ine uya kedu, Ombibeli oya holola shike shi na sha nOludalo lopaMessias?
4 Eshi a yandja ehandukilo kuAdam, kuEva nosho yo kuSatana moshikunino shaEden, Kalunga okwa popya Omuxupifi womonakwiiwa e li ‘oludalo.’ Oludalo olo okwa li tali ke uya okukufa po owii oo wa etwa kuSatana Ondiaboli, “eyoka likulu.” Doshili, Oludalo la udanekwa otali ka nyanyaula Satana naaveshe ovo tave mu shikula.—Genesis 3:15; 1 Johannes 3:8; Ehololo 12:9.
5 Konima yomafelemido a ka lupuka, mokweendela ko kwefimbo Kalunga okwa holola shihapu shi na sha nOludalo olo tali ifanwa yo Messias. Ngaashi sha ulikwa momusholondodo oo u li pepandja 37, omaxunganeko mahapu otaa yandje ouyelele moinima ihapu i na sha nokukalamwenyo kwaye kombada yedu. Pashihopaenenwa, okwa li e na okulididimikila okuningwa nai opo a dane onghandangala yaye melalakano laKalunga.—Jesaja 53:3-5.
MOLWASHIKE MESSIAS KWA LI E NA OKUFYA
6. PaDaniel 9:24-26, Messias okwa li ta ka wanifa po shike, nongahelipi?
6 Exunganeko olo la shangwa muDaniel 9:24-26 ola xunganeka kutya Messias—Omuvaekwa waKalunga—ota ka wanifa po elalakano la kula. Okwa li e na okuuya kedu “opo nee eliteeko tali xulu po, nowii tau xulifwa po noilonga ii tai kwatakanifwa, nouyuki . . . tau hololwa” fiyo alushe. Messias ota ka kufa po ehandukilo lefyo povanhu ovadiinini. Ndele eshi okwa li te ke shi ninga ngahelipi? Exunganeko otali yelifa kutya okwa li e na oku ka “dipawa.”
7. Omolwashike Ovajuda kwa li hava yandje omayambo oinamwenyo, naashi okwa li tashi faneke shike?
7 Ovaisrael vonale okwa li ve shii nawa ediladilo li na sha nekwatakanifo omolwomatauluko. Mokulongela Kalunga koshi yOmhango oyo e va pa okupitila muMoses, ova kala alushe hava yandje omayambo oinamwenyo. Eshi osha dimbulukifa oshiwana shaIsrael kutya ovanhu ova pumbwa sha shi va kwatakanife ile shi uvike omatimba avo. Omuyapostoli Paulus okwa kwatela kumwe efinamhango olo monghedi ei ta ti: “[Kape] nekufile po lomatimba pe he netiko lohonde.” (Ovaheberi 9:22) Ovakriste kave li koshi yOmhango yaMoses nosho yo oiteelelwa yayo, ngaashi omaxwikiloyambo. (Ovaroma 10:4; Ovakolossi 2:16, 17) Ova shiiva yo kutya omaxwikiloyambo oinamwenyo itaa dulu okuyandja edimepo lomatimba filufilu tali kalelele. Ponhele yaasho, omaxwikiloyambo aa okwa li taa faneke exwikiloyambo li na ongushu—olo laMessias ile Kristus. (Ovaheberi 10:4, 10; yelekanifa Ovagalati 3:24.) Ndelenee otashi dulika u pule: ‘Ndele mbela okwa li ngoo sha pumbiwa shili opo Messias a fye?’
8, 9. Oinima i na ongushu ilipi Adam naEva va kanifa, nongahelipi osho va ninga sha kuma oludalo lavo?
8 Heeno, Messias okwa li e na okufya opo ovanhu va dule okuxupifwa. Okuuda ko kutya omolwashike, otu na okudiladila koshikunino shaEden nokukendabala tu ude ko ouhapu waasho sha kanifwa kuAdam naEva eshi va tukululila Kalunga oshibofa. Okwa li ve na okukala nomwenyo fiyo alushe! Ve li ovana vaKalunga okwa li yo tava hafele ekwatafano lodikilila naye. Ndele eshi va ekelashi okupangelwa kuJehova, aishe oyo ove i kanifa nova etela ovanhu aveshe oulunde nefyo.—Ovaroma 5:12.
9 Ovakulunhu vetu votete okwa li va fa va shinauna po eliko lihapu ndele tave litula moikolo ihapu. Oludalo laAdam naEva ola fyuulula po oikolo oyo. Molwaashi inatu dalwa twa wanenena—tu he na omatimba, keshe umwe womufye oha nyono noha fi. Ngeenge hatu vele ile hatu popi sha osho tashi ehameke osho twa hala oku shi alulula ngeno okwa li hatu dulu, kungaha ohatu mono oilanduliko yoikolo oyo twa fyuulula—okuhawanenena kwovanhu. (Ovaroma 7:21-25) Eteelelo letu oli li ashike mokumonununa osho Adam a kanifa. Ndelenee omwenyo wopanhu wa wanenena itatu dulu oku u longela. Molwaashi ovanhu aveshe inava wanenena ohava nyono, atushe otwe lilongela efyo, hamwenyo.—Ovaroma 6:23.
10. Oshike kwa li sha pumbiwa okukulila ko osho sha kanifwa kuAdam?
10 Ndelenee mbela ope na sha osho tashi dulu okuyandjwa shi pingene po omwenyo oo wa kanifwa kuAdam? Omufikamhango waKalunga wouyuki ohau pula osho sha yeleka, ‘omwenyo omomwenyo.’ (Exodus 21:23) Hano omwenyo okwa li u na okuyandjwa ku futwe omwenyo oo wa kanifwa. Hakeshe ashike omwenyo kwa li tau ka kala wa wana. Epsalme 49:8, 9 otali popi ovanhu inava wanenena tali ti: “Kape na omunhu ta dulu okukulila omumwaina, nokuyandjela mukwao oikulila kuKalunga, osheshi okufutila omwenyo oifuta apa i fike otai nyengana, ye ke na oku shi hetekela vali fiyo alushe.” Ndele onghalo kai na hano mboli eteelelo? Hasho nandenande.
11. (a) Oshitya “oikulila” mOshiheberi otashi ti ngahelipi? (b) Olyelye aeke oye kwa li ta dulu okukulila ovanhu, nomolwashike?
11 Melaka lOshiheberi, oshitya “oikulila” ohashi ulike komuvalu oo hau futwa okukulila onghwate, nohashi ulike yo koungushu wa yeleka. Omunhu ashike oo e na omwenyo wa wanenena kwa li ta dulu okuyandja shi fike pwaasho sha kanifwa kuAdam. Konima yaAdam, omunhu oo kwa li a dalwa a wanenena kombada yedu oJesus Kristus ashike. Onghee hano, Ombibeli otai ifana Jesus “Adam ou axuuninwa” notai tu shilipaleke kutya Kristus okwe “liyandja Ye mwene oikulila yaaveshe.” (1 Ovakorinto 15:45; 1 Timoteus 2:5, 6) Nonande Adam a tandavelifa efyo kovana, efyuululo olo Jesus a fiya po omwenyo waalushe. Ovakorinto votete 15:22 otava yelifa: “Ngaashi aveshe tava file muAdam, osho yo aveshe tava ningwa ovanamwenyo muKristus.” Hano, osha yeleka eshi Jesus ta ifanwa “Tate yaalushe.”—Jesaja 9:5, 6.
NGHEE OIKULILA YA FUTWA
12. Onaini Jesus a ninga Messias, nokonima yaasho okwa ka kala nokulonga shike monghalamwenyo yaye?
12 Poshikufukulombo mo 29 O.P., Jesus okwa ya komupambele waye Johannes a ka ninginifwe nokungaha okwe liyandja okulonga ehalo laKalunga. Poshiningwanima osho, Jehova okwa vaeka Jesus nomhepo iyapuki. Kungaha Jesus okwa ninga Messias ile Kristus, a vaekwa kuKalunga. (Mateus 3:16, 17) Opo nee Jesus okwa hovela oukalele waye womido nhatu netata. Okwa endaenda moshilongo shambulavo, ta udifa shi na sha nOuhamba waKalunga nokwoongela ovashikuli vadiinini. Ndelenee, ngaashi sha xunganekwa, diva okwa hovela okupatanekwa.—Epsalme 118:22; Oilonga 4:8-11.
13. Oiningwanima ilipi ya twala fiyo omefyo laJesus e li omukanyateli woudiinini?
13 Jesus okwa nyaneka pomutenya oihelele yovakwatelikomesho vomalongelokalunga nouladi, ndele ova pangela oku mu dipaa. Konahiya ova pangela omhangela yomeholeko inyanyalifa ya kwatela mo ekengelelo, ekwato inali yukila ko, omhangu i he li pauyuki, etokolo li he li paveta nosho yo omalundilo kutya ota kondjifa epangelo. Jesus okwa dengwa, okwa fiilwa omate, okwa shekwa, nokwa dengwa noshokoto oyo ya ningilwa okuxwandununa eenhumba daye. Opo nee omupangeli Omuroma Pontius Pilatus okwe mu tokolela efyo komuti womahepeko. Okwa valelwa kopala yoshiti ndele ta kala a endjelela oko. Omufudo keshe eshi ta fuda owa li tau mu ehameke unene, nosha pula eetundi dihapu manga ina fya. Momahepeko aeshe aa, Jesus okwa kala a kanyatela oudiinini wa wanenena muKalunga.
14. Omolwashike Kalunga a pitika Omona waye a mone oixuna nokufya?
14 Kungaha, osha li mu 14 Nisan, 33 O.P., eshi Jesus a yandja omwenyo waye u li “oikulila yavahapu.” (Markus 10:45; 1 Timoteus 2:5, 6) Okudja meulu, Jehova okwa li ta dulu okumona nghee Omona waye omuholike ta mono oixuna nota fi. Omolwashike Kalunga a pitika oshinima shinyanyalifa sha tya ngaha shi ningwe? Okwe shi ninga molwaashi oku hole ovanhu. Jesus okwa ti: “Osho Kalunga a kala e hole ounyuni, Oye a yandja Omona waye Ewifa, opo keshe ou [e na eitavelo tali longo muye, NW] a ha kane, ndelenee a kale e nomwenyo waalushe.” (Johannes 3:16) Efyo laJesus otali tu hongo yo kutya Jehova oye Kalunga e na ouyuki wa wanenena. (Deuteronomion 32:4) Vamwe otashi dulika va kumwa kutya omolwashike Kalunga ina efa po omafinamhango aye ouyuki oo taa pula omwenyo omomwenyo ndele ta kala e lipwililikila ofuto yokufuta oilonga youlunde waAdam. Etomheno oleli kutya Jehova ohe li ufa alushe keemhango daye nohe di diinine, kutya nee otadi mu pula shihapu.
15. Molwaashi okwa li tashi ka kala shi he li pauyuki okupitika okukala po kwaJesus ku xule po fiyo alushe, Jehova okwa ninga po shike?
15 Ouyuki waJehova owa li yo tau pula opo efyo laJesus li kale noshidjemo shelao. Doshili, mbela okwa li ngoo tapa ka kala ouyuki ngeno omudiinini Jesus okwa efelwe a kofe mefyo fiyo alushe? Hasho nande! Omishangwa dOshiheberi oda xunganeka kutya omuyapuki waKalunga kakwa li ta ka kala mombila. (Epsalme 16:10; Oilonga 13:35) Okwa kala a fya oule womafiku atatu, nopo nee Jehova Kalunga okwe mu nyumunina momwenyo e li omunhu wopamhepo omunaenghono.—1 Petrus 3:18.
16. Jesus okwa ninga shike eshi a shuna meulu?
16 Pefyo laye, Jesus okwa yandja omwenyo waye wopanhu fiyo alushe. Eshi a nyumuninwa momwenyo womeulu, okwa ninga omhepo tai yandje omwenyo. Natango, eshi Jesus a ya monhele iyapuki meshito alishe, okwa li a hangana vali naXe omuholike nopanghedi ya longekidwa okwa yandja kuYe ongushu yomwenyo waye wopanhu wa wanenena. (Ovaheberi 9:23-28) Opo nee ongushu yomwenyo oo u na ondilo otai dulu okulongifwa kovanhu ovaduliki. Eshi otashi ti ngahelipi kwoove?
OIKULILA YAKRISTUS NAAVE
17. Ongahelipi hatu dulu okulimonena ediminepo she likolelela kekuliloyambo laKristus?
17 Konakona eenghedi nhatu omo ekuliloyambo laKristus tali ku etele ouwa nokuli nopefimbo lopaife. Yotete, otali eta ediminepo lomatimba. Okupitila meitavelo mohonde yaJesus ya tilwashi, otu “nekulilo,” heeno, ‘edimepo lomanyonauno etu.’ (Ovaefeso 1:7) Hano nande otwa nyona sha kwata moiti, ohatu dulu okupula Kalunga e tu dimine po medina laJesus. Ngeenge otwe livela ombedi shili, Jehova ota ka longifa ongushu yekuliloyambo lOmona waye molwetu. Kalunga ohe tu dimine po nohe tu nangeke noupuna opo tu kale tu na eliudo liwa, ponhele yoku tu tokolela efyo olo twe lilongela mokunyona.—Oilonga 3:19; 1 Petrus 3:21.
18. Omonghedi ilipi ekulilo laJesus tali tu pe eteelelo?
18 Onhivali, ekuliloyambo laKristus otali yandje ekanghameno leteelelo letu lomonakwiiwa. Memoniko, omuyapostoli Johannes okwa mona kutya “ongudu inene ya nyengana okuvalwa” otai ka xupa moshiponga shexulilo longhalelo yoinima. Omolwashike tava ka xupa eshi Kalunga ta ka hanauna po vamwe vahapu? Omwengeli okwa lombwela Johannes kutya ongudu inene oya “kosha oikutu yavo, ndele ve i yelifa mohonde yOdjona,” Jesus Kristus. (Ehololo 7:9, 14) Ngeenge ohatu kala neitavelo tali longo mohonde ya tilwashi yaJesus Kristus nokukala metwokumwe noiteelelwa yaKalunga, ohatu ka kala twa koshoka koshipala shaKalunga nohatu ka kala neteelelo lomwenyo waalushe.
19. Ekulilo laKristus otali ulike ngahelipi kutya ye nosho yo Xe ove ku hole?
19 Onhinhatu, ekuliloyambo olo euliko lohole yaJehova la denga mbada. Efyo laKristus ola ulika oilonga ivali inene yopahole mondjokonona yeshito alishe: (1) ohole yaKalunga mokutuma Omona waye e tu file; (2) ohole yaJesus mokuliyamba ye mwene e li ekulilo. (Johannes 15:13; Ovaroma 5:8) Ngeenge ohatu kala tu na eitavelo tali longo shili, ohole oyo otai longo kukeshe umwe womufye. Omuyapostoli Paulus okwa ti: “Omona waKalunga . . . e hole nge nokwe liyandja ponhele yange.”—Ovagalati 2:20; Ovaheberi 2:9; 1 Johannes 4:9, 10.
20. Omolwashike tu na okukala neitavelo tali longo mekuliloyambo laJesus?
20 Onghee hano, natu ulike olupandu molwohole oyo ya ulikwa kuKalunga naKristus mokukala neitavelo tali longo mekuliloyambo laJesus. Okuninga ngaha otaku twala komwenyo waalushe. (Johannes 3:36) Ndele exupifo letu halo etomheno la fimana unene lokukalamwenyo nokufya kwaJesus kombada yedu. Ahowe, tetetete okwa li e na oshisho nomhata inene, i na sha neshito alishe. Ngaashi hatu ke shi mona metukulwa tali landula, omhata oyo oye tu kuma atusheni molwaashi otai ulike kutya omolwashike Kalunga a efela oukolokoshi nokumona oixuna ku lihanene mounyuni efimbo lile ngaho.
KONAKONA ESHIIVO LOYE
Omolwashike Jesus kwa li e na okufya opo a xupife ovanhu?
Oikulila oya futwa ngahelipi?
Omeenghedi dilipi to mono ouwa mekulilo?
[Efano la mana ko epandja pepandja 67]