Okuladipika vamwe va longife Ombibeli

OTWA hala okuyukifa elitulemo lovanhu kEendjovo daKalunga, Ombibeli. Membo olo liyapuki omo mu na etumwalaka olo hatu udifa, notwa hala ovanhu va shiive nokutya eendjovo odo hatu popi kadi fi detu vene ndele odaKalunga. Ovanhu ova pumbwa okukwafelwa va kale ve lineekela Ombibeli.

Okulongifa Ombibeli moukalele. Ngeenge to lilongekidile oukalele, hoolola omushangwa umwe ile donhumba odo wa hala oku ka leshela ovo ve na ohokwe yokupwilikina. Nokuli nonande oto ka ninga ashike etwalemo lixupi li na sha noishangomwa oyo ye likolelela kOmbibeli, ohashi kala alushe shiwa okulongifa omushangwa wOmbibeli oo tau wapalele. Ombibeli oi na eenghono dinene odo tadi dulu okuvyula ovo va fa eedi shi dulife oshinima keshe osho hatu va lombwele. Ngeenge itashi shiiva okulesha mOmbibeli, oto dulu okutofa okudja muyo. Mefelemudo lotete, omishangwatonywa kada li naanaa apeshe. Ndele nande ongaho, Jesus novayapostoli vaye ova li hava tofa luhapu okudja mOmishangwa. Nafye otu na yo okukoneka omishangwa momutwe kutya otadi ti shike noku di longifa nawa moukalele. Omafimbo amwe, ohatu dulu ashike okutofa mudo nokuli.

Ngeenge owa pewa omhito yokulesha Ombibeli, i kwata monghedi omo omuneumbo ta dulu okulandula eshi to lesha. Ngeenge omuneumbo ota landula mOmbibeli yaye eshi to lesha, otashi dulika e ke linyengifwe kwaasho e wete mOmbibeli yaye shi dulife ashike eshi to mu leshele ehe na Ombibeli.

Natu dimbuluke kutya ovatoloki vamwe vOmbibeli ova hekula Eendjovo daKalunga. Omatoloko avo peemhito dimwe ihaa yandje lela eityo le likolelela komalaka omo Ombibeli ya li ya shanga pehovelo. Omatoloko mahapu kunena okwa kufa mo edina laKalunga, okwa futika oshili i na sha nonghalo yoonakufya nosho yo oshili kombinga yelalakano laKalunga li na sha nedu. Opo u ulikile ovanhu osho sha ningwa po, otashi dulika wa pumbwa okuyelekanifa omishangwa odo nomatoloko amwe onale Ombibeli melaka olo tuu olo tamu longifa. Moikundafanwa ihapu membo Reasoning From the Scriptures, omu na oihopaenenwa yanghee omatoloko Eembibeli di lili noku lili a toloka omautumbulilo oo e li meevelishe odo hadi longifwa luhapu. Omunhu oo e hole oshili ota ka kala a hafa okushiiva omauyelele oo.

Okuladipika vamwe va landule mEembibeli davo pokwoongala. Ovapwilikini aveshe ove na okuladipikwa va longife Eembibeli davo pokwoongala. Okulongifa Ombibeli pokwoongala ohashi etele ovapwilikini ouwa muhapu. Ohashi va kwafele va yandje elitulemo kwaasho tashi kundafanwa. Kakele kokuuda osho tashi popiwa pakanya komupopi, ovapwilikini otava dulu okukoleka osho tashi popiwa mokutala mOmbibeli. Otashi ka kwafela yo ovo vape va mone kutya eitavelo letu ola kanghamena filufilu kOmbibeli.

Osho tashi ka ufa kutya ovapwilikini otava ka shikula mEembibeli davo eshi to lesha omishangwa oshe likolelela unene konghedi omo to va ladipike va endele pamwe naave eshi to di lesha. Oku va shiva odikilila va leshe pamwe naave oku li imwe yomonghedi ya denga mbada doku va ladipika va endele pamwe naave.

Oove mwene u na okutokola kutya omishangwa dilipi wa hala okudivilika nokupula ovapwilikini va endele pamwe naave eshi to di lesha. Oshixwepo okulesha odo tadi yambidida oitwa oyo ya fimanenena moshipopiwa shoye. Opo nee ngeenge efimbo otali shi pitike, oto dulu okulongifa omishangwa da wedwa po odo tadi yambidida osho to kundafana.

Ndele inashi wana ashike okupopya embo lOmbibeli, etukulwa novelishe ile okushiva ovapwilikini va konge omushangwa wonhumba. Ngeenge owa lesha omushangwa umwe ndele to i vali komushangwa mukwao ofimbo ovapwilikini voye inava mona oo wa lesha tete, otava ka teka omukumo noitava ka kendabala vali okweendela pamwe naave eshi to lesha omishangwa. Kala to tale opo u shilipaleke kutya vahapu ova mona po pomushangwa, opo nee to u lesha.

Kala ho tumbula kuyele omishangwa odo wa hala ovapwilikini va endele pamwe naave eshi to di lesha, opo shi va pe omhito ya wana ve di mone. Osho otashi ke ku kwafela u xupife efimbo olo hali hepifwa ofimbo omunhu wa teelela ovapwilikini va mone omushangwa. Nonande efimbo otali ke ku pitika u longife ashike ouyelele munini, ngeenge oto pe ovapwilikini omhito va mone po pomishangwa, otashi ka eta oidjemo iwa.