Okupopya to ulike kutya owa tomhwa

NGEENGE omunhu ota ulike kutya okwa tomhwa, ovanhu otava ka mona kutya okwa itavela shili osho ta popi. Oukwatya oo okwa li u liwetikile pefimbo loukalele womuyapostoli Paulus. Okwa li a shangela ovo va ninga ovaitaveli muTessalonika a ti: ‘Evangeli letu ola fika kunye haneendjovo adike, ndele otwa ulika yo kutya otwa tomhwa filufilu.’ (1 Tes. 1:5, yelekanifa NW.) Onghedi yaPaulus yokupopya noyokukalamwenyo oya li tai ulike kutya okwa tomhwa filufilu. Nafye otu na okuulika oukwatya wa tya ngaho ngeenge hatu yelifile vamwe eeshili dOmbibeli.

Okupopya hatu ulike kutya otwa tomhwa itashi ti shimwe nokukala wa kanyatela ashike ngahenya ediladilo lonhumba uhe na oumbangi ile okupopya nelinenepeko. Ndele ponhele yaasho, omunhu oo ta popi shi na sha nEendjovo daKalunga, ta ulike kutya okwa tomhwa, ohe shi ningi monghedi oyo tai ulike kutya oku na eitavelo la kola. — Heb. 11:1.

Eemhito opo tu na okupopya hatu ulike kutya otwa tomhwa. Osha fimana okukala hatu popi twa tomhwa ngeenge tu li moukalele. Luhapu ovanhu ihava pwilikine ashike ketumwalaka loye, ndele ohava konenene yo onghedi omo to popi. Ova kala ve wete nghee u uditile oshinima osho to kundafana navo. Okupopya to ulike kutya owa tomhwa oko unene haku ulikile ovanhu kutya owa lenga etumwalaka olo to va lombwele.

Otwa pumbwa okukala hatu popi twa tomhwa ngeenge hatu popi novaitaveli vakwetu. Eshi omuyapostoli Petrus a shanga onhumwafo yaye yotete, okwe i shanga nelalakano ‘lokukumaida nokuhepaulula efilonghenda lashili laKalunga.’ Monhumwafo oyo, okwa li a ladipika ovamwaxe va kale ‘ve likolele’ mefilonghenda laKalunga. (1 Pet. 5:12, yelakanifa OB-1986.) Eshi omuyapostoli Paulus a li a shangela eongalo lokuRoma, okwa li a popya eendjovo donhumba a tomhwa nokwa li da etela eongalo olo ouwa. Okwa ti: “Ondi shi shii shili, haefyo ile omwenyo, haovaengeli ile ovapangelinghono, haai yopaife ile ei yokomesho, haenghono, [haoule wopombada ile oule woposhi, hashishitwa] nande shimwe tashi dulu oku tu tukula mohole yaKalunga yomuJesus Kristus, Omwene wetu.” (Rom. 8:38, 39) Paulus okwa li yo shanga ta tu omufindo omhumbwe yokuudifila vamwe, nouladi waye moilonga ya tya ngaho owa li wa ulika kutya okwa tomhwa a itavele kutya oshilonga osho osha fimana. (Oil. 20:18-21; Rom. 10:9, 13-15) Ovakulunhuongalo Ovakriste vokunena navo ove na okuholola oukwatya wa tya ngaho ngeenge tava hongo Eendjovo daKalunga.

Ovadali ova pumbwa okukala tava popi va tomhwa ngeenge tava kundafana oinima yopamhepo novana vavo pefimbo lekonakono loukwaneumbo ile peemhito dimwe di lili. Opo va dule okuninga ngaho, ova pumbwa okukala ve hole Kalunga tashi di komutima nosho yo eendjila daye. Kungaho, otava ka dula okupopya va tomhwa molwaashi “osho shi yadi omutima, okanya ohake shi popi.” (Luk. 6:45; Deut. 6:5-7) Ngeenge ovadali ova tomhwa, otashi ke ve linyengifa va tulile po ovana vavo oshihopaenenwa shokukala ‘neitavelo lihe noihelele.’ — 2 Tim. 1:5.

Osha fimana yo okupopya to ulike kutya owa tomhwa unene tuu ngeenge vamwe tava shongo eitavelo loye. Ovanafikola vakwetu, ovahongifikola ile ovanailonga vakwetu otashi dulika va kale va kumwa okuuda kutya ihatu dana oivilo yonhumba. Ngeenge otwa tomhafana navo pandunge, hatu popi twa mana mo, otashi dulika shi ke va kwafele va fimaneke omufika wetu oo wa kanghamena kOmbibeli. Ongahelipi ngeenge vamwe otava kendabala oku ku kokela moinima ii ngaashi, okupopya oipupulu, okulongifa oingangamifi ile okuya moluhaelo? Osha fimana okupopya sha yukilila kutya ito ka kufa ombinga nandenande moinima ya tya ngaho nonokutya nande nava ninge eenghendabala, ito ke liyandja. Owa pumbwa okupopya to ulike kutya owa tomhwa ngeenge ope na vamwe tava ningi eenghendabala doku ku kokela momilele. Eshi Josef a li a anya okukokelwa momilele komukainhu waPotifar, okwa li a popya nouladi a ti: “Ndi dule ngahelipi okuninga owii u fike opo nokunyona kuKalunga?” Eshi omukainhu oo a kala te mu kondjifa, Josef okwa ya onhapo, a dja mo meumbo. — Gen. 39:9, 12.

Nghee to dulu okuulika kutya owa tomhwa. Eendjovo odo to ka popya otadi dulu okuulika kutya owa tomhwa shili. Peemhito dihapu, Jesus okwa li ha hovele omatumbulo aye a fimana ta ti: “Oshilishili handi mu lombwele.” (Joh. 3:3, 5, 11; 5:19, 24, 25) Paulus okwa li ha ulike kutya okwa tomhwa a itavele osho ta popi eshi a longifa omautumbulilo ngaashi: “Osheshi ondi shi shii shili,” “ame ondi shi shii, ndele onda pama shili mOmwene Jesus” nosho yo ‘ohandi popi doshili muKristus, itandi fufya.’ (Rom. 8:38; 14:14; 1 Tim. 2:7) Omafimbo amwe, Jehova okwa li ha nwefa mo ovaprofeti vaye va popye tava tu omufindo oushili oo kutya eendjovo daye otadi ka wanifwa. Pashihopaenenwa, omuprofeti umwe okwa popya shi na sha nefiku laJehova a ti: “Olo tali ka fika shili.” (Hab. 2:3) Naave oto dulu yo okulongifa omautumbulilo a faafana ngeenge to kundafana navamwe omaxunganeko Ombibeli. Ngeenge oto popi to ulike kutya owe lineekela muJehova, ndele hamwoove mwene, noto popi nefimaneko, oto ka yandja oumbangi kutya owa tomhwa u itavele osho to popi.

Oto dulu yo okuulika kutya owa tomhwa mokupopya kwoye wa mana mo nosho yo mokudivilika kwoye. Oto dulu yo oku shi ulika momalinyengo oye okoshipala ile olutu nomomaudi, nonande onghedi omo tashi ningwa otashi dulika shi kale sha yooloka komunhu nomunhu. Nokuli nonande ou na eehoni ile oho popi nondaka i li pedu paushitwe, ngeenge owa tomhwa u itavele kutya osho to popi oshoshili nonokutya ovanhu ova pumbwa oku shi uda, otashi ke limonikila mo ngeenge oto popi to ulike kutya owa tomhwa.

Ngeenge hatu popi hatu ulike kutya otwa tomhwa, otwa pumbwa okupopya tashi di komutima. Ngeenge ovanhu ove wete kutya oto popi to liningifa, itava ka tala ko etumwalaka loye li na ongushu yasha. Onghee hano, kala ho popi monghedi yoye paushitwe. Ashike ngeenge oto popi nongudu yovanhu inene, otashi dulika u kale wa pumbwa okuweda ko kewi loye nokupopya nondjungu. Ndele nande ongaho, owa pumbwa okukala to popi tashi di komutima nosho yo monghedi yoye yopaushitwe.

Oinima oyo tai dulu oku tu kwafela. Molwaashi okupopya to ulike kutya owa tomhwa okwa kwatela mo okuholola omaliudo a yukila kouyelele oo to ka kundafana, osha fimanenena okulilongekida nawa. Inashi wana ashike okukala u na ouyelele wonhumba oo wa hanga moileshomwa noku u lesha. Owa pumbwa oku u uda ko nawa nokupopya to longifa oitya yoye ove mwene. Ou na okukala wa tomhwa filufilu u itavele kutya ouyelele oo ou li paushili nonokutya otau dulu okweetela ovapwilikini ouwa. Onghee hano, ngeenge to lilongekidile oshipopiwa shoye, ou na okukaleka momadiladilo eenghalo dovapwilikini nokukala wa nongela kutya oshike osho ve shii nale kombinga yoshikundafanwa osho nonghee ve shi uditile.

Ngeenge ohatu popi itatu kakadala, ovanhu otava dulu oku shi mona mo noupu kutya otwa tomhwa. Onghee hano, otwa pumbwa yo okulideula nghee hatu ka yandja oshipopiwa. Yandja elitulemo le likalekelwa koitukulwa yoshipopiwa shoye oyo tai pula u popye to ulike lela kutya owa tomhwa, opo u popye ito tale luhapu koshipopiwadutilo shoye. Dimbuluka yo okwiilikana kuJehova opo a nangeke noupuna eenghendabala doye. Kungaho, oto ka kala “nouladi muKalunga,” oo tau ke ku dulifa u popye to ulike kutya owa tomhwa kutya etumwalaka loye oli li paushili nola fimana. — 1 Tes. 2:2.