Oshileshwa 8
Onghalamwenyo yOukwaneumbo Oyo Tai Hafifa Kalunga
Omulumenhu oku na ondodo ilipi moukwaneumbo? (1)
Omulumenhu oku na okukala ngahelipi nomukainhu waye? (2)
Oinakuwanifwa ilipi tate e na? (3)
Oshilonga shomukainhu oshashike moukwaneumbo? (4)
Kalunga ota pula shike kovadali nounona? (5)
Ombibeli oya tala ko ngahelipi etukauko nehengano? (6, 7)
1. Ombibeli otai ti kutya omulumenhu oye omutwe weumbo laye. (1 Ovakorinto 11:3) Omulumenhu oku na ashike okukala nomukainhu umwe aeke. Vo ove na okukala va hombola sha yuka paveta.—1 Timoteus 3:2; Titus 3:1.
2. Omulumenhu oku na okukala e hole omukainhu waye ngaashi e lihole mwene. Ye oku na okukala naye panghedi oyo Jesus ha kala novashikuli vaye. (Ovaefeso 5:25, 28, 29) Ye ke na okudenga nandenande omukainhu waye ile oku mu hepeka panghedi yonhumba. Ponhele yaasho, ye oku na oku mu fimaneka.—Ovakolossi 3:19; 1 Petrus 3:7.
3. Tate oku na okulonga neenghono opo a file oshisho oukwaneumbo waye. Ye oku na okuyandja oikulya, oidjalomwa neumbo komukainhu waye nokounona vaye. Tate oku na yo okufila oshisho eemhumbwe dopamhepo doukwaneumbo waye. (1 Timoteus 5:8) Ye ota kwatele komesho mokukwafela oukwaneumbo waye u lihonge kombinga yaKalunga nomalalakano Aye.—Deuteronomion 6:4-9; Ovaefeso 6:4.
4. Omukainhu oku na okukala omukwafi muwa womulumenhu waye. (Genesis 2:18) Ye oku na okukwafela omulumenhu waye mokuhonga nomokudeula ovana vavo. (Omayeletumbulo 1:8) Jehova ota teelele omukainhu a file oshisho oukwaneumbo waye pahole. (Omayeletumbulo 31:10, 15, 26, 27; Titus 2:4, 5) Ye oku na okufimaneka unene omulumenhu waye.—Ovaefeso 5:22, 23, 33.
5. Kalunga ota teelele ounona va dulike kovadali vavo. (Ovaefeso 6:1-3) Ye ota teelele ovadali va honge nokupukulula ovana vavo. Ovadali ove na okulongifa efimbo pamwe novana vavo nokukonakona Ombibeli pamwe navo, okufila oshisho eemhumbwe davo dopamhepo nodopamaliudo. (Deuteronomion 11:18, 19; Omayeletumbulo 22:6, 15) Ovadali kave na nandenande okuyandja outekuduliko kovana vavo panghedi yengwenyauko ile yonyanya.—Ovakolossi 3:21, NW.
6. Ngeenge ovalihomboli ihava tu va fife, ove na okukendabala okulongifa omayele Ombibeli. Ombibeli otai tu ladipike tu ulike ohole nokukala hatu dimine po. (Ovakolossi 3:12-14) Eendjovo daKalunga itadi ladipike etukauko li kale onghedi yokukandula po omaupyakadi manini. Ndelenee omukainhu otashi dulika a hoolole okufiya po omulumenhu waye ngeenge (1) ye ta anye okadaadaa okuyambidida oukwaneumbo waye, (2) ye oku li omukwanyanya nomolwaasho oukolele nomwenyo womukainhu ou li moshiponga, ile (3) epataneko laye linene otali shi ningi itashi dulika komukainhu okulongela Jehova.—1 Ovakorinto 7:12, 13.
7. Ookaume vopahombo kave na okunyona ohombo. Enyonohombo olo okunyona kuKalunga nokukaume kopahombo. (Ovaheberi 13:4) Omilele pondje yohombo odo adike etomheno lopamishangwa lokuhengana nokukala wa manguluka okuhombolulula ile okuhombolululwa. (Mateus 19:6-9; Ovaroma 7:2, 3) Jehova oku shi tonde ngeenge ovanhu tava hengana pe he na omatomhelo opamishangwa nokuhombola umwe e lili.—Malakia 2:14-16.
[Pictures on page 16, 17]
Kalunga ota teelele ovadali va honge ovana vavo noku va pukulula
[Picture on page 17]
Tate omunahole oha file oshisho oukwaneumbo waye pambelela nopamhepo