Etukulwa 8
Omolwashike Kalunga a efa okumona oixuna ku kale po?
1, 2. Luhapu ovanhu ohave linyenge ngahelipi shi na sha nokumona oixuna kwovanhu?
NGEENGE oiponga inene tai holoka oyo tai hanauna po omaliko notai pula eemwenyo, vahapu ihava dulu oku shi uda ko kutya omolwashike oinima itilifa ya tya ngaho tai ningwa. Vamwe otave lipula shi na sha nehapupalo loukwanyanya nosho yo oiningilewina yomunyonena nelongifo leenghono. Naave yo otashi dulika wa li we lipula kutya: ‘Omolwashike Kalunga a efa okumona oixuna ku kale po?’
2 Molwaashi vahapu inava mona enyamukulo tali mbilipaleke kepulo eli, ova efa po okwiitavela muKalunga. Ove udite kutya ye ke na ko nasha novanhu. Vakwao ovo va tambula ko okumona oixuna ku li oshitukulwa shonghalamwenyo ohava ningi olungwenye nokupa Kalunga ombedi omolwowii aushe oo u li moulikumwe wovanhu. Ngeenge owa li u na omaliudo a tya ngaha, osha yela kutya oto ka kala u na ohokwe meendjovo dOmbibeli di na sha noinima ei.
OKUMONA OIXUNA IHAKU DI KUKALUNGA
3, 4. Omolwashike hatu dulu okukala noushili kutya owii nosho yo okumona oixuna ihaku di kuJehova?
3 Ombibeli otai tu shilipaleke kutya okumona oixuna oko tu wete kwe tu dingilila itaku etifwa kuJehova Kalunga. Pashihopaenenwa, omuhongwa Omukriste Jakob okwa shanga ta ti: “Omunhu ngenge ta shindwa, ina tya: ‘Ohandi shindwa kuKalunga,’ osheshi Kalunga iha dulu a shindwe kowii, naye mwene iha shindi nande omunhu.” (Jakob 1:13) Molwaashi osho shi li ngaho, Kalunga ita dulu nande okukala omweetifi womaudjuu oo taa hepeke ovanhu. Ye iha etele ovanhu omayeleko opo ngeno va wapalele onghalamwenyo yomeulu, noiha monifa ovanhu oixuna omolwowii vati oo va longa mokukalamwenyo kwomonakudiwa.—Ovaroma 6:7.
4 Natango vali, nande oinima ihapu itilifa oya ningilwa medina laKalunga ile laKristus, mOmbibeli kamu na sha osho tashi etifa ediladilo kutya umwe womuvo okwa hokwa oilonga ya tya ngaho. Kalunga naKristus kave na sha naavo tava ti otave va longele ndele otava fufya notava nyokoma, tava dipaa notava nyeka nohava ningi oinima ihapu ikwao oyo tai monififa ovanhu oixuna. Doshili, ‘okweenda kwomuhenakalunga oko oixuna koshipala shOmwene.’ Kalunga oku “li kokule novahenakalunga.”—Omayeletumbulo 15:9, 29.
5. Amwe omomaukwatya aJehova elipi, noha kala e uditile ngahelipi oishitwa yaye?
5 Ombibeli otai hokolola Jehova e li “omunalukeno nomunamutimanghenda.” (Jakob 5:11) Otai hepaulula kutya “Omwene oku hole ouyuki.” (Epsalme 37:28; Jesaja 61:8) Ye iha kwatele onghone. Oha file oshisho nonghenda oishitwa yaye, naaishe ohe i pe osho shiwa omolwonghalonawa yayo. (Oilonga 14:16, 17) Eshi Jehova okwe shi ninga nale pehovelo longhalamwenyo kombada yedu.
EHOVELO LA WANENENA
6. Eengano dimwe otadi ulike ngahelipi ondjokonona yovanhu yopehovelo?
6 Atusheni otwa ikilila okumona nokukala tu udite ouyahame nokumona oixuna. Onghee hano otashi dulika shi kale shidjuu kwoove u diladile efimbo olo pe he na okumona oixuna, ndele oinima osho ya li ngaho pehovelo londjokonona yovanhu. Nokuli nomeengano doiwana imwe otamu popiwa ehovelo lelao la tya ngaho. Meengano dOshigreka, lotete ‘lomOmafimbo Atano Ovanhu’ okwa li hali ifanwa “Efimbo Liwa elela.” Mulo ovanhu ova kala ve na onghalamwenyo i na elao, ve he na oilonga idjuu, ouyahame nosho yo omaudjuu oo haa etwa koukulupe. Ovachina otava ti kutya pefimbo lOmupangeli Mushunga (Huang-Ti) ou ha popiwa meengano, ovanhu ova li mombili nova li hava hafele nokuli oukumwe nonghalomhepo nosho yo noifitukuti yomoixwa. Ovapersia, Ovaegipti, Ovatibeti, Ovaperu nOvameksiko aveshe ove na eengano di na sha nefimbo lelao nolewaneneno pehovelo londjokonona yovanhu.
7. Omolwashike Kalunga a shita edu novanhu?
7 Eengano doiwana otadi endulula ashike ehokololo likulukulu olo la shangwa londjokonona yovanhu, Ombibeli. Otai tu lombwele kutya Kalunga okwa tula ovanhu votete vavali, Adam naEva moparadisa hai ifanwa oshikunino shaEden ndele okwe va lombwele ta ti: “Dalafaneni nokuhapupala ndee yadifeni edu, lo nali kale mepangelo leni.” (Genesis 1:28) Ovakulunhu vetu votete ova hafela ewaneneno nokwa li ve na eteelelo lokumona edu alishe tali ningi oparadisa i liwe kovanhu ve li ovakwaneumbo va wanenena ve li mombili nelao tali kalelele. Eli olo la li elalakano laKalunga mokushita edu novanhu.—Jesaja 45:18.
ESHONGO LOUYELANI
8. Adam naEva okwa li va teelelwa va dulike kelombwelo lilipi, ndele oshike sha ningwa po?
8 Opo va kale va hokiwa kuKalunga, Adam naEva okwa li ve na okulikelela va ha lye “komuti wokushiiva ouwa nowii.” (Genesis 2:16, 17) Ngeno ova dulikile komhango yaJehova, ngeno kape na okumona oixuna oko taku nyono onghalamwenyo yovanhu. Mokudulika kelombwelo laKalunga, ngeno ova dula okuulika ohole yavo yokuhola Jehova nosho yo oudiinini wavo muye. (1 Johannes 5:3) Ndele ngaashi twe lihonga metukulwa 6, hasho sha ningwa po. Eshi Eva a ladipikwa kuSatana okwa lya oshiimati shokomuti oo. Konima yefimbo, Adam okwa lya yo oshiimati osho sha dilikwa.
9. Omhata yashike ya kwatela mo Jehova ya tukululwa kuSatana?
9 Mbela ou wete kutya osho sha ningwa po osha kwata moiti? Satana okwa ponokela ondodo yaJehova e li Omukombadambada. Mokutya: “Nye itamu ka fya shili,” Ondiaboli oya pataneka eendjovo daKalunga odo tadi ti: “Ove u noku ka fya shili.” Eendjovo daSatana da shikula ko otadi yandje ediladilo kutya Jehova okwa kala te lipwililikile Adam naEva omolwomhito tashi dulika yokufa Kalunga, osho tashi ti kutya itava ka kala vali ve Mu pumbwa mokutokola osho shiwa naasho shii. Onghee hano eshongo laSatana ola eta po elimbililo li na sha noufemba wondodo yaJehova wokukala e li Omunamapangelo aeshe.—Genesis 2:17; 3:1-6.
10. Satana okwa yandja ediladilo lilipi shi na sha novanhu?
10 Satana Ondiaboli okwa yandja yo ediladilo kutya ovanhu otava ka dulika ashike kuJehova ngeenge tava mono ouwa mokudulika kuKalunga. Noitya imwe, oudiinini wovanhu owa tulwa momalimbililo. Satana okwa lundila kutya kape na nande omunhu ta ka kala omudiinini muKalunga nehalo liwa. Epopyo eli lii louyelani la ningwa kuSatana ola hololwa poluhaela mehokololo lOmbibeli li na sha naJob, omupiya waJehova omudiinini oo a pita meyeleko linene efimbo lonhumba komesho yo 1600 K.O.P. Ngeenge to lesha omatukulwa avali otete embo laJob, oto dulu okumona etomheno kutya omolwashike ovanhu hava mono oixuna nomolwashike Kalunga e i efa i kale po.
11. Job okwa li omulumenhu a tya ngahelipi, ndele Satana okwe mu lundila ngahelipi?
11 Job, “omulumenhu e he noshipo, nomuyuki,” okwa ponokelwa kuSatana. Tete, Satana okwa popila Job momutyanai mokupula epulo ta ti: “U shii Job ota tila Kalunga ongaho?” Opo nee Ondiaboli oya lundila Kalunga naJob noinheya mokupopya kutya Jehova okwa landa oudiinini waJob moku mu amena noku mu nangeka noupuna. Satana okwa shonga Jehova ta ti: “Ndelenee nana eke loye u kume aishe e i kwete: ye ote ke ku [tuka, NW] shili moipafi yoye.”—Job 1:8-11.
12. (a) Omapulo elipi kwa li taa dulu okunyamukulwa ashike ngeenge Kalunga okwa efa Satana opo a yeleke Job? (b) Okuyelekwa kwaJob okwa eta oshidjemo shashike?
12 Mbela Job okwa li ashike ta longele Jehova molwomauwa aeshe oo a pewa kuYe? Mbela oudiinini waJob okwa li tau dulu okupita mo momayeleko? Natango vali, mbela Jehova okwa li e na elineekelo la wana momupiya waye opo a pitike a yelekwe? Omapulo aa okwa li taa dulu okunyamukulwa ngeenge Jehova ota ka pitika Satana a etele Job omayeleko madjuu. Okukatuka kwaJob noudiinini koshi yeyeleko la efuwa kuKalunga, ngaashi tali hokololwa membo laJob, oya li eyukipalifo louyuki waJehova pauyadi nosho yo loudiinini womunhu.—Job 42:1, 2, 12.
13. Osho sha ningwa muEden nosho yo osho sha ningilwa Job oshe tu kwatela mo ngahelipi?
13 Ndelenee osho sha ningwa moshikunino shaEden naasho sha ningilwa omulumenhu Job oshi na eityo linene. Eemhata odo da tukululwa kuSatana oda kwatela mo ovanhu aveshe, nafye twa kwatelwa mo yo. Edina laKalunga ola nyatekwa, nounamapangelo waye owa li wa shongwa. Ouyuki womunhu oo a shitwa kuKalunga, okwa li wa tulwa momalimbililo. Eemhata edi okwa li di na okukandulwa po.
NGHEE EEMHATA DI NA OKUKANDULWA PO
14. Nakulundilwa ota dulu okuninga shike ngeenge a taalelwa keshongo la nyika ouyelani?
14 Oku shi faneka, natu tye nee kutya ove omudali omunahole u na ounona vonhumba moukwaneumbo u na elao. Natu tye umwe womovashiinda shoye ota ende ta tandavelifa oipupulu, te ku lundile kutya ove omudali mwii. Ongahelipi mbela ngeenge omushiinda shoye ota popi kutya ovana voye kave ku hole, nonokutya ove li ashike pwoove molwaashi kave shii sha shimwe shiwa, nosho yo kutya otave ke ku fiya po shimha ashike umwe e va pe omhito va dje mo. Otashi dulika u tye: ‘Osho kashi fi nande shoshili!’ Osho, ndele oto ke shi ulika ngahelipi? Ovadali vamwe otashi dulika ve linyenge nehandu linene. Kakele kokweeta omaupyakadi mahapu, okulinyenga ngaho mokulongifa eenghono otaku ka yambidida oipupulu. Onghedi iwa yokukandula po oupyakadi oyo okuyandja omhito komulundili woye a yandje oumbangi wokupopya kwaye osho yo kounona voye va ulike kutya ove ku hole shili.
15. Ongahelipi Jehova a tokola a pongolole po eshongo laSatana?
15 Jehova okwa fa omudali omunahole. Adam naEva otava dulu okuyelekwa nounona, na Satana okwa fa omushiinda ta popi oipupulu. Kalunga mounongo waye ina hanauna po divadiva Satana, Adam naEva, ndele okwa pitika ovanyoni ava opo va kale nomwenyo okafimbo. Eshi osha yandja omhito kovakulunhu vetu votete opo va hovele oukwaneumbo wovanhu, nosha yandja yo efimbo kOndiaboli opo i yandje oumbangi ngeenge okupopya kwayo okwoshili tuu opo eemhata di dule okukandulwa po. Ndelenee okudja petameko, Kalunga okwa kala e shii kutya ovanhu vamwe otava ka kala ovadiinini muye nokungaha otava ka ulika kutya Satana omunaipupulu. Inatu pandula tuu eshi Jehova a kala ta twikile okunangeka noupuna nokukwafela ovo ve mu hole!—2 Omafimbo 16:9; Omayeletumbulo 15:3.
OSHIKE SHA ULIKWA?
16. Ongahelipi ounyuni wa ya mepangelo laSatana?
16 Konyala mondjokonona yovanhu aishe, Satana okwa kala a manguluka filufilu okulongifa eemhangela daye okupangela ovanhu. Shimwe shomoinima oyo a longa osho kutya okwa kala ta nwefa mo omapangelo opapolotika nokwa xumifa komesho omalongelokalunga oo taa yukifa elongelokalunga kuye ponhele yoku li yukifa kuJehova. Onghee hano Ondiaboli oya ninga ‘kalunga kefimbo lounyuni ou,’ noya ifanwa “omupangeli wounyuni ou.” (2 Ovakorinto 4:4; Johannes 12:31) Doshili, ‘ounyuni aushe ou li mepangelo lomunawii.’ (1 Johannes 5:19) Eshi mbela otashi ti kutya Satana okwa yandja oumbangi komapopyo aye kutya ota dulu okunana ko ovanhu aveshe kuJehova Kalunga? Hasho nande! Ndele nande a pitika Satana a kale po, Jehova ota ka wanifa po elalakano laye. Ndelenee Ombibeli otai holola shike shi na sha nokweefa kwaKalunga oukolokoshi u kale po?
17. Oshike tu na okukaleka momadiladilo shi na sha nosheetifi shoukolokoshi nokumona oixuna?
17 Oukolokoshi nosho yo okumona oixuna itaku etwa kuJehova. Molwaashi Satana oye omupangeli wounyuni ou noye kalunga konghalelo ei yoinima, ye nosho yo ovo va ama kombinga yaye ovo ve na okupewa ombedi shi na sha nonghalo yopefimbo lopaife youlikumwe wovanhu nosho yo omaluhodi aeshe oo taa monifa ovanhu oixuna. Kape na umwe ta dulu okupopya shi li mondjila kutya Kalunga oye omweetifi womaudjuu oo.—Ovaroma 9:14.
18. Okweefa kwaJehova oukolokoshi nokumona oixuna ku kale po okwa ulika shike shi na sha nediladilo lokumanguluka ko kuKalunga?
18 Okweefa oukolokoshi kwaJehova nokumona oixuna ku kale po okwa ulika kutya okumanguluka ko kuKalunga inaku eta po ounyuni muwa. Itashi dulu okupatanwa kutya ondjokonona oya kala tai didilikilwa koiponga ya landulafana. Etomheno laashi oleli kutya ovanhu ova hoolola okulalakanena ondjila yavo vene yemanguluko noinava ulika kutya ove na ko nasha shili neendjovo daKalunga nosho yo nehalo laye. Eshi oshiwana shaJehova shonale nosho yo ovawiliki vasho moku he na oudiinini va shikula “ondjila i holike” ndele tava ekeleshi eendjovo daye, oilanduliko oya li oshiponga. Okupitila momuprofeti waye Jeremia, Kalunga okwe va lombwela ta ti: “Ovanongo otava fifwa ohoni, tava haluka ndele tava kwatwa. Tala, ova ekelashi ondjovo yOmwene, ounongo washike ngeno ve u kwete?” (Jeremia 8:5, 6, 9, yelekanifa NW. ) Molwaashi ovanhu ova ponya okushikula omifikamhango daJehova, luhapu ova kala ngaashi oshikepa i he na oshishingifo, tai telaanifwa mefuta la pindjala.
19. Ope na euliko lashike kutya Satana ita dulu okupilamenifa ovanhu aveshe Kalunga?
19 Eshi Kalunga a efa oukolokoshi nokumona oixuna ku kale po osha ulika yo kutya Satana ina dula okuningifa ovanhu aveshe va pilamene Jehova. Ondjokonona otai ulike kutya opa kala alushe pe na ovanhu ovo va kala alushe va diinina muKalunga kashi na nee mbudi kutya ova yelekwa ile ova mona oiponga ya tya ngahelipi. Momukokomoko womafelemido a pita, eenghono daJehova oda hololwa molwovapiya vaye, nedina laye ola shiivifwa kombada yedu. (Exodus 9:16; 1 Samuel 12:22) Ovaheberi etukulwa 11 otave tu hokololele shi na sha nomusholondodo mule wovadiinini, mwa kwatelwa Abel, Henok, Noa, Abraham naMoses. Ovaheberi 12:1 otai va ifana ‘oshilemo shi fike apa sheendombwedi.’ Vo ova li ovahopaenenwa ve na eitavelo muJehova ihali tengauka. Pefimbo lopaife vahapu ova yandja yo eemwenyo davo mokukanyatela oudiinini ihau tengauka muKalunga. Omolweitavelo lavo nosho yo ohole yavo, ovanhu va tya ngaha ova ulika filufilu nope he na eemhata kutya Satana ita dulu okuningifa ovanhu aveshe va pilamene Kalunga.
20. Jehova eshi a efa oukolokoshi nokumona oixuna ku twikile okukala po osha ulika shike shi na sha naye nosho yo novanhu?
20 Hauxuuninwa, eshi Jehova a efa oukolokoshi nokumona oixuna ku twikile okukala po osha ulika kutya Jehova Omushiti, oye aeke e na eenghono noufemba wokupangela ovanhu opo va mone omanangeko noupuna nelao laalushe. Oule womafelemido, ovanhu ova kendabala nomapangelo omaludi mahapu. Ndele oshidjemo osha li ngahelipi? Omaupyakadi a kitakana noiponga oyo ya taalela oiwana kunena oi li euliko la wana shili, ngaashi Ombibeli tai shi ulike kutya ‘omunhu ota pangelele omukwao omupya.’ (Omuudifi 8:9) Jehova oye aeke ta dulu oku tu xupifa nokuwanifa po elalakano laye lopehovelo. Ote ke shi ninga ngahelipi nonaini?
21. Oshike tashi ka ningilwa Satana, nolyelye ta ka longifwa oku shi ninga?
21 Divadiva konima eshi Adam naEva va ninga oihakanwa yomhangela yaSatana, Kalunga okwa shiivifa elalakano laYe li na sha naasho ta ka longifa mokweeta po exupifo. Shi na sha naSatana, Jehova okwa popya ta ti: “Ame handi ka tula outondanhu pokati koye nomwalikadi . . . nokoludalo loye nokoludalo laye. Ye ota ka nyanyaula omutwe woye ndele ove to ke mu twa moshififinwa.” (Genesis 3:15) Okupopya oko okwa shilipaleka kutya Ondiaboli itai ka pitikwa nande okulonga oilonga yayo yowii fiyo alushe. E li Ohamba yOuhamba wopaMessias, Oludalo la udanekwa, Jesus Kristus, otali ka ‘nyanyaula omutwe waSatana.’ Heeno, Jesus ota ka nyanyaula po “diva” omunashibofa Satana!—Ovaroma 16:20.
OTO KA NINGA SHIKE?
22. (a) Omapulo elipi po u na okutaalela? (b) Nande Satana ta yukifa ehandu laye kwaavo va diinina muKalunga, omushike omo tava dulu okukala ve na oushili?
22 Paife eshi wa shiiva eemhata odo da kwatelwa mo, oto ka ama kombinga yalyelye? Mbela okupitila moilonga yoye oto ka ulika kutya ove omuyambididi waJehova mudiinini? Molwaashi Satana oku shii kutya efimbo laye olixupi, ota ka ninga keshe osho ta dulu opo a yukife ehandu laye kwaavo va hala okukala noudiinini muKalunga. (Ehololo 12:12) Ndele oto dulu okulineekela muKalunga omolwekwafo molwaashi “Omwene e shii kuxupifa ovayuki momahongaulo.” (2 Petrus 2:9) Ita ka pitika u yelekwe shi dule pwaasho to dulu okuhumbata, note ke ku ningila ondjila yokupita mo opo u dule okulididimikila omayeleko.—1 Ovakorinto 10:13.
23. Oshike hatu dulu okukala twa teelela nelineekelo?
23 Natu kaleni twa teelela nelineekelo kefimbo olo eshi Ohamba Jesus Kristus tai ka katukila Satana onghatu nosho yo aveshe ovo tave mu shikula. (Ehololo 20:1-3) Jesus ota ka hanauna po aveshe ovo ve na ombinga mokweeta ewoo nepiyaano olo tali monifa ovanhu oixuna. Omanga efimbo olo inali uya, limwe lomomaludi okumona oixuna olo liehameka unene olo okukanifa ovaholike vetu mefyo. Lesha etukulwa la shikula ko u mone osho hava ningilwa.
KONAKONA ESHIIVO LOYE
Otu shii ngahelipi kutya Jehova haye ha etifa okumona oixuna kwovanhu?
Eemhata dilipi kwa li da tukulwa kuSatana muEden noda yelifwa pefimbo laJob?
Okweefa kwaKalunga okumona oixuna ku kale po okwa ulika shike?