Oshileshwa 4

Ondiaboli Oyo Lyelye?

Satana Ondiaboli—okwa dja peni? (1, 2)

Ongahelipi Satana ha pukifa ovanhu? (3-7)

Omolwashike u na okukondjifa Ondiaboli? (7)

1. Oshitya “ondiaboli” otashi ti umwe oo ha popi oipupulu inyanyalifi kombinga yomunhu mukwao. “Satana” otashi ti omutondi ile omupataneki. Ei oyo oitya oyo tai ulike komutondi munene waKalunga. Tete, ye okwa li omwengeli a wanenena meulu pamwe naKalunga. Ndele konima yefimbo okwa kala e lihole unene nokwa li a hala eilikano olo paulelalela li na okupewa Kalunga.—Mateus 4:8-10.

2. Omwengeli ou, Satana, okwa popya naEva okupitila meyoka. Moku mu lombwela oipupulu, ye okwe mu ningifa a ha dulike kuKalunga. Kungaha Satana okwa homona osho tashi ifanwa “ounamapangelo” waKalunga, ile ondodo yaye e li Omukombadambada. Satana okwa tula momalimbililo onghedi yokupangela kwaKalunga ngeenge oya wapala notai etele tuu ovapangelwa Vaye ouwa. Satana okwa ti yo kutya kape na omunhu ta ka kala omudiinini kuKalunga. Mokuninga ngaha, Satana okwe lininga ye mwene omutondi waKalunga. Omolwaashi a ifanwa Satana Ondiaboli.—Genesis 3:1-5; Job 1:8-11; Ehololo 12:9.

3. Satana ota kendabala okuheka ovanhu ve mu ilikane. (2 Ovakorinto 11:3, 14) Onghedi imwe ha pukifa nayo ovanhu oyo okupitila momalongelokalunga oipupulu. Ngeenge elongelokalunga lonhumba tali hongo oipupulu kombinga yaKalunga, otali longo shili metwokumwe nelalakano laSatana. (Johannes 8:44) Ovanhu ovo ve li oilyo yomalongelokalunga oipupulu otashi dulika va itavela shili kutya vo otava ilikana Kalunga kashili. Ndelenee moushili vo vene otava longele Satana. Oye ‘kalunga kounyuni ou.’—2 Ovakorinto 4:4, OB-1954.

4. Oumhulile oo onghedi imwe natango Satana ha tula nayo ovanhu mepangelo laye. Otashi dulika tava ifana eemhepo di va amene, di ehameke vamwe, di xunganeke onakwiiwa, ile di longe oikumwifilonga. Satana oye eenghono dowii di li konima yoilonga aishe ei. Opo tu hafife Kalunga, katu na okukala tu na sha noumhulile.—Deuteronomion 18:10-12; Oilonga 19:18, 19.

5. Satana oha pukifa yo ovanhu okupitila mounhwa wopamihoko wa pitilila nomokwiilikana omahangano opapolotika. Vamwe otava diladila kutya oshiwana shavo ile omuhoko wavo oo muwa u dule dimwe. Ndelenee eshi kashi fi shoshili. (Oilonga 10:34, 35) Ovanhu vamwe ove lineekela omahangano opapolotika opo a kandule po omaupyakadi ounhu. Mokuninga ngaha, vo otava ekeleshi Ouhamba waKalunga. Oo auke u li ekandulepo lomaupyakadi etu.—Daniel 2:44.

6. Onghedi imwe natango Satana ha pukifa nayo ovanhu oyo oku va yeleka nomahalo oulunde. Jehova ote tu lombwele tu kukume oilonga youlunde molwaashi ye okwa shiiva kutya yo otai ke tu etela oshiponga. (Ovagalati 6:7, 8) Ovanhu vamwe otashi dulika va hala u limbwange mumwe navo moilonga ya tya ngaha. Ndelenee dimbuluka, shoshili ou a hala u ninge oinima ei oSatana.—1 Ovakorinto 6:9, 10; 15:33.

7. Satana otashi dulika a longife omahepeko ile omapataneko opo e ku efife po Jehova. Otashi dulika vamwe vomovaholike voye va handuke unene molwaashi to konakona Ombibeli. Vamwe otashi dulika ve ku sheke. Ndelenee okulyelye u na oshikolo shomwenyo woye? Satana okwa hala oku ku tilifa opo u efe po okulihonga kombinga yaJehova. Ino efa Satana a findane! (Mateus 10:34-39; 1 Petrus 5:8, 9) Mokukondjifa Ondiaboli, ove oto dulu okuhafifa Jehova nokuulika kutya oto yambidida ounamapangelo Waye.—Omayeletumbulo 27:11, NW.

[Pictures on page 9]

Omalongelokalunga oipupulu, oumhulile noukwashiwana otau pukifa ovanhu

[Picture on page 9]

Kondjifa Satana mokutwikila nokulihonga kombinga yaJehova